50
1 Ka Josef luu bibigi o ba' la ka kaas hali. 2 Josef da kɛ ka banɛ mi' kum tʋʋma la niŋ o ba' la niŋgbiŋ la tiim ka li kʋ san'am bɛɛ pun'oe. 3 Li da paae o dabisa pisnaasi nwɛnɛ ban da tʋm tiim tʋʋma si'em la, ka Egipt nidib yʋ'ʋn maal sʋnsa'aŋ dabisa pisyɔpɔi o yɛla. 4 Ka sʋnsa'aŋ la nya'aŋ ka Josef yɛl na'ayikpɛm la ye, “Nɔkimi labakaŋa keŋ tis Na'ab la: 5 ‘M ba' la daa bɔɔd ye o kpi la, o daa kɛ ka m pɔ nɔɔr ye m na ti mum o yakanɛ ka o maali digil Keenan teŋin la. Dinzug kɛl ka m keŋ mumi m ba' la ka lɛb na.’ ” 6 Ka Na'ab Faaro yɛl ye, “Kem mumi fʋ ba' la nwɛnɛ fʋn da pɔ nɔɔr ye fʋ na niŋ si'em la.”7 Ka Josef keŋ ye o mumi o ba' la. Na'ab la kpɛɛmnam la wʋsa nɛ o na'ayikpɛm la nɛ Egipt teŋ kpɛɛmnam wʋsa da dɔl Josef n keŋ. 8 O yidim nɛ o ba'abiis nɛ o saam yidim la wʋsa mɛ da dɔlli keŋ. Ba bibibis nɛ ba pɛ'ɛs nɛ bʋʋs nɛ niigi ma'aa da nan kpɛlim Gosen teŋin. 9 Dap banɛ da mɔr widi tɛrekonam nɛ banɛ da ban'ad widi la da la'am keŋ. Nidib la da la'asi zu'oe hali. 10 Ban da paae Atad zieŋin linɛ bɛ Joodan kɔldaug nya'aŋ la, ba kpɛn' nɛ kukuma hali yuug. Ka Josef zaŋ daba ayɔpɔi kaasi o saam kʋʋr nɛ sʋnsa'aŋ. 11 Keenan dim la nyɛ ka nidib la maan sʋnsa'aŋ Atad zieŋin la, ba yɛl ye, “Gɔsimi, Egipt nidib la maan sʋnsa'aŋ si'em!” Lin ka ba buon zin'ig la ye Abɛl-Miziram.a 12 Jakob biis la da maal nwɛnɛ on da pʋn yɛli ba si'em la 13 ka zaŋ o niŋgbiŋ la mɔri keŋ mum yaʋg kanɛ bɛ Makipiela pʋʋgin, Mamir nya'aŋ, paalʋ kanɛ ka Abraham da da' Efiron onɛ an Hitti dau san'an ye ba mumi ba kum anina la. 14 Josef n da mum o ba' la naae la, on nɛ o ba'abiis nɛ banɛ da dɔl o keŋi maal kʋʋr la da lɛb Egipt teŋin.
Josef n kpɛmis o ba'abiis la sʋnya si'em
15 Ba ba' la kum nya'aŋ la ka Josef ba'abiis la yɛl taaba ye, “Ka Josef ya'a nan kpɛn kisi ti ka bɔ suoya ye o lɛbisi ti bɛ'ɛd wʋʋ tinamɛ da maal o si'em la?” 16 Ka ba tʋm dau sɔ' Josef san'an ye, “Ti ba' la da nam pʋ kpi la o da zi'el nɔɔri tisi ti ye ti yɛlimif ye, 17 ‘Dimi fʋ bieya la suguru! Baa ban tʋmif bɛ'ɛd la, asɛɛ ka fʋ kɛɛ ba tʋʋmbɛ'ɛdi bas.’ Ti anɛ fʋ ba' la Wina'am yammis, dimi ti suguru!” Josef da di'e labakaŋa la, o da kumya hali. 18 O ba'abiis la da kena vanbini o tuon, ka yɛl o ye, “Tinamɛ nwa fʋ tuon ka an fʋ sankpan'asnam.” 19 Ka Josef yɛli ba ye, “Da zɔti dabiem, m kʋ nyaŋi nɔki m mɛŋi zi'el Wina'am zin'iginɛ. 20 Yanam da gban'e nɛ bɛ'ɛd mam yɛla, amaa ka Wina'am lɛbigi li sʋ'ʋm, ye li sʋŋ nidib bɛdegʋ, ka faaɛn ba yis kumin wʋʋ lin an si'em zina la. 21 Si'el kae ka ya na zɔt dabiem. Mam na gɔsi ya nɛ ya biis sʋ'ʋŋa.” Ka o pian' pian'asʋma tisi ba ka ba lɛbi kul nɛ sumalisim.
Josef kum yɛla
22 Josef nɛ o ba'abiis la da nan kpɛn bɛ nɛ Egipt teŋin. O da anɛ yʋma kɔbiga nɛ piiga (110) ka nyaan kpi. 23 O da vʋe yuug ka da nyɛ Efiram yaan-tan', ka da lɛn di'e Manase biig Makir biis la o nu'usin. 24 Ka yɛl o ba'abiis la ye, “M bɔɔd ye m kpinɛ, amaa Wina'am na ba'asi n gɔsi ya sʋ'ʋŋa ka mɔri ya yi teŋ kaŋa ni ka ya kpɛn' teŋ kanɛ ka o da pɔ nɔɔri tis Abraham nɛ Isaak nɛ Jakob ye o na tisi ba la.” 25 Ka Josef yɛl o nidib ye, “Pɔɔm tisi nɛ m ye Wina'am ya'a mɔri ya n lɛbi ya teŋin la ya na mɔri m niŋgbiŋ la keŋ.” 26 Ka Josef n da paae yʋma kɔbiga nɛ piiga (110) la, o da kpi Egipt teŋin ka ba nɔk tiim niŋ o niŋgbiŋ la ka li pʋ san'am, ka nɔki li niŋ kum daka ni.