Yesu nɛ o pitib la yɛla
7
1 Ka nɛ'ɛŋa nwa nya'aŋ la ka Yesu giligid Galile teŋin ka pʋ bɔɔd ye o giligid Juda teŋinɛ,
Jew dimi bɔɔd ye ba kʋʋ o la zug.
2 Jew dim di'em kanɛ an Sʋga Gbɛɛnb Malʋŋ la da li'el la,
3 ka Yesu pitib yɛl o ye,
“Basim kpɛla ka keŋ Juda teŋin ka fʋ nya'andɔlib la nyɛ tʋʋmnyalima banɛ ka fʋ tʋm la.
4 Sɔ' ya'a bɔɔd ye o yʋ'ʋr yi paalʋ,
o pʋ su'adi tʋmmi o tʋʋmaa.
Fʋ ya'a tʋm tʋʋm bama fʋn kɛ ka nidib bɛdegʋ baŋ.”
5 O pitib la pʋ niŋ o yadda,
linzug ka ba yɛl o ala.
6 Ka Yesu yɛli ba ye,
“Mam saŋa nam pʋ paae,
amaa saŋa mɛkama yanam mɔr ya'a.
7 Dunia dim kʋ nyaŋi kisi yanama,
amaa ba kisnɛ man,
bɔzugɔ man yɛti banɛ saŋa wʋsa ye ban bɛ bɛllim si'a la anɛ bɛ'ɛd.
8 Yanam kem di'ema la.
M nan kʋ keŋ di'em kaŋaa;
bɔzugɔ m saŋa nam pʋ paae.”
9 On yɛl wala la ka kpɛlim Galile teŋin.
Yesu bɛ Sʋga Gbɛɛnb Malʋŋ la ni
10 Ka o pitib la gaadi naae la,
ka o mɛ yuolim keŋ,
ka pʋ nɛɛl o mɛŋa.
11 Ka Jew dim ieed o di'ema la ni ka bu'osid ye,
“O bɛ yaanɛ?”
12 Ka nidib la bɛdegʋ nya'am,
ka sieba ye,
“O anɛ ninsʋŋ.”
Ka sieba ye,
“Ayei,
o pa'annɛ nidib la linɛ an suobɛ'ɛd.”
13 Ka ban zɔt Jew dim la zug ka sɔ' pʋ nyaŋi pian' nɛɛlɛ.
14 Ka di'ema la ti paae pʋsʋk ka Yesu duo kpɛn' Wina'am Pʋ'ʋsim Yin la pa'an nidib.
15 Ka li lidig Jew dim la ka ba yɛt ye,
“Dau kaŋa niŋ wala mɔr baŋir ka lɛɛ pʋ zamisɛ?”
16 Ka Yesu lɛbisi ba ye,
“M pa'ala ka' m mɛŋ dinnɛ,
amaa li anɛ onɛ tʋmim la na din.
17 Onɛ bɔɔd ye o tʋm Wina'am bɔɔdim,
o na baŋ ye m pa'ala yinɛ Wina'am san'an na,
bɛɛ m pian'adnɛ,
nɛ m mɛŋ paŋa.
18 Onɛ pian'ad nɛ o mɛŋ paŋ la bɔɔdnɛ o mɛŋ yʋ'ʋr.
Amaa onɛ bɔɔd ye onɛ tʋm o la na di'e yʋ'ʋr la,
anɛ sida sɔb ka pʋ mɔr zirii.
19 Ya pʋ di'e wada Moses san'anɛɛ?
Ka la'am nɛ wala ya sɔ' pʋ dɔlli li suorɛ.
Bɔ ka ya ieed suoya ye ya kʋʋ ma?”
20 Ka nidib la lɛbis o ye,
“Kikirigi dɔllif.
Anɔ'ɔnamɛ bɔɔd ye ba kʋʋ fɔ?”
21 Ka Yesu lɛbisi ba ye,
“M daa tʋm tʋʋmnyalʋŋ yinne ka li lidigi ya.
22 Moses da yɛl ye,
ya kpɛn'ɛm baŋʋ,
(amaa li da ka'anɛ Moses n da pin'ili lii,
li da yinɛ ya yaanamin na).
Amaa ya kpɛn'ɛsid biribis baŋʋ Vʋ'ʋsʋm Daar.
23 Ka ya ya'a kpɛn'ɛsid biribiŋ baŋʋ Vʋ'ʋsʋm Daar ka li pʋ san'am Moses wada la,
bɔ ka ya sʋnya pɛlig nɛ mam daa ti'eb dau Vʋ'ʋsʋm Daar la?
24 Da gɔs sɔ' nindaa ka pin'ili kat o saria,
amaa kadimi saria nɛ sida.”
25 Dinzug ka Jerusalem ninsieba bu'os ye,
“Li ka'anɛ dau kaŋa ka ba bɔɔd ye ba kʋ laa?
26 Ka gɔsimi ya,
o pian'adnɛ paalʋ ni ka ba pʋ niŋ o si'ela.
Kpɛɛmnam sid siak ye o anɛ Kristo onɛ ka Wina'am gaŋ la bɛɛ?
27 Amaa ti mi' dau kaŋa yi si'el na,
ka Kristo la ya'a ti nie sɔ' kʋ baŋ on yi si'el naa.”
