Efantu 44
Josef puwinko pa piteyoo ñúnuwoo
44
Púful toko Josef naawufan hilim áhampaatiin a ati píhina pa pakati ekumpaan ya eteyoo naasokoo:
“Meeŋan pupootak pa piti pakan paka payenke niŋ paliyal,
an óo an la naayina la pitiyo.
Ñahan an óo an mañ ma miteyoo ti putum epootak ya eteyoo.
2 Ti putum epootak ya eti kahiineen ka,
ñahan mañ etenko miti hinoom paliyal pa,
uwwas lupo lompo elontoŋ ya etoom eti kótifoloo ya.”
Ayíin a náahin eeha Josef naasokoo ha.
3 Eti kacom eteyyo nuulap,
nkakatan epuuk Jakob kapikaay niŋ púfali pa piteyii.
4 Nkáful ti saatee ya,
pale kálaaŋanut meemak.
Fiye,
Josef naasok áhampaatiin a ati píhina pa pakati ekumpaan ya eteyoo:
“Toopanool pakan paka payenkuu incakanii:
'Weyme uwune inniñahan heenaput ti éehine aluu heenape?
5 Nílipaalip elontoŋ ya eti áhampaatiin a atoom la nalaan la,
toko lompo innasincan heekaakaay ha ékey.
Eeha ínnihine ha hinaput.'”
6 Ayíin a naatoopanoolii naasokii kilim enkuu.
7 Nkañahanoo:
“Ahámpaatiin,
weyme uwune annook unii fiyuu?
Unii pimiikan pa pakatii étuuhaañi íhinu eehuu.
8 Síitan,
mañ emma nuutooke ma ti pupootak pa putoonii,
fo úñahaniyoot mo úpufulii ti mah ma miti Kanaan?
Puume éfuuyini káalipu kótifoloo niŋ fotom sanoo ti ekumpaan ya eti áhampaatiin a atii?
9 Ahámpaatiin,
niŋ aatookaa elontoŋ ya ti epootak ya eti akee toonii,
oom an afaamukee,
unii nuuyeno pimiikan pa pakatii.”
10 Ahámpaatiin a naañahanii:
“Iyyoo,
úhinaa samat nii fa innisoke fa pale,
aŋa inci fatook a elontoŋ ya ti epootak ya eteyoo,
akina afaayeno amiikan a,
pakakee paka nkayih.”
11 An óo an naahiliikan ápuwananii epootak ya eteyoo náapankin yo.
12 Ayíin a naasincan pupootak pa piteyii náacook ti epootak ya eti áhampaatiin a naakelan ti epootak ya eti kahiineen ka.
Nkatook elontoŋ ya ti epootak ya eti Benjamin.
13 Fiye,
ínciitiyii fo nkahaacale wañ wa uteyii,
an óo an teyii naañahan epootak ya eteyoo ti fáli ya eteyoo nkañoho ti saatee ya.
Ahámpaatiin naatookaa elontoŋ ya ti epootak akee toonii - oom an a afaamukee.
Ayíin a naasincan pupootak pa piteyii náacook ti eti áhampaatiin a naakelan ti eti kahiineen ka.
Ahámpaatiin naatookaa elontoŋ ya ti epootak akee toonii - oom an a afaamukee.
Pale aŋa inci fatook a elontoŋ ya teyoo afaayeno amiikan a.
Nkatook elontoŋ ya ti epootak ya eti Benjamin.
Ahámpaatiin naatookaa elontoŋ ya ti epootak akee toonii - oom an a afaamukee.
Ayíin a naasincan pupootak pa piteyii náacook ti eti áhampaatiin a naakelan ti eti kahiineen ka.
Ahámpaatiin naatookaa elontoŋ ya ti epootak akee toonii - oom an a afaamukee.
Pale aŋa inci fatook a elontoŋ ya teyoo afaayeno amiikan a.
Nkatook elontoŋ ya ti epootak ya eti Benjamin.
Ahámpaatiin naatookaa elontoŋ ya ti epootak akee toonii - oom an a afaamukee.
Pale aŋa inci fatook a elontoŋ ya teyoo afaayeno amiikan a.
Nkatook elontoŋ ya ti epootak ya eti Benjamin.
