Zugsɔb la zi'ela nɛ o wada galis si'em
119
1 Wina'am bareka bɛ nɛ banɛ ka' gba'arɛ,ka dɔl Zugsɔb wada sʋ'ʋŋa la.
2 Wina'am bareka bɛ nɛ banɛ dɔl o nɔzi'ela la
ka ieed o nɛ ba sʋʋnr wʋsa la.
3 Ba pʋ tʋm linɛ an bɛ'ɛdɛ
amaa ka dɔlisid o suoya la.
4 Fʋ digili fʋ wada
ye ti siaki ba wʋsa.
5 Man bɔɔdin si'el anɛ m zi'e kiŋ-kiŋ
ka nyaŋi dɔl fʋn gban'e si'el la!
6 M ya'a tɛn'ɛsidi fʋ nɔzi'ela la yɛla
man kʋ di nyannɛ.
7 Man zamisi fʋ pʋpielim wada la
m na dʋ'ʋsi fʋ yʋ'ʋr nɛ pʋʋg nyain.
8 Da tami m yɛla nyainnɛ;
ka m na siak fʋn gban'e si'el la.
9 Na'akim nɛ pu'asada na niŋ wala
kɛ ka ba bɛllim dɔl suorɛ?
Li anɛ ban na bɛ nwɛnɛ fʋ pian'ʋk la yɛl si'em la.
10 M ieedif nɛ m sʋʋnr wʋsa;
da kɛ ka m yidigi fʋ nɔɔr zi'elʋgɔ.
11 M na su'a fʋ pian'ʋk la m sʋnfʋn
ka li kɛ ka m da tʋm tʋʋmbɛ'ɛdi pɔ'ɔgi fɔ.
12 Zun'or anɛ fʋ din, Zugsɔbaa;
pa'alimi fʋ gban'ar la.
13 M na ya'a m nɔɔri mɔɔli fʋ wada la yɛla,
wada banɛ yii fʋ san'an na la wʋsa.
14 Li malisim nɛ man na dɔlli fʋ nɔɔr
wʋʋ sɔ' na mɔr kpan'am ka li malis o si'em la.
15 M na tɛn'ɛsi fʋ wada la yɛla
ka kpansi fʋ suoya la wʋsa.
16 M mɔr ya'amlɛog nɛ fʋ nɔzi'ela la;
ka kʋ tami fʋ pian'ʋk laa.
17 Maalimi fʋ tʋmtʋm la sʋ'ʋŋa,
ka m na kpɛn vʋe ka siaki fʋ nɔɔr.
18 Yɔ'ɔgimi m nini ka m nyɛ
bʋnnyalima fʋ wada la ni.
19 M anɛ saan dunia nwa ni;
da su'ami fʋ nɔzi'ela la.
20 Fʋ wada la ya'amlɛogʋ kʋʋdim
ka m bɔɔd ye m baŋi li saŋa wʋsa.
21 Fʋ zɛrigid tita'alnam banɛ ka nɔpɔɔr bɛɛ ba zugin la
nɛ banɛ fɛndig ka basi fʋ nɔzi'elʋg la.
22 Yisim nɛ'ɛsʋg nɛ tʋ'ʋdi m san'an,
ka m dɔlli fʋ wada la.
23 La'am nɛ na'anamɛ la'asi zin' san'amidi m yʋ'ʋr la,
m anɛ fʋ tʋmtʋm
ka na tɛn'ɛsid fʋn gban'e si'em la yɛla.
24 Fʋ wada la ka m ya'am bɔɔd;
li anɛ linɛ sa'annim.
25 M tadignɛ dig teŋin;
gu'umi m nyɔvʋr wʋʋ fʋn pian' zi'el si'em la.
26 M pie m pʋʋgʋ yɛlif man tʋm si'el wʋsa ka fʋ siaki m sɔsʋg;
pa'alimi fʋ gban'ar la.
27 Kɛl ka m baŋi fʋ wada la pa'an si'el;
ala ka m na tɛn'ɛsidi fʋ nyalima la yɛla.
28 M gɛnnɛ nɛ sʋnsa'aŋ;
tɛndigimim wʋʋ fʋ nɔɔr zi'elʋgʋ an si'em la.
29 Yisimim ziri suoya ni;
ka sʋŋim nɛ fʋ wada la.
30 Man gaŋnɛ yɛlsida suor;
ka niŋi fʋ wada la m pʋtɛn'ɛrin.
