Israel dim mɔri faangid yinne ma'aa
43
1 Amaa nannanna, Zugsɔb la yɛl si'eli nwa,O Jakob yaas banɛ ka m maalɛ,
O Israel dim banɛ ka m ya'abɛ:
“Da zɔti dabiem ka manɛ faaɛn ya;
m buonnɛ ya nɛ ya yʋda yinne-yinne; ya anɛ man din.
2 Ya ya'a ken ku'omin m na bɛ nɛ ya,
ya ya'a lɔ'ɔŋid kɔldaad, ku'om la kʋ dii ya,
ya ya'a ken bugumin, bugum la kʋ dii ya;
bugum pielim la kʋ la'aŋi yaa.
3 Manɛ aan ya Zugsɔb, Israel dim Wina'am Onɛ An Kasi la,
ka manɛ aan ya Faangid;
M nɔk Egipt n tiaki ya yɔlisim yɛla
ka nɔk Kus dinɛ bɛ Nail kɔldaug zugin la
pɛ'ɛs Seba teŋ la zi'eli ya yɛla.
4 Yanamɛ an sʋm ka mɔr girima nɛ na'asi m tuon la zug,
nɛ mam mɛ nɔŋi ya la zug,
m na nɔk saalibi tiaki zi'eli ya yɛla,
ka nɔk nidibi tiaki ya nyɔvʋya zug.
5 Da zɔti dabiem, ka m bɛ nɛ ya;
M na mɔri ya biis banɛ bɛ ya-nya'aŋ la na
ka la'as banɛ bɛ ya-tuona la na.
6 M na yɛl banɛ bɛ ya-datiuŋ la ye, ‘Basimini ba!’
Ka yɛl banɛ bɛ ya-dagɔbʋg la ye, ‘Da vi'ini ba.’
Mɔrini m biribis banɛ bɛ lalli la na
nɛ m bipumis banɛ bɛ teŋ-magbinnin la na.
7 Banɛ an man mɛŋ nidib,
ka m maali ba ye m yʋ'ʋr nyɛ na'asi
ka ya'abi ba nɛ m mɛŋ-mɛŋ nu'ug.”
8 Gaadimi tuon ka banɛ mɔr nini ka pʋ nyɛt la,
nɛ banɛ mɔr tʋba ka pʋ wʋm la, dɔlli ya.
9 Tɛɛns la wʋsa la'as nɛ taaba
ka buudi wʋsa mɛ la'as.
Ba teŋgbana la na tun'e yɛl linɛ na niŋ bɛogɔ?
Bɛɛ ba nyaŋi nie linɛ maan nannanna la pa'alɛ?
Kɛl ka ba mɔri ba kasɛtib na
ka ba di kasɛt ye ba din dɔl suor,
ka banɛ kpɛlim la wʋm ka yɛl ye, “Li anɛ sida.”
10 Zugsɔb la yɛl ye, “Ya anɛ m kasɛtib
nɛ m tʋmtʋm banɛ ka m gaŋ,
ala ka ya na baŋ ka niŋim yadda
ka baŋ ye li anɛ manɛ la.
Win si'a kae da bɛ ka man nan kae
bɛɛ na ti bɛ man tuonnɛ.
11 Mam ma'aa an Zugsɔb la;
li ya'a ka' manɛ, faangid lɛn kae.
12 Manɛ nie pa'al linɛ na niŋ ka lɛn faaɛn ya;
li anɛ man ka ka' win si'a bɛɛ ya sʋʋginɛ tʋmmi lii.
Ya anɛ m kasɛtib.”
Zugsɔb la pian' li, ka yɛl ye,
“M anɛ Wina'am.
13 Ɛɛn, manɛ la, kʋdimin sa m da pʋn bɛ nɛ.
Sɔ' kʋ nyaŋi faaɛn ya m nu'uginɛ.
M ya'a duoe zi'enɛ, anɔ'ɔn na vi' m suorɛ?”
Wina'am nimbaanlig nɛ Israel sida ka'alim
14 Zugsɔb onɛ aan ya Faangid,
Israel dim Wina'am Onɛ An Kasi la, yɛl si'eli nwa:
“Yanam zug, m na tʋm Babilon
n gban'e teŋ la nidib wʋsa
niŋi ba anrimbanɛ ka ba mɔri nwɛ'ɛd nyɔ'ɔg la ni.
15 Manɛ an Zugsɔb, onɛ an Kasi tisi ya la,
Manɛ maal Israel, ka mɛ aan ya na'ab.”
16 Zugsɔb la yɛl si'eli nwa;
on onɛ maal suor atɛukʋn
ka maal suobugiri dɔl ku'otitada banɛ pʋbid nɛ paŋ la pɔɔgin la.
17 Onɛ da mɔr zabzabidib nɛ ba widi tɛrekonam la
keŋ san'ami ba nyain
ka ba digi ka kʋ nyaŋi duoe ya'asɛ.
Ba nwɛnɛ fitir laŋʋ ka ba kpiisi li bugum
ka li kʋ lɛn nyaŋi la'aŋɛ.
18 Tammi yɛlkʋda la;
da dɔl kʋdimin sa yɛlaa ka saŋkan gaadya nɛ li waad!
19 Gɔsima, m maannɛ bʋmpaal!
Nannanna li yit na, fʋ pʋ nyɛɛ lii?
M maannɛ suor sian'arin
ka kɛ ka ku'om pʋbid pipirisin.
20 Sian'arin bʋnkɔnbid na'asid mam,
la'am nɛ kunduna nɛ viid wʋsa;
bɔzugɔ manɛ kɛ ka ku'om tansi yi pipirigin na
ye nimbanɛ ka m gaŋ la nyɛ ku'om nu.
21 Nimban la ka m maal
ye ba pian'am m yʋ'ʋr.
22 “La'am nɛ wala Jakob, fʋ pʋ sɔsidi ma,
Israel, man yɛla pʋ mu'oe fʋ nifɔ.
23 Fʋ pʋ mɔr pɛ'ɛs na maal nyu'or maannɛ tisi ma,
bɛɛ na'asi m nɛ maana.
M pʋ mugusif ye fʋ maal zʋʋd maana,
ka mɛ pʋ kɛ ka fʋ gɛn nɛ bʋnnyubisa nyu'orɛ.
24 Fʋ pʋ da' bʋnnyubisa linɛ nyu'od la tisi ma,
bɛɛ fʋ piinim kɔnbbanɛ ka fʋ maan maana la kpaam.
Amaa fʋ kɛ ka m gɛn nɛ fʋ tʋʋmbɛ'ɛd,
ka mɛ kɛ ka li wʋmim nɛ fʋn pʋ di'edi m nɔɔr la zug.
25 La'am nɛ wala m mɛŋi mɔr suguru
piedi ya tʋʋmbɛ'ɛd la mam mɛŋ zug,
ka kʋ lɛn tiɛndi ya tʋʋmbɛ'ɛd la yɛlaa.
26 Tiɛnm linɛ gaad la yɛla,
kɛl ka ti la'asi zin'ini tu'asi li yɛla;
ka ya pa'alimi ya buudi zem si'em.
27 Ya yiiga yaanam la da tʋm tʋʋmbɛ'ɛd;
ka ya tuongatib la zan'asi m nɔɔr.
28 M na diisi ya pʋ'ʋsim dɔɔg tuongatib la nyan,
ka kɛ ka Jakob nyɛ san'auŋ,
ka kɛ ka Israel yʋ'ʋr san'am.”