Pisiiŋo pa piti Juda Benjamin
14 Juda niŋ ñúnuwoo niŋ pakatuwoo nkacol ti ekumpaan ya eti Josef.
Josef naaloŋ toko,
nkákilipo hátikinoo ñuhooŋuyii t’etaam.
15 Josef naasokii:
“Weyme uwune ínnihin eehuu?
Fo nímiit nii áyiin eecuke nii inci ataakaataak kayine kiti kameye heekaakaay ha pitaako?”
16 Juda naacoop hilim ha naasokoo:
“Ahámpaatiin,
eeheyme nuuyina hisoku?
Weyme nuuyina hisoku kati ukuulanee?
Pútuun pa píhine aapucuk kaamuuyen ka kutoonii.
Efuuyeno pimiikan pa pakatii niŋ aŋa nkacuke ya elontoŋ ya etii ti epootak ya eteyoo.”
17 Josef naasokii:
“Haani,
inci étihaañi íhinu eehuu!
Aŋa nkatooke ya elontoŋ ya etoom ti epootak ya eteyoo,
akina afaayeno amiikan a atoom.
Pale aluu,
inniñoho ti kásuumaay pati paapaa ataaluu.”
18 Juda naateeŋo pati Josef naasokoo:
“Ahámpaatiin,
ponket wunam púkup,
inci amiikan a atii,
timpi ñíken ti inci,
kaatuko awe niŋ amansa ya ati Esipt nileha.
19 Ahámpaatiin,
ti pítin unii púcook,
aacakanaacakan unii pimiikan pa pakatii:
'Fo paapaa ataaluu aloŋaa kaloŋa?
Fo nitaakaataak atu?'
20 Nuuñahani:
'Utaakaataak paapaa eemaamane,
atuwunii aŋa naapuke ya ti himaamanoo lompo oopa po.
Paapaa atoonii álafiyoolafi meemak kaatuko akina lamma atowiye ti aaloo aŋa naahaŋe ya pálafi,
akee ya aketaaket.'
21 Fiye ansok unii:
'Nícoopiyamoo,
láfiyoolafi hicuku.'
22 Nuusoki nii:
'Añii ya aŋuu ayinaat kakatan paapaa atoonii,
nihitaakiyaa,
paapaa atoonii afaaket.'
23 Pale aññahan unii:
'Niŋ atuwaluu ánapooliyoot naaluu,
etiwanan aluu.'
24 Ta nuuñohiye ta pati paapaa atoonii,
amiikan a atii,
nuukamanoo kilim ka kitii.
25 “Po hátikin paapaa atoonii naasok unii:
'Niñoho Esipt nípinoomii unaa paliyal.'
26 Nuuñahanoo:
'Uyinaat puñoho Esipt hinoom paliyal fo niŋ atuwunii anapoolaa niŋ unii,
niŋ anapoolut niŋ unii áhampaatiin a ati Esipt atawanan unii.'
27 Paapaa atoonii,
amiikan a atii,
eehe naasoke unii:
'Nímeyimeyi nii aalam pikampaani pákasupak naapukaam.
28 Oonool a naafakam ti sipees inci insok:
"Pánipani élukuleen etaatulooloo-taatulool."
Nene cukutoo fo fiye.
29 Niŋ nicoopaa oonool a aŋe,
niŋ waah utaakiyoo inci faket niŋ kúnuul pamaamanal.'
30 “Fiye,
niŋ inci yetaa pati paapaa atoonii,
amiikan a atii,
unii peecoopoolut akampaani ya aŋe eeyem ya yaanoo,
31 niŋ acukutoo naañohiye niŋ unii afaaket,
unii pimiikan pa pakatii efuuwun kati aket niŋ kúnuul pamaamanal.
32 Niŋ fúlaa toko inci,
amiikan a atii,
naŋe eloŋam apikatan añii ya aŋe ti sipeesam,
insokoo:
'Niŋ inci ñáhaniyootoo,
fatiyo kaamuuyen enkuu hátikin paapaa atoom eloŋam púlooŋ.'
33 Fiye,
inci luumuu,
coon inci piyeno amiikan a atii ti putum añii ya aŋe,
akina naañoho niŋ ñúnuwoo.
34 Puume inci fañoho pati paapaa atoonii peeñahanut añii ya aŋe?
Etíyini hicuku kúnuul ka keekaakaay ka hicoku paapaa atoonii.”