Efantu 42
Pikaayu pa piti Josef ñúnuwoo Esipt
42
Fiye,
Jakob náasi nii paliyal umpa Esipt.
Naasok epuukoo:
“Weyme inniyeniye nipisincanool-sincanool?
2 Síyaasi nii taakaataak paliyal Esipt.
Niwano po hinoom paliyal ancuk uloŋaa timpi uketaa kamma peep.”
3 Josef ñúnuwoo,
ŋaasuwan ya,
nkawano Esipt hinoom paliyal.
4 Pale Benjamin,
Josef atuwoo,
Jakob akatanutoo apinapool niŋ ñúnuwoo;
asok afeyaafe heenaput hipitaakiyoo.
5 Fiyuu epuuk Jakob,
aŋa nkasok ya Israyel,
nkananfe lompo ti kéekeyii ka hinoom paliyal Esipt,
kaatuko épankul ya eyenaayeno ti mah ma miti Kanaan.
6 Tempo,
Josef ayeniye ati hikaw ha ati Esipt,
naasiiŋo lompo ti kaanooman ka kiti paliyal pa piti pakan paka púlooŋ pakati mah ma.
Josef ñúnuwoo nkácolii,
nkákilipo hátikinoo ñuhooŋuyii t’etaam.
Tempo Josef ayeniye ati hikaw ha hiti Esipt - naasiiŋo lompo ti kaanooman paliyal pa piti mah ma púlooŋ.
Josef ñúnuwoo nkácolii nkákilipo hátikinoo ñuhooŋuyii t’etaam,
Josef naakiiwii pale áyisanooliit teyii akina ayem ayme.
Ti mah ma miti Esipt - oo - oo - oo - oo - aa - aa - aa - aa,
Josef ñúnuwoo nkákilipo hátikinoo.
7 Emma Josef naacuke ma ñúnuwoo naakiiwii pale áyisanooliit teyii akina ayem ayme,
náakup neyii niŋ hilim heeyanke naasokii:
“Peyme ínnifulii?”
Nkañahanoo:
“Ti mah ma miti Kanaan núufulii núukey le hinoom paliyal.”
8 Josef naakiiw ñúnuwoo pale poko kakiiwutoo.
9 Náanawuno píyawut empa náayawute pa kiteyii.
Naasokii:
“Aluu mikelecoola!
Níkeyyookey le hiŋes leyme mah ma ímmilakume inniñoho nipica nikaman pakataaluu.”
10 Nkañahanoo:
“Haani áhampaatiinuu,
unii pimiikan pa pakatii,
hinoom paliyal núukeyii.
11 Unii púlooŋ pakati faaf oonool,
pakan keecoonoole,
uneetaat mikelecoola.”
12 Josef naasokii:
“Páni tom!
Níkeyyookey hiŋes leyme mah ma ímmilakume.”
13 Nkañahanoo:
“Unii pimiikan pa pakatii,
uyema hínum ŋaasuwan niŋ pákasupak,
pikampaani pakati faaf oonool,
áyiin eekine ti mah ma miti Kanaan.
Kahiineen ka unka po niŋ paapaa atoonii,
intaako oonool éecime.”
14 Josef naasokii:
“Samat nii fa inci insoke fa aluu,
aluu mikelecoola.
15 Ehe fa inci nkaakaay fa kameye man páni inniyem ti hisoku:
inci pisintoolo ti eloŋ ya eti amansa ya ati Esipt,
étiniful le ti mah emme taamanta kahiineen ka kitaaluu kúcoliyoot.
16 Nipoñ akee ti aluu ápikaacoopiyoo,
aluu keetowiye ka innimankee ti ékuluma.
Fiyuu inci fámeyi man páni inniyem ti hisoku.
Inci pisintoolo ti eloŋ ya eti amansa ya ati Esipt,
niŋ atuwaluu ácoliyoot ooto aluu mikelecoola!”
17 Fiye,
naamankii poko púlooŋ ti ékuluma fo kunoom káhaaciil.
18 Ti hinoom ha híhaaciyenu ha Josef naasokii:
“Niŋ níhinaa eeha inci nkaakaay ha aluu hisoku efiniloŋ,
kaatuko inci eefeye Pútuun.
19 Niŋ aluu keecoonoole,
nicoon akee taaluu aputowo ti ékuluma,
pakakee paka nkacoop paliyal pa miin ma mitaaluu meeyem ma niŋ peep.