31 M dɔlli fʋ wada la sʋ'ʋŋa, Zugsɔbaa;
da kɛ ka m di nyannɛ.
32 M zɔtnɛ dɔlli fʋ zi'ela suoya,
bɔzugɔ fʋnɛ tisim yɔlisim.
33 Pa'alimim, O Zugsɔba, ka m dɔlli fʋ gban'ar la;
ala ka m na dɔlisi paae li bɛn.
34 Sʋŋimim ka m gban'e fʋ wada la gbin
ka siaki li nɛ m sʋnf wʋsa.
35 Pa'alimi fʋ nɔzi'elʋg la suoya,
ka ani ka m ya'am kpɛn'.
36 Fɛndigimi m pʋtɛn'ɛre lɛbisi fʋ wada la ni
ka da kɛ ka m tɛn'ɛsidi m mɛŋ yɛla ma'aanɛ.
37 Da kɛ ka m nini gɔsid linɛ ka' gbinnɛ;
ka guri m nyɔvʋr wʋʋ fʋn zi'el nɔɔr si'em la.
38 Fʋn da kaanbi tisi fʋ tʋmtʋm la,
kɛl ka li niŋ amɛŋa tisim ka m na zɔtif
39 Yisimim nyan linɛ ka m zɔt la pʋʋgin,
bɔzugɔ fʋ wada la an sʋ'ʋŋa.
40 M nɔŋi fʋ pa'ala la hali!
Guri m nyɔvʋr nɛ fʋ pʋpielim la.
41 O Zugsɔba, kɛl ka fʋ nɔŋilim linɛ ka' naar la kɛɛn m san'an na,
nɛ fʋ faangir la wʋʋ fʋn kaanb si'em la;
42 ala ka m na nyɛ pian'ʋkʋ lɛbis banɛ tʋ'ʋdim la,
bɔzugɔ m tisi fʋ nɔɔr yɛlʋg la sida.
43 Da yis yɛlsida pian'adi m nɔɔrinɛ,
ka m nɔki m ti'iri niŋnɛ fʋ wada la ni.
44 M na siakidi fʋ wada la,
saŋa linɛ ka' bɛnnɛ.
45 M na ken nɛ yɔlisim,
man ieedi fʋ pa'alʋg la zug.
46 M na mɔɔli fʋ wada la tis na'anam
ka kʋ zɔ nyannɛ,
47 bɔzugɔ m ya'amlɛog bɛɛ fʋ zi'ela la ni
man nɔŋi ba la zug.
48 M ʋki m nu'usi na'asi fʋ zi'ela linɛ ka m nɔŋ la,
ka tɛn'ɛsidi fʋ wada la yɛla.
49 Tiɛnmi fʋ pian'ʋk linɛ ka fʋ tisim la,
bɔzugɔ fʋnɛ tisim ti'ir.
50 Sumbʋgʋsʋm linɛ ka m mɔri m namisʋg la pʋʋgin anɛ
fʋ kaanbʋg linɛ tisidim vʋm la.
51 Tita'alnam la tʋ'ʋdim nɛ ka pʋ gu'usida,
amaa m pʋ fɛndig ka basi fʋ wada la.
52 Zugsɔba, m tɛnri fʋ wada linɛ da bɛ kʋdimin sa la,
ka nyɛ ka li bʋgʋnnɛ m sʋʋnr.
53 M sʋʋnr ɛɛnti duoe nɛ bugusnam,
banɛ zan'asidi fʋ wada la.
54 Man bɛ zin'isi'a wʋsa,
fʋ zi'ela la aan m yʋʋma.
55 O Zugsɔba, m tɛnri fʋ yʋ'ʋr la yʋ'ʋŋ,
ka na dɔlisidi fʋ wada la.
56 Man ɛɛnti tʋm si'em nwa:
m siakidi fʋ wada la.
57 Fʋn ka m gaŋ, Zugsɔbaa;
m yɛl nɔɔrɛ zi'el ye m na siaki fʋ nɔɔr yɛlʋg la.
58 M ieedif nɛ m sʋʋnr wʋsa;
maalimim sʋ'ʋŋa wʋʋ fʋn kaanb si'em la.
59 M tɛn'ɛsi m suoya la an si'em
ka fɛndigi lɛbi fʋ wada la ni.
60 M na niŋ tɔ'ɔtɔ ka kʋ yuugɛ
m siaki fʋ zi'elʋg la.
