Efantu 26
Káakup ka kiti Póol hátikin amansa ya Akilipa
26
Ta Festus naapaye ta káakup,
Akilipa naasok Póol:
“Aáyiniyini káakup aakati siiŋoolo.”
Fiye,
Póol náaseepin epeesoo apikican ñíhampaatiin ña,
naasok:
2 “Amansa yuu Akilipa,
fíyooy súumaamsuum meemak fa inci insiiŋiye fa hátikini pikamani kati siiŋoolo ti eeha púlooŋ Pusuwif pa nkanookaam ha.
3 Kaatuko áameyimeyi pinap cosaan ya púlooŋ eti Pusuwif pa niŋ enka núulaacinool ka tenko.
Fiye,
inci luumuu,
ponket síitanam.
4 “Pusuwif pa púlooŋ kámeyimeyi eloŋam kápiliŋ maañiiyaayam le Jerusalem ti mah ma mutoom.
5 Nkámeyiyam ta infiyye,
káyiniyini hisoku niŋ kálafiyaa nii páni,
inci hínum Afalisaay,
himpaac ha heehaŋe ha hicoku piliit tiw pítin pa putuunaa.
6 Fiye,
eheeyam ti íhinuyee kíiti kamma inci ínhine cíki nii Pútuun pa éfipihin eeha mpíyinanane ha símaama unaa.
7 Miin ma ŋaasuwan niŋ músupak ma miti pakan paka pakatuunaa ímmihin cíki lompo ti eehuu,
ekina ewune nkaluum Po meemak hánant hanakan.
Pale kamma inci lompo ínhine cíki ti eehuu,
amansa yuu,
ekina ewune pakanam Pusuwif pa nkanookam.
8 Aluu Pusuwif pa nipookaapook káyinan nii Pútuun pa mpilitanlitan keekete ka.
Weyme uwune?
9 “Inci himuumam míiloolaa-míilool hínum nii ñaŋaa íhinu waah wa púlooŋ kati hokan caacaw Yéesu ati Naasalet.
10 Hikina inci ínhine Jerusalem.
Uwwant ti ékuluma hícump keesampanee ka pakati Pútuun pa,
samat nii fa ñíhampaatiin puwaaseena pa pakati Pútuun pa nkawufanaam fa sempe píhin ho.
Niŋ kawufanii kaamuuyen kati kamukee,
inci insayan himukuyee ha hiteyii.
11 Iyyeno kaamuusool ti púluumuma pa púlooŋ nkallan kéeyinane ka kati kateñal caacaw Yéesu.
Intaak paseeña penfakat teyii fo innapanii ti pisaatee péelaaŋe.”
Kakaman ka kiti Póol fa náayinane fa ti Ateeteyo
12 Póol nene asok Akilipa:
“Amansa yuu,
fiyuu inci iyyeniye pikaayu ti saatee ya eti Damas,
ñíhampaatiin puwaaseena pa pakati Pútuun pa kapoñaam po,
nkawufanam sempe siti hicoku keeyem ka ti pítin pa piti Yéesu.
13 Inci ti pítin pa caanak ca ti hikaw,
incuk ecaaŋ éefulii patiila eehaŋe caanak ca pacaaŋ.
Néekinkoolam niŋ pákawiyam keeyeniye ka pinapool niŋ inci.
14 Nuunow t’etaam unii púlooŋ,
ínsi hilim heesokaam ti kaŋ ya eti Alam:a
'Sóol Sóol weyme uwune áyyemiyam ti kaakallan?
Aapa ti eyokanoolo kenseŋ samat nii fáli eepooke pikaayu háati ateeteyo naasap yo.'
15 Incakan:
'Awe yem ayme,
Ateeteyo?
' Ateeteyo naañahanam:
'Inci yem Yéesu aŋa ayyem ya ti kaakallan.
16 Pale lito insiiŋo,
kaatuko yísanoolaa-yísanoolo ti awe aakati yeno áhina ya atoom niŋ eetantake ya atoom.
Aafasok pakan paka fa ancukaam fa fíyooy niŋ eeha inci nkaakaayi ha nene káyisan.
17 Inci fafakani ti pakani Pusuwif pa niŋ lompo ti keeneetaat ka Pusuwif,
pa inci nkaakaayi pa hipoñu.
18 Pupoñi aakati káapankin ñíkinii ancuk káfuliyoo ti énimaan kápiyesoonii ti ecaaŋ,
nkáfulii lompo ti sempe sa siti Seetaani kápiyesoonii ti Pútuun pa.
Pupoñi lompo aakati káapankin ñíkinii ancuk umuuyen wa uteyii uponketee,
nkataak káayenuma ti payenka Pútuun pa mpisampane ka kamma nkáyinane ti inci.'”
Káakup ka kiti Póol kiti páhin pa piteyoo
19 Póol nene asok:
“Amansa yuu,
fiye,
waah wa wéefulii wa ti inci patiila,
ŋesut hipooku íhinu eeha nuusokaam ha.
20 Incóok káatuunan pakati Damas,
pakati Jerusalem,
pakati mah ma miti Judaay púlooŋ niŋ keeneetaat ka Pusuwif.
Insokii káwunko umuuyen wa uteyii kápiyesoonii ti Pútuun pa nkáhin páhin peenape peenapoole niŋ eloŋ eeyesane.
21 Eehuu hiwune Pusuwif pa nkacokam ta inci iyyeniye ta ti ekumpaan ya enfakat ya eti Pútuun pa,
nkaŋes himukuyam.
22 Pale Pútuun pa umpa ti hifaasuyam fo fíyooy,
ekina ewune inci íyyemi eetantake ya atempo hátikin pakan paka púlooŋ,
písik ti keemaka ka fo ti kéetinee ka.
Sokut ukee waah fo ewwa piyaamakoola pa niŋ Móyiis nkasoke wa nii efuutaako.
23 Kasok nii,
Eenucee ya afaakallo,
afaayeno lompo éeyaañee ya alitanee ti eket ya náatuunan pakanoo Pusuwif pa niŋ keeneetaat ka Pusuwif ekooŋan ya éesuume ya eti Pútuun pa eekaakaay ya kaacaaŋan pítinii.”
Piŋiino pa piti Póol Akilipa ápiyinan
24 Ta Póol naayeniye ta káakup kati asiiŋoolo,
Festus náaceekii:
“Aawuyaawuyo Póol!
Aakalaŋaakalaŋ fo awwuyye!”
25 Pale Póol naasokoo:
“Eñaap yuu Festus,
inci wuyiit.
Kilim enka inci insoke ka kiti páni apan keetempiye tak.
26 Amansa ya Akilipa ásiyaasi ta infiyye enka inci iyyem ka ti hisoku,
ekina ewune inci nkúp niŋ híyiinate hátikinoo.
Híiniyaamhiini nii ámeyimeyi enkuu púlooŋ.
Kaatuko kíhinutee ti piyolo.”
27 Fiye,
Póol naasok Akilipa:
“Amansa yuu,
fo áayinanaayinan ti enka piyaamakoola pa nkasoke ka?
Méyimeyi nii áayinanaayinan!”
28 Akilipa naasok Póol:
“Fiye áalafiyaamlafi íhinu Akelecen toko fiye?”
29 Póol naañahanoo:
“Toko fiye niŋ ekina tom po hátikin,
inci oopa ti kaluum Pútuun pa,
sokut nii ti awe lamma pale keeyemaam ka púlooŋ ti káasiitan fíyooy,
kati kacuk nii inci,
fo ínfulaa ñiseel ña!”