20 Pale,
fo nícoopiyam kahiineen ka kitaaluu.
Fiyuu inci fámeyi man páni inniyem ti hisoku,
etiniket.”
Nkacoon eeha Josef naasoke ha.
21 Nkasokool:
“Páni unaa usiiŋanee-siiŋan ti pisiya kamma eeha núuhinaa ha atuwunaa Josef.
Ucukoocuk fa naaliime fa naaluum unaa uputaakaa paket hikaw teyoo,
upaaliitoo.
Ekina ewune kúnuul enke nkitaako unaa.”
22 Ruben naañahanii:
“Inci sokaasok aluu timpi níhin heenaput añii aŋuu pale nipaaliitam.
Fiye usiiŋanee ti pisiya kamma nuumukoo.”
23 Kápannumut nii Josef ásiyaasi eeha nkayem ha ti hisoku,
kaatuko ataakaataak ayesanoola kilim.
24 Fiye,
náalaaŋii apiyeno pukooŋ.
Púful toko naañoho pati ñúnuwoo naasokii nii acokaa Simeyon.
Nkacenkoo hátikinii.
25 Josef naawufan hilim píhina pa pakateyoo kapimeeŋan paliyal pupootak pa piteyii,
nkañahan an óo an mañ ma miteyoo ti epootak ya eteyoo.
Nkawufanii lompo paliyal piti kaakaawool ka kiteyii.
Píhina pa nkáhin ho.
Josef ñúnuwoo puñoho pa piteyii Kanaan
26 Josef ñúnuwoo nkanaŋ pupootak pa piti paliyal pa ti púfali pa piteyii,
nkakaay.
27 Ta incicoke ta,
nkasiiŋo kati kaŋot,
akee teyii náapankin epootak ya eteyoo kati awun pahoonal fáli ya eteyoo naacuk mañ ma ti putum epootak ya.
28 Naasok pákawiyoo:
“Kañahanaam-ñahan mañ ma mutoom.
Ehee mo ti epootak ya!”
Poko púlooŋ saanii insiñak nkayeno kakikilan.
Nkasokool:
“Weyme Pútuun pa mpíhine unaa fiye?”
29 Ta nkacole ta Kanaan ti paapaa ateyii Jakob,
nkakamanoo heetaakiyii ha púlooŋ,
nkasokoo:
30 “Ahámpaatiin a ati mah ma ákupaakup niŋ unii niŋ hilim heeyanke.
Naanook unii apusok nii unii mikelecoola.
31 Nuuñahanoo:
'Unii mikelecoola tom pale pakan keecoonoole.
32 Unii hínum pákayiin ŋaasuwan niŋ pákasupak,
faaf unii oonool.
Pale oonool toonii náacim,
kahiineen ka nkutowo niŋ paapaa atoonii ti mah ma miti Kanaan.'
33 Ahámpaatiin a ati mah ma naañahan unii:
'Ehe fa inci nkaakaay fa kameye man páni inniyem ti hisoku:
nikat le ti inci akee taaluu,
pakakee paka nkacoop paliyal miin ma mitaaluu meeyem ma niŋ peep.
34 Niŋ fúlaa toko ínnicoopiyam kahiineen ka kitaaluu.
Fiyuu inci fámeyi nii aluu mikelecoola tom pale pakan keecoonoole,
iññahan aluu áwi aluu,
nkatan aluu nipinoom ti mah ma.'”
35 Púful toko nkánuŋ pupootak pa piteyii,
an óo an naacuk éwasuma mañ niŋ mañ ma miteyoo.
Poko niŋ paapaa ateyii,
ta nkacuke ta mañ ma nkafe.
36 Paapaa ateyii Jakob naasokii:
“Nikitaam epuukam!
Josef aneetaat,
Simeyon lompo aneetaat.
Fiye,
ínnilafi hicoopu Benjamin?
Eehuu púlooŋ ti inci níhinowii!”
37 Fiye Ruben naasokoo:
“Niŋ inci ñáhaniyoot Benjamin,
áyyini ummuk pikampaani pa pakatoom pákasupak paka.
Ñomanamoo inci fáñahaniyoo.”
38 Jakob naañahanoo:
“Haani,
añiinam atawano niŋ aluu Esipt.
Púnuwoo aketaaket,
akina lamayoo kóŋ atowiye.
Niŋ waah utaakiyoo ti kaakaawool ka kitaaluu,
inci faket niŋ kúnuul pamaamanal.”