61 La'am nɛ bugusnam la lɔɔdim nɛ nwiis la,
m kʋ tami fʋ wada laa.
62 Yʋ'ʋŋ tisʋʋs ka m duoe pʋ'ʋsif bareka
fʋ sida nɛ pʋpielim la zug.
63 Banɛ zɔtif la wʋsa anɛ man zuanam,
nɛ banɛ wʋsa dɔlisidi fʋ pa'alʋg la.
64 Teŋgbauŋ la pɛ'ɛl nɛ fʋ nɔŋilim, Zugsɔba;
pa'alimim fʋ nɔzi'ela la.
65 O Zugsɔba, niŋim man onɛ aan fʋ tʋmtʋm la sʋ'ʋŋa
nwɛnɛ fʋn zi'el si'em la.
66 Pa'alimim baŋir nɛ ya'am kanɛ bakid sʋm nɛ bɛ'ɛd,
ka m niŋi fʋ zi'elʋg la yadda.
67 M daa yidig nɛ ka namisʋg naan paam,
amaa nannanna m siaki fʋ nɔɔr.
68 Fʋ an sʋm, ka fʋ tʋʋma mɛ an sʋm;
pa'alimim fʋ gban'ar la.
69 La'am nɛ tita'alnam la ma' ziri tisim la,
m dɔlli fʋ pa'ala la nɛ m sʋʋnr wʋsa.
70 Ba ba'a kae nɛ lin na wʋm sɔ',
amaa man ya'am bɔɔdi fʋ wada la.
71 Li an sʋm nɛ man daa nyɛ namisʋg la
bɔzugɔ li na kɛ ka m zamisi fʋ nɔzi'ela la.
72 Wada linɛ yiti fʋ nɔɔrin na la anɛ bʋnsʋŋ hali tisim,
li gaad sanlima nɛ anzurifa gbila tusa-tusa.
73 Fʋ nu'usi ya'abim ka maalim;
tisimim ya'am ka m zamisi fʋ nɔzi'elʋg la.
74 Kɛl ka banɛ zɔtif la ya'a nyɛɛm bam mɔr sumalisim,
ka fʋ pian'ʋk la ni ka m ti'ir bɛ.
75 Zugsɔba, m mi' ye fʋ wada la anɛ linɛ dɔl suor,
fʋ sida zug ka fʋ namisim.
76 Kɛl ka fʋ nɔŋilim linɛ pʋ naad la bʋgʋli m sʋʋnr,
wʋʋ fʋn kaanb si'em tisim la,
ka m anɛ fʋ tʋmtʋm.
77 Zɔmim nimbaanlig ka tisim vʋm,
ka fʋ wada la ka m ya'am bɔɔd.
78 Kɛl ka tita'alnam la di nyan
ban tʋmim bɛ'ɛd ka li pʋ dɔl suor la zug;
amaa man na tɛn'ɛsidi fʋ nɔzi'ela la yɛla.
79 Kɛl ka banɛ zɔtif ka gban'e fʋ wada la gbin la
fɛndigi lɛbi m san'an na.
80 Kɛl ka m dɔlli fʋ zi'ela la nɛ pʋʋg nyain,
ka li kɛ ka m da di nyannɛ.
81 Fʋ faangir la ya'amlɛogʋ kʋʋdim,
amaa m nɔki m ti'iri niŋi fʋ pian'ʋk la ni.
82 M wiisi fʋ kaanbʋg la gʋ'ʋŋ, ka yɛl ye,
“Bʋndaar ka fʋ na bʋgʋli m sʋʋnrɛ?”
83 La'am nɛ man nwɛnɛ waa ya'ae nyɔ'ɔsin la,
m pʋ tam fʋ zi'ela laa.
84 Fʋ bɔɔd ye m gu'usi paae wala bɛnnɛ?
Bʋndaar ka fʋ na namis banɛ namisidim la?
85 Tita'alnam la tuudi bʋmbu'adi bɔɔd ye m li,
ka li pʋ dɔlli fʋ wada laa.
86 Fʋ zi'ela la wʋsa anɛ linɛ mɔr sida;
sʋŋimim, ka nidib namisidim zaalim-zaalim.
87 Ba bɔɔdim nɛ kʋʋb,
amaa m pʋ tami fʋ pa'alʋg laa.
