Kain nɛ Abɛl yɛla
4
1 Adam da digin nɛ o pu'a Hawa ka o nɔk pʋʋgʋ du'a biribiŋ ka ba pʋd o yʋ'ʋr ye a Kain. Ka Hawa ye, “Nɛ Wina'am paŋ ka m du'a dau.” 2 Lin nya'aŋ ka o lɛn du'a o pitʋ Abɛl n paas. Abɛl da gʋ'ʋnnɛ kɔnbid, ka Kain mɛ an kpaad. 3 Ka saŋa ti paae ye ba maal maannɛ tis Wina'am la, Kain da nɔk o zʋʋd la sieba na tis Zugsɔb la, 4 ka Abɛl mɛ da zaŋ o kɔnbkanɛ ka ba du'a yiiga ka nɔb sʋ'ʋŋa la na tis Zugsɔb la. Ka Zugsɔb sʋnf malis nɛ Abɛl nɛ o maan la, 5 amaa o sʋnf da pʋ malis nɛ Kain nɛ o maan laa. Ka Kain sʋnf duoe ka o lɔɔ o nindaa. 6 Ka Zugsɔb yɛl Kain ye, “Bɔ ka fʋ sʋnf pɛligɛ? Bɔ ka fʋ lɔɔdi fʋ nindaa? 7 Fʋ ya'a tʋmin dinɛ an sʋm, m naan kʋ di'enɛ fʋ maan laa? Amaa fʋn pʋ tʋm linɛ an sʋm la, tʋʋmbɛ'ɛd bɛɛ fʋ za'anɔɔrin bɔɔd ye o nyaŋif, amaa mɔɔm ka nyaŋ o.” 8 Ka Kain ti yɛl o pitʋ Abɛl ye, “Kɛl ka ti yii keŋ mɔɔgin.” Ka ban paae mɔɔgin la ka Kain kpɛn nwɛ' o pitʋ Abɛl n kʋʋ o. 9 Ka Zugsɔb la bu'os Kain ye, “Fʋ pitʋ la bɛ ya?” Ka o lɛbis ye, “Man zi'. Manɛ guri m pitʋ laa?” 10 Ka Zugsɔb la yɛl ye, “Bɔɔ nwa ka fʋ tʋm? Kɛlisim, fʋ pitʋ la ziim kaasid teŋin paadi m san'an na! 11 Nannanna nɔpɔɔr bɛɛ fʋ zugin, ka teŋgbauŋ la mɛ na zan'asif bɔzugɔ o ya'ae o nɔɔri di'e fʋ pitʋ la ziim yii fʋ nu'usin. 12 Fʋ ya'a kua, teŋ la kʋ lɛn maal zuudi tisif ya'asɛ. Fʋ na anɛ onɛ gɔɔndi giligid dunia la zug.”13 Kain da yɛl Zugsɔb la ye, “Namisʋg nwa tʋʋgi m paŋ bɛn. 14 Zina fʋ kadimi yis teŋ la pʋʋgin ka m kʋ lɛn bɛɛ fʋ tuonnɛ. M na anɛ onɛ gɔɔndi giligid dunia la zug, ka onɛ wʋsa nyɛ mam na kʋʋm!” 15 Amaa ka Zugsɔb la yɛl o ye, “Li ka' ala, sɔ' ya'a kʋ Kain o na nyɛ namisʋg nɔɔra ayɔpɔi.” Ka Zugsɔb la zanbil Kain ye sɔ' ya'a nyɛɛ o, on da kʋʋ o. 16 Kain da yi Zugsɔb la san'an keŋ bɛ Nod teŋin, Eden nya'aŋ sa.
17 Kain da digin nɛ o pu'a ka o gban'e pʋʋg du'a Enok. O da mɛɛdnɛ tempʋʋg, ka nɔk o biig Enok yʋ'ʋri pʋd teŋ la. 18 Enok da du'a Irad, ka Irad du'a Mehuyael, ka Mehuyael du'a Metusael, ka Metusael du'a Lamek. 19 Lamek mɛ da dinɛ pu'aba ayi', yinne yʋ'ʋr da buon Ada ka oŋa la yʋ'ʋr buon Zilla. 20 Ka Ada da du'a biig ka pʋd o yʋ'ʋr ye, Jabal. Ka Jabal nɛ o nya'aŋ dim da an banɛ bɛ mɔɔgin sʋga nii gʋ'ʋn bʋnkɔnbid.
21 Ka ba da lɛn du'a o pitʋ ka on yʋ'ʋr da buon Jubal. Ka on nɛ o nya'aŋ dim wʋsa da an banɛ nwɛ'ɛd bʋnnwɛ'ɛda ka piebid wiis. 22 Ka Lamek pu'abil Zilla mɛ da du'a biig, ka o yʋ'ʋr buon ye Tuebal Kain. Ka onɛ mɛ da pin'il kʋnt tʋʋma wʋsa, ka o taʋn yʋ'ʋr da buon Naama. 23 Ka Lamek da dʋ'ʋs o mɛŋi yʋ'ʋm tis o pu'aba ayi' la ye,
“Ada nɛ Zilla, kɛlisimi nwa!
Yanam, banɛ an mam Lamek pu'aba, wʋmmi sʋ'ʋŋa!
Dau sɔ' da pu'alimim ka m kʋʋ o,
O da tisim dɛŋ ka m kʋʋ o.
24 Ba ya'a kʋ nidiba ayɔpɔi yɔ Kain kʋʋb sam,
ba na kʋ nidib pisyɔpɔi nɛ ayɔpɔi yɔ man Lamek kʋʋb sam!”