Púcook pa
Efantu 1
Hiliiluyee ha hiti púlunta pa niŋ waah óo waah weeyem lupo
1
Ti púcook pa,
Pútuun pa mpiliil patiila niŋ t’etaam.
2 Fiye,
etaam ya etaakut himuum etaakut likee pale man meeliiñoole ummuhootan etaam ya púlooŋ.
Enímaan néewufalool pásune man ma.
Kunuu ka kiti Pútuun pa nkiyeno káleeleehan patiila etemmo.
3 Púful toko,
Pútuun pa mpusok:
“Ecaaŋ etaako!”
Ecaaŋ ya neetaako.
4 Pútuun pa mpucuk nii ecaaŋ ya enapaanap.
Fiye,
mpíkatinool ecaaŋ ya niŋ énimaan ya.
5 Pútuun pa mpulu ecaaŋ ya “hanakan”,
mpulu lompo énimaan ya “hánant”.
Intaako kániim intaako lompo pucom:
hikina hiyem hinoom ha híyaañ ha.
6 Púful toko,
Pútuun pa mpusok:
“Káahaaŋ kitaako ti pututa man ma kípikatinool man ma miti patiila niŋ miti t’etaam!”
7 Fiye,
Pútuun pa mpíhin káahaaŋ ka,
mpíkatinool man ma miti patiila niŋ miti t’etaam,
iyyeno fo.
8 Pútuun pa mpulu káahaaŋ ka “patiila”.
Intaako kániim intaako lompo pucom:
hikina hiyem hinoom ha hísupiyenu ha.
9 Púful toko,
Pútuun pa mpusok:
“Man ma meeyem ma t’etaam muconcool nantoonool,
etaam eesuuce éfulii!”
Iyyeno fo.
10 Pútuun pa mpulu etaam ya eesuuce ya “etaam”,
mpulu lompo man ma meeconcooliye ma “kaatii”.
Pútuun pa mpucuk nii napaanap.
11 Fiye,
Pútuun pa mpusok:
“Etaam ya epukool píheeni óo píheeni empa mpitaak etukal,
niŋ enuun óo enuun eyya netaak ñaliyal niŋ pukoon!”
Iyyeno fo.
12 Etaam ya néepukii píheeni óo píheeni empa mpitaak etukal etempo,
niŋ enuun óo enuun eyya netaak paliyal eteyyo niŋ pukoon eteyyo.
Pútuun pa mpucuk nii napaanap.
13 Intaako kániim intaako lompo pucom:
hikina hiyem hinoom ha híhaaciyenu ha.
14 Púful toko,
Pútuun pa mpusok:
“Waah úsupak ewwa nuucaaŋan utaako patiila kati úkatinool hánant ha niŋ hanakan ha!
Waah ewwuu úyisan ñahaaño ña,
kunoom ka niŋ sitiil sa,
15 uyeno patiila upucaaŋan t’etaam!”
Iyyeno fo.
16 Pútuun pa mpíhin waah úsupak wenfakat ewwa nuucaaŋan:
weehaŋe wa pafom nuumankool hanakan ha;
weehaŋe wa káafomaati nuumankool hánant ha;
mpíhin lompo picaaŋaŋ pa.
17 Pútuun pa mpisiiŋan wo patiila upucaaŋan t’etaam,
18 kati umankool hanakan ha niŋ hánant ha núukatinool ecaaŋ ya niŋ énimaan ya.
Pútuun pa mpucuk nii napaanap.
19 Intaako kániim intaako lompo pucom:
hikina hiyem hinoom ha hípaakiilenu ha.
20 Púful toko,
Pútuun pa mpusok:
“Kaatii ka kimeeŋ niŋ soon niŋ pikee púlukuleen,
pusuwa píyititool patiila niŋ t’etaam!”
21 Fiye,
Pútuun pa mpiliil púlukuleen penfakat piti kaatii,
niŋ lompo élukuleen óo élukuleen eyya newac niŋ esuwa óo esuwa.
Pútuun pa mpucuk nii napaanap.
22 Pútuun pa mpisampan po mpusok:
“Nipukool nimeeŋan kaatii ka,
pusuwa pa lompo pimeeŋ t’etaam!”
23 Intaako kániim intaako lompo pucom:
hikina hiyem hinoom ha hísakiyenu ha.
24 Púful toko,
Pútuun pa mpusok:
“Etaam ya etaak élukuleen óo élukuleen:
puwuluwul niŋ piti elampa,
penkilis niŋ penfakat!”