88 Fʋ nɔŋilim la zugɔ guri m nyɔvʋr,
ka m na siaki fʋ nɔzi'elʋg la.
89 O Zugsɔba, fʋ labaar la bɛ nɛ saŋa wʋsa;
li zi'enɛ kiŋ-kiŋ arezana ni.
90 Fʋ yɛlsida la dɔlisidi paad zʋmaana wʋsa;
fʋ maal teŋ la ka li zi'e kiŋ-kiŋ.
91 Fʋ wada la bɛ nɛ ala hali ti paae zina,
bɔzugɔ si'el wʋsa tʋmnɛ tisidif.
92 Fʋ wada la ya'a ka'an linɛ ka m bɔɔda,
m naan kpiin nɛ namisʋg.
93 M kʋ tami fʋ pa'alʋg laa,
bɔzugɔ linzug ka fʋ tisidim vʋm.
94 Faanmim ka m anɛ fʋ din;
m siaki fʋ wada la.
95 Bugusim dim la guri bɔɔd ye ba kʋʋm,
amaa m na tɛn'ɛsidi fʋ zi'ela la yɛla.
96 Linɛ wʋsa an sʋm mɔri li sʋm bɛn,
amaa fʋ zi'ela la pʋ mɔr bɛnnɛ.
97 M nɔŋi fʋ wada la hali!
M tɛn'ɛsidi li yɛla daar wʋsa.
98 Fʋ nɔzi'ela la kɛ ka m mɔr ya'am gati m dataas,
bɔzugɔ li bɛɛ m san'an saŋa wʋsa.
99 M gban'e li gbinni gaad banɛ pa'annim la,
bɔzugɔ m tɛn'ɛsidi fʋ zi'ela la yɛla.
100 M gban'e li gbinni gaad kpɛɛmnam la,
bɔzugɔ m siaki fʋ pa'alʋg la.
101 M gban'am mɛŋ ka pʋ dɔl tʋʋmbɛ'ɛd suor
ye li kɛ ka m siaki fʋ pian'ad la.
102 M pʋ bie ka basi fʋ wada la,
bɔzugɔ fʋ mɛŋi pa'alim.
103 Fʋ pian'ad la malisim hali,
li malisi gaad siindi na bɛɛ m nɔɔrin!
104 Fʋ pa'alʋg la kɛt ka m gban'ad yɛla gbin;
dinzug ka m kis suobɛ'ɛd wʋsa.
105 Fʋ pian'ʋk la anɛ fitiri tisim nɔba,
nɛ nɛɛsim pa'annim suor.
106 M digil nɔɔr ka mɛ siak ye,
m na dɔlli fʋ pʋpielim zi'elʋg la.
107 M namis ya hali, Zugsɔbaa,
guri m nyɔvʋr, wʋʋ fʋ pian'ʋkʋ yɛl si'em la.
108 Zugsɔba, di'emi m bareka pʋ'ʋsim,
ka pa'alimi fʋ zi'elʋg la.
109 La'am nɛ man mɔri m vʋm di'em la,
m kʋ tami fʋ wada laa.
110 Bugusim dim la bɛndim nɛ baans,
amaa m pʋ yidigi fʋ zamisʋg laa.
111 Fʋ wada la aan m faar saŋa wʋsa;
li anɛ linɛ tisidim sumalisim.
112 M sʋnf gban'anɛ ye m dɔlli fʋ gban'ar wʋsa
hali ti paae li bɛn.
113 Man kis banɛ mɔr pʋtɛnda ayi' yi la,
Amaa m nɔŋi fʋ wada la.
114 Fʋ anɛ m suak zin'ig nɛ m gbanti'edʋg
m nɔki m ti'iri niŋi fʋ pian'ʋk la ni.
115 Tɔɔmini m san'an, yanam tʋʋmbɛ'ɛd dima!
Ka m dɔlisi m Wina'am zi'ela la.
116 Kpɛmisimim wʋʋ fʋn kaanb si'em la, ka m na vʋe;
da kɛ ka m ti'ir gaadɛ.
117 Sʋŋimim ka m na nyɛ faangir,
ka kɛlisidi fʋ gban'ar la saŋa wʋsa.
118 Fʋ zan'asid banɛ wʋsa zan'as fʋn gban'e si'el la,
bɔzugɔ ba ya'am bɛ'ɛd la naadi zaalim.
119 Bugusim dim banɛ bɛ teŋgbauŋ zug la,
fʋ vaae ba bas wʋʋ sa'ad;
amaa man nɔŋi fʋ wada la.
