Zun'or yʋʋm
135
1 Zun'omi Zugsɔb la, haleluya!Zun'omi Zugsɔb la yʋ'ʋr;
zun'omi nɛ o, yanam banɛ an Zugsɔb tʋmtʋmnib la.
2 Yanam banɛ tʋm Zugsɔb pʋ'ʋsim Yin la,
yanam banɛ tʋmi ti Wina'am Yir zakin la.
3 Zun'omi Zugsɔb la, ka Zugsɔb la an sʋm;
yʋ'ʋm zun'e nɛ o yʋ'ʋr la, ka linɛ malis.
4 Zugsɔb la gaŋ Jakob ka o an o mɛŋ din,
Israel dimi an o nyɔɔrin kɔnbʋg.
5 M mi' ye Zugsɔb la zu'oya,
ti Wina'am la zu'oe gat wina wʋsa.
6 Zugsɔb la maannɛ linɛ wʋsa malis o,
agɔla nɛ teŋin, atɛukʋn nɛ zin'ibanɛ zulim la wʋsa.
7 O kɛt ka saŋgbana yit teŋiri dʋtna;
onɛ tisid saa nɛ sa-ian'asʋg
ka yisid sisi'em la o suak zin'igin na.
8 Onɛ da kʋ Egipt bikpɛɛmnam,
nɛ ba bʋnkɔnbid bikpɛɛmnam la wʋsa.
9 O da tʋm o zanbina nɛ nyalima Egipt teŋin,
zabid Na'ab Faaro nɛ o tʋmtʋmnib la wʋsa.
10 O san'am tɛɛns bɛdegʋ
ka kʋ na'atitada.
11 O kʋ Sihon onɛ an Amor dim na'ab la,
nɛ Og onɛ an Basan na'ab
nɛ Keenan na'anam la wʋsa.
12 O da nɔki ba teŋ la tis o nidib ka ba sʋ'oe li,
ka li lieb faari tis o nidib Israel dim la.
13 Zugsɔba, fʋ yʋ'ʋr la bɛ nɛ saŋa wʋsa,
O Zugsɔba, fʋ anɛ yʋ'ʋr daan zʋmaana wʋsa ni.
14 Zugsɔb la na tis o nidib la bʋʋd
ka zɔɔ o tʋmtʋmnib la nimbaanlig.
15 Teŋ sieba bada anɛ anzurifa nɛ sanlima,
ka nidib maali ba nɛ ba nu'us.
16 Ba mɔr nɔya, amaa ka kʋ nyaŋi pian',
ba mɔr nini ka pʋ nyɛta;
17 ba mɔr tʋba amaa ka pʋ wʋmma,
ka vʋ'ʋsʋm kae ba nɔɔrinɛ.
18 Banɛ maali ba la na nwɛnɛ ba nɛ,
ban nɛ banɛ niŋi ba yadda la wʋsa.
19 Israel dima, zun'omi Zugsɔb la;
Aaron yidima, zun'omi Zugsɔb la;
20 Levi yidima, zun'omi Zugsɔb la;
yanam banɛ zɔt Zugsɔb la, zun'omin o.
21 Zun'or yitnɛ Zion Zuorin la na tisid Zugsɔb la,
li tisid on kanɛ bɛ Jerusalem la.
Zun'omi Zugsɔb la, haleluya!