Naar saŋa la yɛla
12
1 Ka Daniel lɛn yɛl ye, “O da lɛn yɛlim ye, ‘Saŋkan la Maikel onɛ an maliaknam kpɛɛm ka guri fʋ nidib la na duoe na. Tɔɔg saŋa na kena, hali ka li buudi nan zi' kenaa, lin yi sʋ'ʋlim la pin'ilʋgʋn ti paae saŋkan la. Amaa saŋkan la fʋ nimbanɛ wʋsa yʋda sɔb gbauŋʋn la na nyɛ faangir. 2 Nidib bɛdegʋ banɛ kpi la na vʋ'ʋg kumin. Sieba na vʋ'ʋgi paam nyɔvʋr linɛ ka' naarɛ, ka sieba mɛ na vʋ'ʋgi di nyan nɛ ziemis linɛ ka' bɛnnɛ. 3 Banɛ mɔr ya'am la na nyɛɛn wʋʋ arezana nɛɛsim nɛ, ka banɛ nyaŋi sʋŋi ba taaba ka ba tiaki lieb pʋpielim dim la na nwɛnɛ nwadbibis nɛ saŋa linɛ ka' bɛnnɛ. 4 Amaa fʋn, Daniel, su'am pian'akanɛ bɛ gbauŋʋn la ka saŋa la bɛn ti paae. Nidib bɛdegʋ na zɔti giligidi ieed baŋir.’5 “Ka man Daniel, ʋki m nindaa nyɛ nidiba ayi' ka ba zi'e m san'an, ka yinne zi'e kɔldaug la gbɛog ka yinne la mɛ zi'e gbɛkaŋa la sa. 6 Ba nid yinne daa yɛl onɛ yɛ fupielig ka zi'e agɔla ka ku'om la bɛ teŋir la ye, ‘Li ye li nɔk saŋa wala ka yɛlnyalima bama naan maalɛ?’
7 “Dau kanɛ daa yɛ fupieligi zi'e ku'om la zug la daa ʋk o datiuŋ nɛ o dagɔbʋg nu'usi dʋ'ʋs agɔla kpa' arezana, ka m wʋm ka o pɔ nɛ Onɛ vʋe saŋa linɛ ka' bɛn la yɛt ye, ‘Li na an yʋma atan' nɛ pʋsʋk. Wina'am nidib la namisʋg la bɛn ya'a ti gaad, si'el wʋsa bɛn na paae.’
8 “M daa wʋm ka lɛɛ pʋ gban'e li gbinnɛ. Alazug m daa bu'os ye, ‘M zugdaana, nɛ'ɛŋa wʋsa ye li ti niŋ wala-wala?’
9 “O daa lɛbisim ye, ‘Daniel, kemi fʋ ken, bɔzugɔ pian'ad la su'anɛ gur saŋa la bɛnnɛ na ti paae. 10 Nidib bɛdegʋ na maali ba mɛŋ kasi vɛnl, ka gba'ar si'a lɛn kae. Amaa nimbɛ'ɛdnam la na kpɛn an nimbɛ'ɛdnam. Nimbɛ'ɛdnam la baa yinne kʋ gban'e si'el gbinnɛ, amaa banɛ mɔr ya'am la na gban'e li gbin.
11 “ ‘Lin pin'il saŋa kanɛ ka daar wʋsa maan la ye li gu'oe ka ba maal bʋnkisʋg linɛ san'amid si'el mɛkama zi'el la, li na nɔk dabisa tusir nɛ kɔbisyi' nɛ piswai (1,290).
12 “ ‘Albareka bɛ nɛ onɛ nyaŋi gu'us ka paae dabisa tusir nɛ kɔbistan' nɛ pistan' nɛ anu bɛn la (1,335).
13 “ ‘Ya'a kpɛlim nɛ fʋ, kemi fʋ ken hali ka li bɛn ti paae. Fʋ na kpi, ka dabisa la bɛn ya'a ti paae fʋ na vʋ'ʋgi di'e yɔɔd linɛ aan fʋ din la.’ ”