Vain tiig nɛ wila la siiliŋ
15
1 Ka Yesu pa'al o nya'andɔlib la nɛ siiliŋ ye,
“Manɛ an vain tiig la amɛŋa.
Ka m Ba' an onɛ gur tiig la.
2 Wilkanɛ bɛɛ m ni ka pʋ wanna,
m Ba' nwaadi li nɛ basid.
Ka wilkanɛ wʋsa wan la,
o pɛsidi li nɛ maali li sʋ'ʋŋa ka li maligim wan bɛdegʋ.
3 Pian'akanɛ ka m pian' tisi ya la zug,
ya anɛ nyain.
4 Kpɛm bɛ man ni ka man mɛ na bɛɛ ya ni.
Tiig wil kʋ tun'e walɛ,
asɛɛ o kpɛm bɛ tiigin la.
Ala mɛn ka ya kʋ tun'e niŋ si'ela asɛɛ ya kpɛm bɛ man ni.
5 “Manɛ an tiig la,
ka yanam an wila la.
Onɛ kpɛm bɛ man ni ka man mɛ bɛɛ o ni la,
on sɔb na wal bɛdegʋ,
bɔzugɔ ya kʋ tun'e niŋ si'ela asɛɛ ya kpɛm bɛ man ni.
6 Onɛ pʋ bɛ man ni nwɛnɛ wilkanɛ ka ba nwaae bas,
ka li kʋdig la.
Ba na la'as wilbanɛ lɔb bugumin,
ka bugum dii ba.
7 Ya ya'a kpɛm bɛ man ni,
ka m pian'ad bɛɛ ya ni,
ya na sɔs yanamɛ bɔɔd si'el wʋsa ka li na niŋ ala tisi ya.
8 Ya tʋʋm sʋma bɛdegʋ dʋ'ʋsidi m Ba' Wina'am yʋ'ʋr.
Ka ala mɛn ka li na pa'al ye ya anɛ m nya'andɔlib.
9 “M Ba' nɔŋim si'em la,
ala mɛn ka man nɔŋi ya.
Kpɛm bɛɛ nɛ m nɔŋir la pʋʋgin.
10 Ya ya'a siaki m nɔzi'elʋg la,
ya na kpɛlimi m nɔŋilimin la,
wʋʋ man siaki m Ba' nɔɔr ka kpɛlim o nɔŋilimin si'em la.
11 “M yɛli ya yɛlbama ye ya di'e m sumalisim.
Ka ya sʋnya na pɛ'ɛl nɛ sumalisim.
12 M nɔɔr zi'elʋgʋ nwa ka m yɛti ya ye,
‘Nɔŋimi taaba,
wʋʋ man nɔŋi ya si'em la.’
13 Nɔŋir lɛn kae gaad nidi na kpi o zuanam zugɔ.
14 Ya ya'a siaki m nɔzi'ela,
ya anɛ m zuanam.
15 M ɛɛnti buoni ya nɛ ye,
m tʋmtʋmnib.
Amaa m kʋ lɛm buoli ya ala ya'asɛ,
bɔzugɔ tʋmtʋm zi' o zugdaani niŋid si'ela.
Amaa m buoni ya nɛ ye,
m zuanam,
bɔzugɔ m yɛli ya m Ba' yɛlim si'el la wʋsa.
16 Ka' yanamɛ gaŋi ma.
Amaa manɛ gaŋi ya ye ya tʋm tʋʋm sʋma wʋʋ tisʋŋi wan walsʋma si'em la.
Ka ya tʋʋm sʋma na kpɛlim.
Ka ya ya'a sɔsi m Ba' Wina'am si'el man yʋ'ʋr zug o na tisi ya.
17 M nɔzi'elʋg anɛ ye,
ya nɔŋimi taaba.
Dunia dim kisʋg la yɛla
18 “Dunia dim ya'a kisi ya,
yanam baŋimi ye ba dɛŋi kisignɛ man yiiga.
19 Ya ya'a bɛɛn dunia dim sʋ'ʋlimin,
ba naan nɔŋini ya wʋʋ ba mɛŋ nidib nɛ.
Amaa ya ka' dunia dim sʋ'ʋlim nii.
M gaŋi ya nɛ wɛligi yis dunia dim sʋ'ʋlim ni.
Dinzug ka dunia dim kisi ya la.
20 Tiɛnmi yɛlkanɛ ka m yɛli ya la ye,
‘Tʋmtʋm pʋ gat o zugdaana.’
Ba ya'a namis man,
ba na namisi ya mɛn.
Ka ba ya'a daa siak man pa'alʋg,
ba mɛ na siaki ya pa'alʋg mɛn.
21 Ba na niŋi ya nɛ'ɛnam wʋsa man zug,
bɔzugɔ ba zi' onɛ tʋmi m la naa.
22 Man ya'a pʋ kɛɛn na tu'asini ba,
ba naan kʋ mɔrin taalɛ.
Amaa lin an si'em la linɛ na ligili ba taal la kae.
23 Onɛ kis man la,
o kisi m Ba' la mɛn.
24 M ya'a pʋ tʋmin tʋʋm kanɛ ka sɔ' nan zi' tʋmi ba san'an la,
ba naan kʋ mɔrin taali ba tʋʋmbɛ'ɛd zugɔ.
Amaa ba nyɛ tʋʋmnyalima bama wʋsa ka la'am zan'as ka kis man nɛ m Ba' la wʋsa.
25 Lin na niŋ si'em la anɛ ye ban da dɛŋi sɔb si'el Wina'am gbauŋʋn la lieb amɛŋa ye,
‘Ba kisim zaalim-zaalim.’