Jese wil yɛla
11
1 Wil paal na bus Jese tiig la gbinnin na;o nya'a la ni ka wil na buli wal wala.
2 Zugsɔb Siig na bɛɛ o ni,
ka kɛ ka o na mɔr ya'am
ka mi' si'el wʋsa gbin,
ka mɔr paŋ nɛ sa'al sʋŋ siig,
ka na baŋ yɛla gbin, ka mɛ zɔt Zugsɔb la.
3 O na mɔr ya'amlɛog nɛ Zugsɔb la zɔtim.
O kʋ kad saria nɛ o nini nyɛ si'el
bɛɛ tu'as antu'a o tʋba wʋm si'el ma'aanɛ;
4 amaa o na kat nɔŋ dim saria nɛ pʋpielim,
ka maan tadimnam banɛ bɛ teŋgbauŋʋn nwa la yɛla nɛ sida.
O na nwɛ' teŋgbauŋ la nɛ balaar kanɛ bɛɛ o nɔɔrin la,
ka o nɔŋgban pɛbisim na kʋ bugusim dim.
5 Pʋpielim na aan o sɛnbidiŋ,
ka sida pien na lɔɔ o siaa.
6 Saŋkan la zaŋku'ar nɛ pɛbibis na la'am bɛ nɛ taaba,
ka wɛbaa na la'asi digi nɛ bʋʋg.
Na'abil nɛ gbigimbibis na la'asi ɔnbid yaama,
ka bibil na kemmi ba.
7 Na'anya'aŋ nɛ gbigim na la'asidi dit
ka ba biis na la'asi digi,
ka gbigim na ɔnbid mɔɔd wʋʋ naaf nɛ.
8 Bilia na di'emid dunduug vɔndʋg nɔɔrin,
ka bibil na nɔk o nu'ugʋ pa'al teŋkʋdʋgingbi'ug buugin.
9 Ba na bɛ zuokanɛ aan m mɛŋ din ka an kasi la ni,
ka kʋ pu'alim taaba bɛɛ san'am taaba baa bi'elaa.
Teŋgbauŋ wʋsa na pɛ'ɛl nɛ nimbanɛ mi' Zugsɔb la
wʋʋ ku'om pɛ'ɛl atɛuk si'em la.
10 Dabiskan la, nya'ar kanɛ yi Jese gbinnin na la,
na zi'e wʋʋ tuuta nɛ tis nidib la.
Buudi bɛdegʋ na la'asi dɔl o,
ka o vʋ'ʋsʋm zin'ig na mɔr girima.
11 Dabiskan la ya'a ti paae, Zugsɔb la na lɛm ba'aŋ o nu'ugʋ mɔr o nimbanɛ kpɛlim Asiria nɛ Egipt Teŋir nɛ banɛ bɛ Egipt Zugin la lɛbis na, nɛ banɛ bɛ Patros nɛ Kus, nɛ Elam nɛ Sinar, nɛ banɛ bɛ Hamat nɛ tɛɛns banɛ ka atɛuk giligi ba la.
12 O na ʋk tuuta pa'al tɛɛns la nidib
ka la'as Israel nimbanɛ ka ba gban'e ba mɔri keŋ la.
O na la'as Juda nimbanɛ widig la wʋsa,
nɛ o nimbanɛ bɛ dunia lʋga anaasi la.
13 Efiram fufum na bɔdig,
ka Juda dataadʋg kʋ lɛm bɛɛ.
Efiram kʋ lɛm mɔr fufum nɛ Juda
ka Juda mɛ kʋ lɛn zabid nɛ Efiram ya'asɛ.
14 Ba na sigi zab nɛ Filistia dim ya-tuona la baba.
Ka lɛn la'as taaba nyaŋ tɛɛns banɛ bɛ ya-nya'aŋ la,
ka faaɛn ba la'adi mɔri lɛb na.
Ba na nyaŋ Edom nɛ Moab dim wʋsa
ka Ammon dim na siaki ba nɔɔr.
15 Zugsɔb la na kɛ ka atɛuk kanɛ bɛ Egipt nɔɔrin la kʋdig wʋsa
ka na ʋk o nu'ugʋ kɛ ka pɛbistʋʋlʋg kpɛn' Efiritis kɔldaug la.
O na buaki li ka li lieb kɔldabibis ayɔpɔi
ka nidib na nyaŋi pid ta'ada lɔ'ɔŋ.
16 Suoraug na bɛ tis o nimbanɛ kpɛlim Asiria la,
nwɛnɛ Israel dim la da yi Egipt saŋsi'a la.