Jetro kaae Moses la yɛla
18
1 Jetro onɛ an Midian maanmaan ka an Moses diem la da wʋm Wina'am maal si'em tis Moses nɛ o nidib Israel dim la, hali nɛ on mɔri ba yi Egipt si'em na. 2-3 Moses da kɛ ka o pu'a Zippora nɛ o biis lɛbi o diem Jetro san'an ka o di'e ba. O bikpɛɛm la yʋ'ʋri da buon Gersom,a bɔzugɔ Moses yɛl ye o da du'a biig la ka anɛ saan teŋzʋŋin. 4 Ka ban da du'a biribiŋ onɛ paas ayi' sɔb la, Moses da pʋd o yʋ'ʋr ye Elieza,b bɔzugɔ o yɛl ye, “M yaanam Wina'am la an mam sʋŋid; o daa faaɛn mam ka Na'ab Faaro pʋ kʋʋ ma.” 5 Ka Jetro kena ye o gɔs Moses ka mɔr Moses pu'a nɛ o biis ayi' la na. Ba da paae na ka Moses nɛ o nidib la bɛ nɛ Wina'am zuorin. 6 Ka ba yɛl Moses ye, “Fʋ diem Jetro kena ye o gɔsif, ka dɔlli fʋ pu'a nɛ fʋ biis ayi' la na.” 7 Ka Moses yii keŋi tʋ'ʋs o diem la igin nɛ girima pʋ'ʋs o tʋʋliga. Ka ba bu'os taaba laafi yɛla ka kpɛn' Moses fuug sʋgʋrin ye ba sɔns. 8 Ka Moses yɛl o diem la Zugsɔb la tʋm si'el wʋsa, hali ka faaɛn Israel dimi yi Faaro onɛ an Egipt na'ab la ni si'em. O da lɛn yɛl o yɛlbanɛ paae ba suor zug la wʋsa ka Zugsɔb nyaŋi yisi ba yɛlban la ni. 9 Li da malis Jetro hali nɛ on wʋm Zugsɔb la tʋm si'eli tis Israel dim ka mɔri ba yis Egipt na la.10 Ka Jetro ye, “Ti pʋ'ʋs Zugsɔb bareka, on faaɛn fʋn nɛ nidib la yis Egipt dim nɛ Faaro nu'usin la. 11 Mam yʋ'ʋn baŋ ye Zugsɔb la mɔr paŋi gat wina wʋsa, bɔzugɔ o nyaŋi yis o nidib Egipt dim banɛ an nyɛɛsim dim la nu'usin.” 12 Ka Jetro da nɔk bʋnkɔnbʋgʋ maal maan linɛ nyu'od bugum tis Wina'am, nɛ maan sieba ya'as. Ka Aaron nɛ Israel kpɛɛmnam la kɛɛn o san'an na ka ba la'as taaba di diib Wina'am tuon.
Jetro sa'al Moses
13 Li yimbɛog ka Moses zin' maan nidib la antu'a tisidi ba. Ka nidib la la'asi zi'e gur Moses bɛogʋn hali paae zaam. 14 Ka Moses diem la nyɛ on maan si'em la, o da bu'os o ye, “Bɔɔ maal ka fʋ kɔn'ɔkɔn' kad saria ka nimbama wʋsa zi'e giligif bɛogʋn paae zaam bɔɔd sʋŋirɛ?” 15 Ka Moses lɛbis ye, “Nidib la ken mam san'an na bɔɔd Wina'am sʋŋir. 16 Ka yɛlsi'a ya'a bɛ, man na maali tisi ba, ka pa'ali ba Wina'am bɔɔd si'el, nɛ o nɔzi'ela la.” 17 Ka o diem la yɛl ye, “Nwa ka' sʋ'ʋm. 18 Fʋn nɛ nidib la wʋsa na gɛn. Tʋʋma la tɛbis nɛ fʋn na mɔri fʋ kɔn'ɔkɔn'. 19 Kɛl ka m pa'alif bʋn kaŋa, ka Wina'am na bɛ nɛf ka fʋ an nidib la tuongat ka mɔri ba yɛla kennɛ o san'an na. 20 Fʋ na pa'al nidib la Wina'am gban'e ye o maal si'el, nɛ o nɔzi'ela, ka pa'ali ba ban na bɛ si'em. 21 Amaa bɔɔm nimbanɛ an sida dim ka zɔt Wina'am ka pʋ bɔɔd bɛ'ɛdɛ, ka kɛ ka ba gɔsid nidib la yɛla maalʋg. Sieba na sʋ'oe nidib tusir, sieba nidib kɔbiga, sieba nidib pisnu, sieba nidib piig-piig. 22 Nimbama na sʋŋid nidib la ka maan yɛlbanɛ pʋ gaadi ba paŋa, ka yɛlkanɛ gaadi ba paŋ la ba na mɔri kena tisif. Amaa yɛlbibis la ka ba na maali ba mɛŋ. Ba na sʋŋidif ka tʋʋma la sie bi'ela tisif. 23 Fʋ ya'a dɔlis sa'al kaŋa wʋʋ Wina'am yɛl ye fʋ maal si'em la, fʋ na nyɛ ka fʋ nyaŋ yɛl la, ka nidib la kul nɛ sumbʋgʋsʋm.”
24 Ka Moses siak o diem la sa'alʋg ka tʋm ala. 25 Ka o gaans ninsʋma ka kɛ ka ba gɔsid nidib la yɛla maalʋg. O tis sieba nidib tusir, ka tis sieba nidib kɔbiga, ka tis sieba nidib pisnu, ka tis sieba piiga. 26 Ka nimbama da bɛ saŋa wʋsa ka tʋm tʋʋma la, ka yɛlbanɛ ka ba kʋ nyaŋ la, ka ba mɔr na tisid Moses, amaa yɛlbibis la ba maannɛ ba mɛŋ.
27 Lina nya'aŋ ka Moses kɛɛsi o diem la ka o lɛbi o mɛŋ teŋin.