Sara kpi ya ka ba mum o si'em
23
1 Sara da anɛ yʋma kɔbiga nɛ pisi nɛ ayɔpɔi (127), 2 ka nyaan kpi Kiriaf Ariba, linɛ yʋ'ʋn an Hebron teŋi bɛ Keenan sʋ'ʋlimin la. Ka Abraham sʋʋnr san'am ka o kaas o kum la yɛla.3 Ka Abraham bas kum la ka duoe keŋ Hitti dim kpɛɛmnam la ni yɛl ye, 4 “M anɛ saan teŋ nwa pʋʋgin. Linzug, kuosimi paalʋ tisi nɛ m ka li na an zin'ikanɛ ka m mumi m kum.” 5 Ka Hitti dim kpɛɛmnam la lɛbis Abraham ye, 6 “Ti zugdaana, wʋmma! Fʋ anɛ Wina'am na'abiig ka bɛ nɛ ti kpɛla, gɔsimi ti yaad zin'igin wʋsa ka fʋn bɔɔd ye fʋ mumi fʋ kum zin'isi'a wʋsa fʋn mum! Ti sɔ' kʋ kadif ye fʋ da mum kum yaadin nwaa.” 7 Ka Abraham duoe Hitti dim kpɛɛmnam la tuon igini na'asi ba 8 ka yɛli ba ye, “Ya ya'a siaki m nɔɔr ye m mumi m kum la, m na sɔsi ya ka ya bɛlim Zohar biig Efiron n tisim, 9 ka o nɔk Makipiela tampinlɛuŋ kanɛ bɛɛ o pɔɔg nɔɔrin la tisim. Ka o ya'a siak on kuos o paalʋ la tisim ka m yɔ ka di'e li ka li an zin'ikanɛ ka m na mumi m kum ya teŋ nwa ni.” 10 Efiron onɛ an Hitti nid la da zin'inɛ nɛ o teŋ nidib ka lɛbis Abraham, ka o taaba banɛ aan o teŋ nidib la wʋm, hali nɛ banɛ dɔl tempʋʋg la za'anɔɔrin gat la wʋsa, 11 ka yɛl ye, “Ayei, kɛlisima! Mam nɔk paalʋ la nɛ tampinlɛuŋ kanɛ bɛ li pʋʋgin la tisif zaalim m buudi la nifin. Kem mumi fʋ kum!” 12 Ka Abraham lɛn igin teŋin nidib la tuon 13 ka yɛl Efiron ba nifin ye, “M ba', kɛlisima! M bɔɔd ye fʋ kuos paalʋ la tisim ka di'e li ligidi, ka m na nyaŋi mumi m kum anina.” 14 Ka Efiron lɛbisi yɛl Abraham ye, 15 “M zugdaana, kɛlisima! Paalʋ la ligidi anɛ anzurifa kɔbisnaasi (400), ka nwa an bɔ nid nɛ o zua sʋʋginɛ? Kem mumi fʋ kum.” 16 Ka Abraham siak ka yɔ anzurifa la wʋʋ Efiron n zin'in nidib la sʋʋgin yɛl si'em la.
17 Abraham da da' Efiron paalʋ dinɛ bɛ Makipiela n kpa' Mamir teŋ la; o da da' pɔɔg la, nɛ tampinlɛuŋ la, nɛ tibanɛ bɛɛ anina la wʋsa ka li liebi o din. 18 Paalʋ la yʋ'ʋn da lieb nɛ Abraham paalʋ, Hitti dim kpɛɛmnam la nini ni nwɛnɛ on nɛ Hitti dim la kʋʋs taaba si'em la. 19 Ka li nya'aŋ ka Abraham mum o pu'a Sara Makipiela tampinlɛuŋʋn, dinɛ kpi'e Mamir, linɛ an Hebron teŋ, n bɛ Keenan teŋgbauŋʋn la.
20 Ka Hitti dim la siaki zaŋ paalʋ la nɛ li tampinlɛuŋ la tis Abraham ka li liebi o yaad zin'ig.