120 Man zɔtif la zug ka m niŋgbina kirid,
ka fʋ wada la kɛ ka m zi'e nɛ pakir.
121 M tʋm linɛ an pʋpielim nɛ sida;
da basimi tis banɛ mugusidim laa.
122 Gur man kanɛ an fʋ tʋmtʋm la sʋ'ʋŋa;
da kɛ ka tita'alnam la mugusi ma.
123 Man ieenɛ fʋ faangir la nɛ fʋ pʋpielim kaanbʋg la
hali ka m nini ti sɔb.
124 Dɔl man kanɛ aan fʋ tʋmtʋm la nɛ nɔŋilim
ka pa'alimi fʋ gban'ar la.
125 M anɛ fʋ tʋmtʋm;
tisim ya'am ka m gban'ad si'el gbin sʋ'ʋŋa
ka nyaŋi gban'e fʋ wada la gbin.
126 Zugsɔba, li paae saŋkanɛ ka fʋ na maal si'el;
bɔzugɔ nidib san'ami fʋ wada la nɛ.
127 Man nɔŋi fʋ nɔzi'ela la gaad sanlima,
m nɔŋi li hali gaad sanlim sʋŋ.
128 Dinzugɔ man siaki fʋ zamisʋg la ye li an sʋm,
m kis suobɛ'ɛd wʋsa.
129 Fʋ pa'alʋg la anɛ nyalima;
dinzug ka m siakidi li la.
130 Fʋ niedi fʋ yɛlʋg la pa'an nidib ka li tisidi ba nɛɛsim;
li tisid zi'ilim dim la ya'am.
131 Fʋ nɔzi'ela la ku'onuudi mɔri m
ka m vʋ'ʋsidi pʋ paada ka ya'ae nɔɔr.
132 Fɛndigimi m san'an na ka zɔɔm nimbaanlig,
wʋʋ fʋn niŋid si'em saŋa wʋsa nɛ banɛ nɔŋi fʋ yʋ'ʋr la.
133 Guri m nɔba yakir wʋʋ fʋ pian'ad la yɛl si'em la;
da kɛ ka tʋʋmbɛ'ɛd sʋ'ʋgi ma.
134 Faanmim nidib mugusʋg pʋʋgin,
ka ala ka m na nyaŋi siaki fʋ wada la.
135 Kɛl ka fʋ nindaa nie man kanɛ aan fʋ tʋmtʋm la ni
ka pa'alim fʋn gban'e si'em la.
136 Man ninta'am yuodnɛ bɔra-bɔra
ka li anɛ banɛ pʋ siaki fʋ wada la zug.
137 O Zugsɔba, fʋ anɛ pʋpiel,
ka fʋ wada la dɔl suor.
138 Zi'ela banɛ ka fʋ tis la anɛ pʋpielim suoya
ka an sida hali.
139 M sʋʋnr pɛlignɛ hali ka li zabidim,
bɔzugɔ m dataasi zan'asi fʋ pian'ad la zug.
140 Ba maki fʋ kaanbʋg la gɔs ka li an sʋ'ʋŋa,
lin ka man kanɛ aan fʋ tʋmtʋm la nɔŋi li la.
141 La'am nɛ nidibi gɔsidi pʋ nyɛti ma ka nɛ'ɛsidim la,
m pʋ tami fʋ pa'alʋg laa.
142 Fʋ pʋpielim la bɛ nɛ saŋa wʋsa
ka fʋ wada la an sida.
143 Yɛla nɛ sʋnsa'aŋ sigi m zug na,
amaa fʋ zi'ela la bʋgʋnnɛ m sʋʋnr.
144 Fʋ pa'alʋg la dɔl suor saŋa wʋsa;
sʋŋim ka m gban'e li gbin ka li na tisim vʋm.
145 M buonif nɛ m sʋnf wʋsa
Zugsɔbaa, siakim tisim
ka m na siaki fʋ zi'ela la.
146 Fʋn ka m buon; faanmim
ka m na dɔlli fʋ wada la.
147 M duod ka bɛog nam pʋ nie kaasidi bɔɔd sʋŋir;
m nɔki m ti'iri niŋnɛ fʋ pian'ad la ni.
148 Yʋ'ʋŋ wʋsa m pʋ gbisidaa
m tɛn'ɛsidi fʋ kaanbʋg la yɛla.
