Moses nɛ Aaron pian' tis Faaro
5
1 Lin nya'aŋ ka Moses nɛ Aaron keŋ yɛl Na'ab Faaro ye, “Zugsɔb onɛ an Israel Wina'am la yɛl ye, ‘Kɛl ka m nidib la keŋ maal malʋŋʋ tisim sian'anr sʋʋgin.’ ” 2 Ka Na'ab Faaro ye, “Anɔ'ɔnɛ an Zugsɔb la ka li kpa tilas ye m wʋm tis o ka kɛ ka Israel dim keŋɛ? M zi' Zugsɔb la, ka mɛ kʋ kɛ ka Israel keŋɛ.” 3 Ka ba yɛl ye, “Hibiru dim Wina'am la yɛl ye ti nɔkim daba atan' keŋ mɔɔgin maal malʋŋʋ tis on Zugsɔb Wina'am, ka ya'a ka' ala o na kɛ ka wiim li na bɛɛ kɛ ka ti kpi tanpin.” 4 Amaa Egipt Na'ab la yɛl Moses nɛ Aaron ye, “Bɔɔ maal ka ya ye nidib la yim ka basi ba tʋʋma? Lɛmmini ya tʋʋma ni!” 5 Ka Na'ab Faaro lɛn yɛl ye, “Gɔsima, nidib la ka' bɛn teŋ nwa pʋʋginɛ, ka fʋ yɛl ye ba basim tʋʋmaa?” 6 Ka daakan la ka Na'ab Faaro yɛl banɛ gɔsid tʋmtʋmnib la ye, 7 “Da lɛn tisid nidib la la'abanɛ ka ba mɔri maan tampiga la; kɛlli ka ba mɛŋ keŋ bɔɔ ba la'ad. 8 Amaa kɛl ka ba maal wʋʋ ban daa maan si'em la, da sie tampigbanɛ ka ba maan la kallɛ; ba anɛ gbanya'anam dinɛ kɛ ka ba fabin ka ye ban keŋ maal malʋŋʋ tisi ba Wina'am la. 9 Kɛl ka tʋʋma la kpi'em tis dap la, ka ba na bɛɛ anina tʋm ka kʋ kɛlis ziri pian'adɛ.”10 Ka banɛ gɔsid tʋmtʋmnib la yɛl nidib la ye, “Na'ab Faaro yɛl si'eli nwa: 11 ‘M kʋ lɛn tisi ya la'abanɛ ka ya mɔri maan tampiga laa. Kem bɔɔe la'ad la zin'ikanɛ ka ya na nyɛ, amaa tʋʋma la pʋ ye li bu'oe baa bi'elaa.’ ” 12 Ka nidib la widig Egipt zin'ig wʋsa ieed la'ad la ye ba tʋm. 13 Nimbanɛ gɔsid tʋʋma la da mugusid nidib la ye, “Naami tʋʋma la daar wʋsa wʋʋ tinamɛ daa tisidi ya la'ad ka ya tʋm si'em la!” 14 Ba da bʋ'ʋd Israel tʋmtʋmnib tuongatib la ka yɛt ye, “Bɔɔ kɛ ka ya pʋ tʋm ka li paae dabisbanɛ gaad la?”
15 Israel nimbanɛ gaad tuonnɛ gɔsid tʋʋma la da keŋ fabili tis Na'ab Faaro ye, “Naa! Bɔɔ kɛ ka fʋ namisidi ti anwana? 16 Tinam pʋ paam la'abanɛ na maal tampiga laa, ka ba ye ti maalim tampiga ka bʋ'ʋdi ti, amaa li yinɛ fʋ mɛŋ nidib la san'an na.” 17 Ka Na'ab Faaro lɛbis ye, “Ya anɛ gbanya'anam! Ya'a ka' ala ya naan kʋ yɛlin ye m kɛl ka ya yi Egipt teŋinɛ keŋ maal malʋŋʋ tisi ya Zugsɔba. 18 Lɛm mɛɛi! Ba pʋ ye ba tisi ya la'ad la, amaa la'am nɛ wala bɔɔmi la'ad la tʋm wʋʋ yanamɛ daa tʋm si'em la.” 19 Na'ab Faaro n zan'as la, Israel tʋʋma tuongatib la baŋ ye ba bɛ nɛ yɛla ni. 20 Ka ban yi Na'ab Faaro yin la ba nyɛ ka Moses nɛ Aaron guri ba yiŋ, 21 ka tʋmtʋmnib tuongatib la yɛl Moses nɛ Aaron ye, “Zugsɔb na kadi ya sariabɛ'og! Yanamɛ zaŋ tinamɛ tugul Na'ab Faaro nɛ o kpɛɛmnam la! Ya tisi ba sʋ'ʋg ye ba kʋʋ ti.”