Bareka pʋ'ʋsʋg Zugsɔb la tis nyaŋir la zug
118
1 Pʋ'ʋsimi Zugsɔb la bareka on an sʋm la zug;o nɔŋilim la bɛ nɛ saŋa linɛ ka' bɛnnɛ.
2 Kɛl ka Israel dim yɛl ye,
“O nɔŋilim la bɛ nɛ saŋa linɛ ka' bɛnnɛ.”
3 Kɛl ka Aaron yidim la yɛl ye,
“O nɔŋilim la bɛ nɛ saŋa linɛ ka' bɛnnɛ.”
4 Kɛl ka banɛ zɔt Zugsɔb la yɛl ye,
“O nɔŋilim la bɛ nɛ saŋa linɛ ka' bɛnnɛ.”
5 M sʋnsa'aŋ pʋʋgin m daa kaasi tis Zugsɔb la,
ka o wʋm ka tisim yɔlisim.
6 Zugsɔb la bɛɛ m san'an, m kʋ zɔt dabiem.
Ninsaal na nyaŋi niŋim bɔ?
7 Zugsɔb la bɛ nɛ m; onɛ aan m sʋŋid.
M na nyaŋi m dataas la wʋsa.
8 Fʋ ya'a su'a fʋ mɛŋ Zugsɔb la san'an
sɔn'oe fʋn na nɔki fʋ ti'iri niŋ ninsaal ni.
9 Fʋ ya'a su'a fʋ mɛŋ Zugsɔb la san'an
sɔn'oe fʋn na nɔki fʋ ti'iri niŋ kpi'emnam san'an.
10 Tɛɛns la wʋsa nidib daa la'asi giligim,
amaa ka m nyaŋi ba nɛ Zugsɔb la yʋ'ʋr.
11 Ba giligim nɛ zin'ig wʋsa,
amaa ka m nyaŋi ba nɛ Zugsɔb la yʋ'ʋr.
12 Ba giligim nɛ wʋʋ siins,
amaa ka kpi tɔ'ɔtɔ wʋʋ gɔn'ɔs bugum kpiigid si'em la;
m nyaŋi ba nɛ Zugsɔb la yʋ'ʋr.
13 Ba daa da'am nɛ lɛbis nya'aŋ ka m bɔɔd liig,
amaa ka Zugsɔb la sʋŋim.
14 Zugsɔb la an mam paŋ,
onɛ aan m yʋʋm,
onɛ liebi m faangid.
15 Wʋmmi nyaŋir yʋʋma
naan pʋpielim dim sʋga nii yit na si'em;
Zugsɔb la mɔr paŋi tʋm tʋʋm titada!
16 Ba dʋ'ʋs Zugsɔb la paŋ agɔla;
Zugsɔb la paŋ tʋm tʋʋm titada!
17 M kʋ kpii, amaa m na vʋe
ka mɔɔl Zugsɔb la maal si'eli tisim.
18 Zugsɔb la tɛki m tʋbir hali sʋ'ʋŋa,
amaa o pʋ kɛ ka m kpii.
19 Yɔ'ɔgim pʋpielim dim za'anɔya la tisim,
ka m kpɛn' tis Zugsɔb la bareka pʋ'ʋsim.
20 Zugsɔb la za'anɔɔri nwa,
ani ka pʋpielim dim na kpɛn'ɛd.
21 Zugsɔba, m na pʋ'ʋsif bareka
bɔzugɔ fʋ wʋmi m sɔsʋg ka liebi m faangid.
22 Tampigkanɛ ka tanmɛɛdib daa nɛ'ɛs la
lieb lɔdigin tampigir;
23 Nwa' anɛ Zugsɔb la niŋi li,
ka ti nyɛ ka li an nyalima ti nini ni.
24 Zugsɔb la maal dabiskaŋa,
kɛlli ka ti maal sumalisim li ni.
25 O Zugsɔba, faanmi ti;
Zugsɔba, kɛl ka ti di ya'an.
26 Yɛlsʋm bɛ nɛ onɛ kenna
nɛ Zugsɔb la yʋ'ʋr zug;
ti bɛ nɛ Zugsɔb la Yin
ka kaanbid bareka niŋidi ya.
27 Zugsɔb la an Wina'am,
o kɛ ka o nɛɛsim nie tisi ti.
Zanli tiis wila ya nu'usin
ka yʋ'ʋm wa'a gilig malʋŋ daka la.
28 Fʋ anɛ m Wina'am, ka m na tisif bareka pʋ'ʋsim;
fʋ anɛ m Wina'am, ka m na dʋ'ʋsi fʋ yʋ'ʋr.
29 Pʋ'ʋsimi Zugsɔb la bareka on an sʋm la zug;
o nɔŋilim la bɛ nɛ saŋa linɛ ka' bɛnnɛ.