Iyyeno fo.
25 Pútuun pa mpíhin élukuleen óo élukuleen ewuluwul niŋ élukuleen óo élukuleen eti elampa,
enfakat niŋ enkilis.
Mpucuk nii napaanap.
26 Fiye,
Pútuun pa mpusok:
“Umemanoolaa an éefule unaa,
samat nii unaa,
apiyeno ati hikaw ha ati soon sa,
pusuwa pa niŋ púlukuleen pa púlooŋ:
puwuluwul pa niŋ piti elampa ya,
penfakat pa niŋ penkilis pa empa mpumuusool pa t’etaam.”
27 Pútuun pa mpiliil an éefule po,
áyiin niŋ aal Pútuun pa mpiliile.
28 Pútuun pa mpisampanii mpusokii:
“Nipukool,
nimeeŋan etaam ya inniheek yo!
Niyeno pakati kikaw eteyyo,
kiti soon sa,
pusuwa pa,
niŋ púlukuleen pa púlooŋ empa mpumuusool pa t’etaam!”
29 Fiye,
Pútuun pa mpusok:
“Nísiitan,
inci ufanaa aluu píheeni óo píheeni empa mpitaak pukoon,
niŋ enuun óo enuun eyya netaak paliyal ti etaam ya púlooŋ.
Pukoon pa niŋ ñaliyal ña efiñiyeno pákuumanal aluu.
30 Pale púlukuleen pa púlooŋ piti elampa ya niŋ pusuwa pa púlooŋ niŋ púlukuleen pa púlooŋ empa mpumuusool pa t’etaam,
inci ufanaawufan po píheeni pa niŋ pahatal pa púlooŋ piti punuun pa pipiyeno pákuumanal etempo.”
Iyyeno fo.
31 Pútuun pa mpucuk nii eeha mpíhine ha púlooŋ hinapaanap meemak.
Intaako kániim intaako lompo pucom:
hikina hiyem hinoom ha heewase ha isak niŋ hoonool.
Ti púcook pa Pútuun pa mpiliil patiila niŋ etaam eetaakut himuum.
Man meeliiñoole ummuhootan yo púlooŋ.
Kunuu ka kiti Pútuun pa nkiyeno káleeleehan patiila etemmo.
Púful toko Pútuun pa mpusok ecaaŋ etaako,
toko hanakan niŋ hánant nkaliilee ti hinoom ha híyaañ ha.
Ee - ee - ee - Pútuun pa mpucuk nii napaanap.
Ti hinoom ha hísupiyenu ha,
Pútuun pa mpusok káahaaŋ kitaako kípikatinool man ma miti patiila niŋ miti t’etaam.
Ee - ee - ee - Pútuun pa mpucuk nii napaanap.
Pútuun pa mpusok man ma miti etaam muconcoolo nantoonool muluwee kaati,
etaam eesuuce éfulii epukool píheeni,
punuun peetaake ñaliyal niŋ pukoon.
Ti hinoom ha híhaaciyenu ha.
Ee - ee - ee - Pútuun pa mpucuk nii napaanap.
Ti hinoom ha hípaakiilenu ha Pútuun pa mpusok ecaaŋ etaako patiila,
caanak cicaaŋan hanakan ha,
hiim ha niŋ picaaŋan kacaaŋan hánant ha.
Ee - ee - ee - Pútuun pa mpucuk nii napaanap.
Ti hinoom ha hísakiyenu ha,
Pútuun pa mpusok kaatii ka kimeeŋ soon niŋ pikee púlukuleen,
pusuwa pa píyititool patiila niŋ t’etaam.
Ee - ee - ee - Pútuun pa mpucuk nii napaanap.
Pútuun pa mpusok etaam ya etaak élukuleen óo élukuleen,
nuumemanoolaa an éefule unaa.
Iyyeno fo.
Ti púcook pa Pútuun pa mpiliil patiila niŋ etaam eetaakut himuum.
Man meeliiñoole ummuhootan yo púlooŋ.
Kunuu ka kiti Pútuun pa nkiyeno káleeleehan patiila etemmo.
Ti púcook pa Pútuun pa mpiliil patiila niŋ etaam eetaakut himuum.
Man meeliiñoole ummuhootan yo púlooŋ.
Kunuu ka kiti Pútuun pa nkiyeno káleeleehan patiila etemmo.