149 Wʋmmi m wʋʋ fʋ nɔŋilim an si'em la;
guri m nyɔvʋr, O m Zugsɔba, wʋʋ fʋ wada la an si'em la.
150 Banɛ gban'ad suobɛ'ɛdnam la bɛ yammin,
amaa ba lal nɛ fʋ wada la dɔllim.
151 La'am nɛ ala fʋ bɛ yammin, Zugsɔba,
ka fʋ nɔzi'ela la wʋsa mɛ an sida.
152 M zamisi fʋ pa'alʋg la ka li yuug,
fʋ maali li nɛ ye li bɛ saŋa wʋsa.
153 Gɔsimi m namisʋg la ka faanm,
ka m pʋ tami fʋ wada laa.
154 Kpɛn'ɛmi m zug ka faanm;
ka guri m nyɔvʋr wʋʋ fʋn kaanb si'em la.
155 Bugusim dim la lal nɛ faangir,
ban pʋ ieedi fʋ nɔzi'ela la zug.
156 Zugsɔba, fʋ nimbaanlzɔɔr galis ya;
guri m nyɔvʋr wʋʋ fʋ wada la yɛl si'em la.
157 Bi'emnam nɛ banɛ namisidim zu'oya,
amaa m pʋ fɛndig ka basi fʋ zi'ela laa.
158 Man ɛɛnti gɔsi nyɛ banɛ pʋ niŋif yadda la,
li duodi m sʋʋnr
ban pʋ siakidi fʋ pian'ad la zug.
159 Gɔsim man nɔŋi fʋ pa'alʋg la si'em;
guri m nyɔvʋr, Zugsɔba, wʋʋ fʋ nɔŋilim an si'em la.
160 Fʋ pian'ad wʋsa anɛ sida;
fʋ pʋpielim zi'ela la wʋsa pʋ mɔr bɛnnɛ.
161 Banɛ mɔr kpi'euŋ la namisidim nɛ zaalim-zaalim
amaa mam sʋnfʋn dabiem mɔrim nɛ fʋ pian'ad la.
162 M mɔr sumalisim nɛ fʋ kaanbʋg la yɛla
wʋʋ sɔ' na nyaŋi faaɛn la'ad zaba ni lɛb.
163 M kis linɛ an ziri ka pʋ bɔɔdi lii,
amaa m nɔŋi fʋ wada la.
164 Daar wʋsa m zun'odif nɛ nɔɔr ayɔpɔi
fʋ pʋpielim wada la zug.
165 Banɛ nɔŋi fʋ wada la mɔr sumbʋgʋsʋm ka li zu'oe,
ka si'el kae na kɛ ka ba tu'ugi lii.
166 Zugsɔba, m gu'usidi fʋ faangir la,
ka dɔlli fʋ zi'ela la.
167 M siakidi fʋ zi'ela la,
man nɔŋi li bɛdegʋ la zug.
168 M siakidi fʋ pa'alʋg nɛ fʋn tis nɔɔr si'em la,
bɔzugɔ fʋ mi' m suoya wʋsa.
169 O m Zugsɔba, kɛl ka m kaasig paae fʋ san'an na;
ka kɛ ka m gban'adi fʋ pian'ad la gbin.
170 Kɛl ka m winsɔsʋg paae fʋ san'an;
faanmim wʋʋ fʋn kaanb si'em la.
171 Kɛl ka m nɔɔr na pɛ'ɛl nɛ fʋ zun'or ma'aa,
fʋn pa'animi fʋ wada la zug.
172 Kɛl ka m zilim na yʋ'ʋmmi fʋ pian'ad la yɛla,
bɔzugɔ fʋ zi'ela la wʋsa anɛ linɛ nar.
173 Kɛl ka fʋ nu'ug tiel na sʋŋim,
man gaŋi fʋ pa'alʋg la zug.
174 Zugsɔba, fʋ faangir la ya'amlɛogʋ kʋʋdi m,
ka m ya'am kpɛn' fʋ wada la hali.
175 Kɛl ka m vʋe ka dʋ'ʋsi fʋ yʋ'ʋr,
ka kɛ ka fʋ wada la kpɛmisimim.
176 M bɛllim la nwɛnɛ pɛ'og kanɛ bɔdignɛ,
ieem man kanɛ aan fʋ tʋmtʋm la
ka m pʋ tami fʋ nɔzi'ela laa.