Yesu pʋ'ʋs Wina'am tis o nidib
17
1 Ka Yesu pian' pian'abama naae la o gɔdigi gɔs saazug ka yɛl ye,
“M Ba'a,
saŋa la paae ya.
Zun'omi fʋ Biig la yʋ'ʋr,
ka o mɛ na zun'e fʋ yʋ'ʋr;
2 ka fʋ tis o paŋ ka o sʋ'oe saalib wʋsa ka zaŋ nyɔvʋr linɛ ka' naar la tis banɛ wʋsa ka fʋ tis o la.
3 Ka nyɔvʋr linɛ ka' naar la anɛ ye ba baŋ fʋn onɛ sid an Wina'am yinne ma'aa la,
nɛ man Yesu Kristo onɛ ka fʋ tʋm na la.
4 M tʋm tʋʋm linɛ ka fʋ tisim la naae ka zun'e fʋ yʋ'ʋr dunia ni.
5 M Ba'a,
fʋn mɛ zu'omi m yʋ'ʋri fʋ mɛŋ tuon nannanna nɛ zun'or kanɛ ka m mɔri fʋ san'an ka dunia nam kae la.
Yesu sɔsi tis o nya'andɔlib
6 “M pa'ali fʋ yʋ'ʋri tis nimbanɛ ka fʋ gaŋ dunia nwa nii tisim la.
Ba da anɛ fʋ din ka fʋ zaŋi ba tisim ka ba siaki fʋ nɔɔr,
7 ka baŋ ye fʋn tis man si'el la wʋsa yinɛ fʋ san'an na,
8 bɔzugɔ pian'abanɛ ka fʋ tisim la,
m mɛ tisi ba,
ka ba di'e ka sid baŋ ye m yinɛ fʋ san'an na,
ka lɛn siak ye fʋnɛ tʋmim na.
9 M sɔsidif nɛ ba yɛla.
Amaa m pʋ sɔsid dunia dim yɛlaa,
amaa banɛ ka fʋ tisim la yɛla,
ban aan fʋ din la zug.
10 Man din wʋsa anɛ fʋ din,
ka fʋ din mɛ aan m din,
ka ba ni ka m yʋ'ʋr nyɛt zun'or.
11 Ka nannanna m kennɛ fʋ san'an na ka kʋ lɛm bɛ dunia nii,
ka ban lɛɛ na kpɛm bɛɛ li ni.
M Ba'asʋŋɔ,
guri ba nɛ fʋ paŋ kanɛ ka fʋ tisim la,
ka li na kɛ ka ba ti an yinne wʋʋ tinamɛ an yinne si'em la.
12 Man daa bɛ nɛ ba la,
m daa guri ba nɛ yʋ'ʋr kanɛ mɔr paŋ ka fʋ tisim la.
M gɔsi ba ka ba sɔ' pʋ bɔdigɛ asɛɛ onɛ ka li yɛli zi'el ye o san'am la,
ye Wina'am gbauŋʋ sɔb si'em la niŋ amɛŋa.
13 “M yʋ'ʋn kennɛ fʋ san'an na ka pian' pian'abama dunia ni ye sumalisim wʋsa na bɛɛ ba sʋnya ni.
14 M tisi ba fʋ pian'ad ka dunia dim kisi ba,
ban ka' dunia din la zug,
wʋʋ mam mɛ ka' dunia din si'em la.
15 M pʋ sɔsidif ye fʋ yisi ba dunia nwa nii,
amaa m sɔsid ye fʋ da kɛ ka ba kpɛn' yɛlbɛ'ɛdi nɛ.
16 Ka man ka' dunia din si'em la,
ala ka ba mɛ ka' dunia dinnɛ.
17 Kɛl ka yɛlsida la maali ba ka ba liebi fʋ mɛŋ nidibi an nyain,
bɔzugɔ fʋ pian'ad la anɛ sida.
18 Fʋn tʋmim dunia ni na si'em la,
ala mɛn ka m mɛ tʋmi ba dunia ni.
19 Ka ban yɛla ka m pɛsigi m mɛŋi tisif,
ye fʋ yɛlsida la kɛ ka ba mɛ pɛsigi ba mɛŋi tisif.
Yesu sɔsi tis yadda niŋidib wʋsa
20 “Li ka'anɛ bama yɛla ma'aa ka m sɔsidi fɔ,
amaa la'am nɛ banɛ na ti niŋ man yadda,
ka li dɔlli ba labasʋŋ mɔɔlʋg zug la.
21 M Ba' m sɔsidif ye ba wʋsa an yinne wʋʋ fʋn nɛ mam an yinne si'em la,
ala mɛn ka ba mɛ an yinne nɛ ti.
Ka dunia dim na siak ye fʋnɛ tʋmim na.
22 Ka zun'or kanɛ ka fʋ tisim la,
m zaŋi lii tisi ba ye ba an yinne wʋʋ tinamɛ an yinne si'em la.
23 M na bɛɛ ba sʋnya ni ka fʋ bɛɛ m ni,
ye ba sid an yinne,
ka dunia na baŋ ye fʋnɛ tʋm man na ka nɔŋi ba wʋʋ fʋn nɔŋ man si'em la.
24 “M Ba'a,
m bɔɔd ye banɛ ka fʋ tisim la bɛ nɛ m ka nyɛɛm zun'or linɛ ka fʋ da tisimi fʋ nɔŋir zug,
saŋa kanɛ ka dunia da nan kae la.
25 “M Ba' onɛ an pʋpielim sɔba,
dunia nan pʋ baŋi fɔ,
ka man lɛɛ baŋif,
ka nimbama baŋ ye fʋnɛ tʋm man na.
26 “Man kɛ ka ba baŋi fʋ yʋ'ʋr ka na kpɛn niŋid ala,
ye nɔŋir kanɛ ka fʋ mɔri m yɛla la na bɛɛ ba ni,
ka mam mɛ bɛ nɛ ba.”