Moses nɛ Miriam yʋʋm zun'e Wina'am
15
1 Ka Moses nɛ Israel dim la yʋ'ʋm yʋʋm kaŋa tis Zugsɔb la:“M na yʋʋm pian' Zugsɔb la,
onɛ an girima daan
ka lɛn nyaŋid.
O nɔk wiedban'adib la nɛ widi la lɔsi Atɛuk la ni.
2 Zugsɔb la an mam paŋ,
o zug ka m yʋ'ʋmid yʋʋm nwa,
onɛ lieb mam faangid.
Onɛ an mam Wina'am ka m na wɔ'ɔg o,
mam yaanam Wina'am ka m na dʋ'ʋs o yʋ'ʋr!
3 Zugsɔb anɛ zabzabid.
O yʋ'ʋri an Zugsɔb.
4 Na'ab Faaro tɛrekonam nɛ soogianam la wʋsa
ka o lɔbi bas Atɛukʋn,
hali nɛ o soogia kpɛɛmnam la wʋsa, Atɛuk Zɛn'ug dii ba.
5 Ku'ozuluŋ la dii ba
ka ba sim wʋʋ kugir nɛ.
6 Zugsɔba! Fʋ datiuŋ nu'ug la mɔr paŋ.
Zugsɔba, fʋ datiuŋ nu'ug la nyaŋ dataas la.
7 Fʋ paŋ la kɛnɛ ka fʋ nyaŋ banɛ wʋsa ki'isi fʋ nɔɔr.
Ka fʋ sʋʋnr duoe ka ba kanb wʋʋ vaala nɛ mɔɔd nɛ.
8 Ka fʋ vʋ'ʋsʋg ma'aa kɛ ka ku'om la la'as taaba.
Ka ku'okanɛ dammid la mɛ duoe zi'e wʋʋ zaŋguoma nɛ.
Ka ku'om la kpɛ'ɛŋ kaŋ-kaŋ Atɛuk la teŋsʋk.
9 Dataas la da nwɛ'ɛd nyɔ'ɔg ye,
‘Ti na kadi ba,
Ti na paae ba ka nyaŋi ba,
Ti na faaɛn ba la'ad la pʋdig,
Ti na zaŋ tinamɛ bɔɔd si'el.
Ti na fuoe ti sʋ'ʋs ka san'ami ba.’
10 Fʋ vʋ'ʋsʋm ma'aa kɛ ka Atɛuk la dii ba
ka ba sim wʋʋ dalbanam nɛ ku'otita'ar la ni.
11 Zugsɔba, wina wʋsa pʋʋginɛ anɔ'ɔnɛ nwɛnɛ fɔ?
Anɔ'ɔnɛ nwɛnɛ fʋn kanɛ na'am an kasi,
ka mɔr girima ka tʋm nyalima la?
12 Fʋ ʋki fʋ nu'ug nɛ paŋ
ka teŋ la vɔli ba wʋsa.
13 Fʋ na mɔri fʋ nimbanɛ ka fʋ faaɛn la nɛ nɔŋilim,
fʋ na mɔri ba nɛ fʋ paŋ tita'ar la paae fʋ bɛllim zin'ig linɛ an kasi la.
14 Tɛɛns la na wʋm ka dabiem gban'e ba;
ka sʋnsan'aŋ tita'ar na paae Filistia dim.
15 Dabietita'ar na kpɛn' Edom na'anam;
ka Moab kpɛɛmnam na kirid,
ka Keenan dim giinla na kɛns ka ba mɛlim.
16 Dabietita'ar na paae ba.
Fʋ nu'ug kanɛ mɔr paŋ la na kɛ ka ba ga'aŋi lieb wʋʋ kugir nɛ,
asɛɛ ka fʋ nidib la ti gaad;
hali ka nimbanɛ ka Zugsɔb da' ba la gaadi naae.
17 Fʋ na mɔri ba paae, ka zin'ili ba zuokanɛ aan fʋ mɛŋ din la zug.
Zin'ikanɛ ka fʋn Zugsɔb maal ye fʋ bɛ la.
Pʋ'ʋsim Yir kanɛ ka fʋn Zugsɔb mɛ nɛ fʋ mɛŋ-mɛŋ nu'ug la.
18 Zugsɔb la na an Na'ab, saŋa dinɛ ka' naarɛ.”
19 Ka Na'ab Faaro widi nɛ o tɛrekonam nɛ wiedban'adib la wʋsa sig Atɛukʋn la ka Zugsɔb kɛ ka ku'om la dii ba, amaa Israel dim la da dɔl nɛ Atɛuk la pʋʋgin gaad teŋ kpi'emis.
Miriam yʋʋm
20 Ka Miriam onɛ an Wina'am nɔdi'es pu'ak ka an Aaron taʋn la nɔk siyaarig, ka pu'ab la wʋsa nɔk siyaarisi nwɛ'ɛdi dɔl o ka wa'ad. 21 Ka Miriam yʋʋm tisi ba ye,
“Yʋʋm tisi Zugsɔb la,
bɔzugɔ onɛ nyaŋ nyaŋir ka nar nɛ girima
O nɔk wiedban'adib la nɛ widi la lɔs Atɛuk la ni.”
Mara teŋin ku'otɔɔg la yɛla
22 Ka Moses mɔr Israel dim la yii Atɛuk Zɛn'ug la ni keŋ teŋ kanɛ an pipirig ka ba buon ye Seur la. Daba atan' ka ba zaŋi keŋ mɔɔgin la ka pʋ nyɛ ku'om. 23 Ka ban da paae Mara la, ba da pʋ nyaŋi nu ku'om la bɔzugɔ li da anɛ tɔɔg (dinzug ka ba buon zin'ig la ye, Mara).a 24 Ka nidib la nyɔn Moses ye, “Ti na nu bɔ?” 25 Ka Moses fabili tis Zugsɔb la ka o pa'al o dasi'a ka o zaŋi lɔs ku'omin la ka li yʋ'ʋn malis.
Anina ka Zugsɔb zi'el zi'elʋg nɛ kisa tisi ba ye o kpansi ba gɔs, 26 ka ye, “Ya ya'a kɛlis mam Zugsɔb Wina'am nɔɔr, hali ka tʋm dinɛ an sʋ'ʋŋa m nifin ka siaki m yɛla, ka mɔri m nɔzi'ela la, wibanɛ ka m daa kɛ ka di gban'e Egipt dim la kʋ gban'e ya. Manɛ an Zugsɔb onɛ tisidi ya laafi la.”
27 Ka ba paae Elim na, anina mɔr kɔlis pii nɛ ayi' nɛ kpʋkparis tiis pisyɔpɔi; ka ba zin'ini anina kpi'e nɛ ku'om la.