Dikanɛ yi Arezana ni na la yɛla
16
1 Ka Israel dim la duoe Elim keŋ paae teŋ kanɛ an pipirig ka ba buonnɛ li ye Sin, ka li bɛ Elim nɛ Sinai teŋsʋk la. Li da anɛ nwadis ayi' la dabpii nɛ anu daar ban yi Egipt na la. 2 Ka Israel nidib la wʋsa nyɔn Moses nɛ Aaron, pipirigin la 3 yɛt ye, “Ti ya'a daa kpi Zugsɔb la nu'usin Egipt teŋin di pʋ sɔn'oe yaa? Anina ka ti daa ɔnbid ni'im ka dit diibi tigid, amaa fʋ mɔri ti kɛn mɔɔgin kpɛla na ye kɔ'ɔm kʋʋ ti wʋsa.”4 Ka Zugsɔb yɛl Moses ye, “M na kɛ ka diib yi arezana na tisi ya. Daar wʋsa ba yim vaae dinɛ na siaki ba daakan ma'aa, ka m gɔs ye ba na dɔl mam nɔɔr bɛɛ ba kʋ dɔlla. 5 Amaa daba ayuobʋ daar la, ba na vaae ban ɛɛn pʋn vaad si'em la nɔɔr ayi'.” 6 Ka Moses nɛ Aaron yɛl Israel dim la ye, “Zaama ya na baŋ ye Zugsɔb la sid mɔri ya yi Egipt na. 7 Bɛog bɛkɛung ka ya na nyɛ Zugsɔb girima la, bɔzugɔ, o wʋm yanamɛ nyɔn o si'em la. Tinam aan anɔ'ɔn ka ya nyɔnnɛ ti?” 8 Ka Moses yɛl ye, “Zugsɔb la na tisidi ya ni'im zaam ka ya ɔnbid, ka tisidi ya diib bɛogʋn ka ya diti tigid. Ala ka ya na baŋ ye Zugsɔb la ka ya nyɔn ka ka' tinama. Tinam aan anɔ'ɔnɛ? Ya pʋ nyɔn tinama, amaa ya nyɔnnɛ Zugsɔb la.”
9 Ka Moses yɛl Aaron ye, “Yɛlim Israel dim la ye ba kem na, ka Zugsɔb wʋmi ba nyɔnyɔlʋg la.” 10 Ka Aaron nan bɛɛ anina yɛt Israel dim la, ka ba gɔs mɔɔgin ka Zugsɔb girima nie saŋgbauŋin la. 11 Ka Zugsɔb yɛl Moses ye, 12 “M wʋm Israel dim nyɔnyɔlʋg la. Yɛlimi ba ye, ‘Zaam ya na ɔnbid ni'im ka bɛogʋn ka ya dit diib. Ala ka ya na baŋ ye mam an Zugsɔb ya Wina'am la.’ ”
13 Ka zakan la ka kɔdis kena pɛ'ɛl ban gbɛɛnd zin'isi'a la. Ka bɛogʋn ka mɛligim lii madigi madig zin'ig la. 14 Ka mɛligim la kʋdig la ka ba nyɛ bʋnsieba ka ba an lamma-lamma nwɛnɛ sa'apɛlaa bɛ teŋin la. 15 Israel dimi nyɛɛ li la, ba bu'os taaba ye, “Ka nwa an bɔ?” Bɔzugɔ ba da zi' lin an si'ela. Ka Moses yɛli ba ye, “Li anɛ dikanɛ ka Zugsɔb tisi ya ye ya di la. 16 Zugsɔb la yɛl si'em nwa: ‘Sɔ' wʋsa vaam on na nyaŋi di si'em bɛn, ka mɛ vaae dinɛ na sia'al o yidim.’ ” 17 Ka Israel dim la tʋm wʋʋ ban yɛli ba si'em la, ka sieba vaae bɛdegʋ ka sieba vaae bi'ela. 18 Ka ban mak la, onɛ vaae bɛdegʋ pʋ mɔr ka li zu'oe galisɛ, ka onɛ mɛ vaae bi'ela la pʋ mɔr ka li pɔɔdi galisɛ. Sɔ' wʋsa da vaadnɛ o paŋi zem si'em. 19 Ka Moses yɛli ba ye, “Mid ka sɔ' digil ye bɛog ka o di.” 20 Amaa sieba pʋ di'e Moses n yɛl si'el la, ka digil sieba ye bɛog. Ka zunzunya kpɛn' ka li pun'oe nyuusid. Ka Moses sʋʋnr duoe nɛ ba. 21 Daar wʋsa bɛogʋn, sɔ' wʋsa vaadnɛ o paŋi tun'e si'em, ka nintaŋ ya'a mu'oe ka li nyɛlig. 22 Amaa daba ayuobʋ daar la, nid yinne wʋsa da vaadnɛ nwama ayi' ka li an daba ayi' din. Ka Israel kpɛɛmnam la kena yɛl Moses, 23 ka o yɛli ba ye, “Zugsɔb la yɛl si'em nwa: ‘Bɛog anɛ Vʋ'ʋsʋm Daar, ka an kasi tis Zugsɔb la. Sɛn'ɛmi yanamɛ na sɛn' si'el, ka dʋg yanamɛ na dʋg si'el, ka digil dinɛ kpɛlim la gur bɛog.’ ” 24 Ka ba sid kɛ sieba gur bɛog wʋʋ Moses n yɛl si'em la. Ka li pʋ pun'oe nyuusid bɛɛ bʋnvʋya kpɛn' baa. 25 Ka Moses yɛli ba ye, “Dimini li zina bɔzugɔ zina anɛ Zugsɔb dabisir. Ya kʋ nyɛ diib la teŋin la zinaa. 26 Daba ayuobʋ la ka ya vaad, amaa daba ayɔpɔi daar ya kʋ nyɛɛ lii.” 27 La'am nɛ wala, sieba da yi daba ayɔpɔi la daar keŋ ye ba vaae diib, amaa ka li kae. 28 Ka Zugsɔb yɛl Moses ye, “Nɔɔr ala ka ya zan'as ye ya kʋ di'e mam nɔɔr nɛ mam nɔzi'ela? 29 Baŋim ye Zugsɔb la tisi ya o dabisir la. Din ka daba ayuobʋ la daar ka o tisi ya daba ayi' diib la. Ka sɔ' wʋsa na kpɛlim on bɛ zin'isi'a daba ayɔpɔi la daar. Sɔ' da yi yiŋa.” 30 Ka nidib la da vʋ'ʋs daba ayɔpɔi daar la.
31 Ka Israel dim la buol bodobodo la ye manna.a Li da anɛ piela-piela ka malis wʋʋ siind nɛ. 32 Ka Moses yɛli ba ye, “Zugsɔb la yɛl si'em nwa: ‘Makimi manna la kuriba yinne digili ka bibanɛ ti duoe na nyɛ dikanɛ ka m tisi ya mɔɔgin mam mɔri ya yi Egipt na la.’ ” 33 Ka Moses yɛl Aaron ye, “Nɔkim yubigi mak manna kuriba yinne niŋ anina zi'el Zugsɔb la tuon ka li bɛɛ ani an kasɛti tis bibanɛ na ti duoe na.” 34 Ka nwɛnɛ Zugsɔb la yɛl Moses si'em la, Aaron nɔk manna la zi'el nɔnaar zin'igin, ka li bɛɛ anina saŋa wʋsa. 35 Israel dim la dinɛ manna yʋma pisnaasi ka nyaan paae Keenan na. 36 Ban da mɔr si'eli makid manna da anɛ wʋʋ kuriba yinne.