28 Ka Yesu da nan bɛ Pʋ'ʋsim Yin la pa'an nidib la,
o da pian' nɛ kʋkɔtita'ar ye,
“Ɛɛn,
ya sid mi'im ka mi' man yi zin'isi'a na.
Li ka' m mɛŋ paŋ ka m nɔki kenaa.
Amaa onɛ tʋm man na la anɛ sida sɔb,
ka ya zi' oo.
29 Ka mam lɛɛ mi' o,
bɔzugɔ onɛ tʋm man,
ka o san'an ka m yina.”
30 Dinzug ka ba ieed suor ye ba gban'e o,
ka sɔ' pʋ si'is oo,
bɔzugɔ o saŋa daa nan pʋ paae.
31 La'am nɛ wala nidib la tita'am da niŋ o yadda,
ka yɛl ye,
“Kristo la ya'a ti kena o na tʋm tʋʋmnyalima gaad dau kaŋa tʋm si'el laa?”
Farisee dim tʋm nidib ye ba gban'e Yesu
32 Ka Farisee dim wʋm nidib la nya'am Yesu yɛla si'em la,
ka ban nɛ Wina'am maanmaannib kpɛɛmnam tʋm nidib ye ba gban'e o na.
33 Ka Yesu yɛl ye,
“M na bɛ nɛ ya yuug bi'ela ka lɛn lɛb onɛ tʋm man na la san'an.
34 Ya na ti ieedim ka kʋ nyɛɛ ma,
ka mam na bɛ zin'isi'a la ya kʋ nyaŋi kɛɛn ani naa.”
35 Ka Jew dim yɛl taaba ye,
“Dau kaŋa gban'e ye o keŋ yaanɛ ka ti kʋ nyɛ oo?
O gban'e nɛ ye o keŋ Girik dim tɛɛnsin,
zin'ikanɛ ka Jew dim bɛ la pa'al Girik dim laa?
36 Ka on yɛl ye,
ti na ti ieed o ka kʋ nyɛɛ o,
ka ye on bɛ zin'isi'a la ti kʋ nyaŋi kena la,
li gbin an bɔ?”
Wina'am Siig Kasi la yɛla
37 Ka di'ema la naar dabisir linɛ an dabistita'ar la,
ka Yesu duoe zi'en ka pian'ad nɛ kʋkɔtita'ar ye,
“Ku'onuud ya'a mɔr sɔ',
on kemi m san'an na nu.
38 Li dɔlnɛ Wina'am gbauŋʋ sɔbi siilim si'em la ye,
‘Onɛ niŋim yadda,
nyɔvʋr ku'om na zɔti yit o san'an na.’ ”
39 O yɛl nɛ'ɛŋa ka li gbin pa'alnɛ Wina'am Siig Kasi la yɛla,
ka banɛ niŋ o yadda la na ti di'e o.
Saŋkan la Wina'am da nam pʋ tisi ba o Siig Kasi la,
bɔzugɔ Yesu da nan pʋ nyɛ girima o kum vʋ'ʋgir la nya'aŋa.
Bakir bɛ nidibin Yesu yɛla
40 Ka ban wʋm pian'akan la,
nidib la sieba yɛl ye,
“Oŋa sid an Wina'am nɔdi'es la.”
41 Ka sieba ye,
“Oŋa an Kristo la.”
Amaa ka sieba bu'os ye,
“Kristo la na niŋ wala yi Galile na?
42 Wina'am gbauŋ pʋ yɛl ye Kristo la na yinɛ David gbinnin na ka ba du'a o Betilehem teŋ kanɛ ka David da bɛ la naa?”
43 Ka bakir bɛ nidibin la o yɛla.
44 Ka sieba bɔɔd ye ba gban'e o amaa sɔ' pʋ si'is oo.
Jew dim kpɛɛmnam pʋ niŋ Yesu yadda
45 Ka nimbanɛ keŋ ye ba gban'e o la lɛb maanmaannib kpɛɛmnam nɛ Farisee dim la san'an ka ba bu'os ye,
“Bɔ ka ya pʋ gban'e o na?”
46 Ka ba lɛbis ye,
“Sɔ' nan zi' pian' nwɛnɛ dau kaŋaa.”
47 Ka Farisee dim la bu'osi ba ye,
“Ka yanam mɛ yidig nɛ dɔl suobɛ'ɛd la bɛɛ?
48 Ka kpɛɛmnam la bɛɛ Farisee dim la sieba niŋ o yaddaa?”
49 Nɔpɔɔr bɛ nidib bɛdegʋ banɛ zi' wada la zug.
50 Ka Nikodemus onɛ daa dɛŋin kɛn Yesu san'an na ka aan ba nid yinne la bu'osi ba ye,
51 “Ti wada la tis suor ye ti kʋʋs sɔ' bɛ'ɛd ka pʋ wʋm o antu'a ka baŋ on tʋm si'elaa?”
52-53 Ka ba lɛbis o ye,
“Fʋ yinɛ Galile na mɛnɛɛ?
Lɛm Wina'am gbana ni ka fʋ na baŋ ye nɔdi'es kʋdim kʋ yi Galile naa.”