पतरस तइरकासी पहिल चिठी
1
परिछ'अना
1 ऎन पतरस येसु मसीसी तइरकन रॊम चक पोन्तोस अरा गलातिया अरा कप्पदोकिया अरा आसिया अरा बितुनिया नू छितयारर ती जोक्क उल्ला गे र'उर लेक्खा उज्जू धर्मेस ती चजरका आलर गे ई चिठिन लिखदन। 2 धर्मे बंगस तान हुल्लो तिम ठंचका लेक्खा निमन चजकादस, अरा नीम आसिन पॆस्र'आ गे आसी बॊलतस निमन नेम्हा नंजकादस, अरा येसु मसीसी ख़ॆंस ती नॊड़रकादर। धर्मेसी मया अरा कोड़े कोड़हे ती कोड़हे निमा मनन नेकअन।
जनमजुग उज्जना ही कोड़हे असरा
3 नम्है उर्बस येसु मसीसी बंगस धर्मेस गे उर्मी ओहमा मनन नेकअन। आस तंग्है कोड़हे सोग्गे ही चड्डे येसु मसीसिन केच्चकर ती उज्जत'अना ती नमा गे ओन्टा पुना कुन्द्रनन चिच्कादस। इदही चड्डे नाम कोड़हे असरा गने उज्जदत। 4 इदही गने धर्मेस निमा गे ओन्टा कोड़हे आसीसन मेर्ख़ा नू उइय्कादस। आद इकला हूँ मल नठार'ई अरा सोतरा मल मनी अरा मल चड़मी। 5 नीम गा आ नाड़रनन ख़क्खना गूटी निम्है पत्त'अना ती धर्मेस तंग्है सवंग ती निमन ख़ापालदस। आ नाड़रना छेद्दे बेड़ा नू दहदर मना गे सपड़ारकी र'ई। 6 ई नाड़रना ही पत्त नू नीम कोड़हे रिझ्रदर, अन्नु हूँ अक्कुन जोक्क बेड़ा गे निमा कैनो रकम ही खिलपत सहना ही चाड़ र'ई। 7 निम्है पत्त'अना मानिम एन्ने पुरुब मना गे इबड़ा खिलपत गुट्ठी निमा गे बर'ई। नठारना सोना चिच्ची ती गलाबातार'ई। औंगे सोना ती कोड़हे मईन ही निम्है पत्त'अना खिलपत गुट्ठी ती बिढ़्रना दिम र'ई। निम्है पत्त'अना बिढ़्र'ई ख़ने, येसु मसीस गोट्टा सौंसार गे तंगन दहदर ननो बारी नू नीम ओहमा अरा महबा अरा मईन आबोन ख़क्खोर। 8 आसिन नीम मल्ला ईरका अन्नु हूँ आसिन चोन्हा नन्दर। नीम आसिन मल ईरका ती हूँ अक्कु आसिन पत्त'अदर ती तेंगा पोलना रिझ अरा कोड़हे मईन गने रिरयारदर। 9 एन्देरगेका नीम निम्है पत्त'अना ही इनाम ख़क्खदर। ईद निम्है जिया गुट्ठी ही नाड़रना हवे।
10 एका मया निमा गे ख़क्ख्रना रहचा, अदही पत्त नू तिंका धर्मेसी कत्था तिंगुर ई नाड़रना ही पत्त नू दिम कोड़हे बेद्दना ख़ॊजना नू रहचर। 11 मसीसी बॊलता आर ही नू रहचा, अरा आरिन तिंगिया का एकासे मसीस दुक्खे चॊद'ओस अरा अदही ख़ॊख़ा कोड़हे मईन आबोन ख़क्खोस। औंगे आर इदही बेद्दना ख़ॊजना ही चिहुट नंजर का इदही बेड़ा एकाबारी बर'ओ, अरा आद एकासे बर'ओ। 12 आर गे तेंगतारा केरा का इबड़ा कत्था गुट्ठी तम्है उज्जना बेड़ा नू मल मनो, लिकिन बग्गे चाँन ही ख़ॊख़ा निम्है बेड़ा नू मनो। अरा मेर्ख़ा ती तइरका नेम्हा बॊलतासी सवंग ती निमा गे दौ कत्था तिंगुर ती अक्कुन ई दौ कत्था मेन्तारकी र'ई। ईद कोड़हे बॆस हवे का मेर्ख़ा पैकर हूँ इबड़ा कत्था गुट्ठी मन्नन ऎरा गे चिबाख़ारनर।
नेम्हा र'आ
13 औंगे नीम अपन अपन जियन नलख नना गे सपड़'आ। अरा खतिर नन्ना ती र'आ। अरा येसु मसीसी दहदर मन्ना ही बेड़ा नू निमा ख़क्ख्रना र'ई आ मया मइय्याँ निम्है उर्मी असरा आबोन उइय्या। 14 मुन्द नीम मल बुझ्रना नू रहचकर ख़ने, मलदौ चिबाख़ारना गुट्ठी निमा नू रहचा। अदही लेक्खा अक्कुन हूँ मल उज्जरकी पॆसकन पॆस्र'ऊ ख़द्दर लेक्खा मना। 15 निमन चुनचका धर्मेस एकासे नेम्हा र'अस, अन्नेम नीम हूँ निम्है सौंसे उज्जना ओक्कना नू नेम्हा र'आ। 16 एन्देरगेका नेम्हा पुथी नू लिख्रकी र'ई, “ऎन नेम्हा र'अदन, औंगे निमा हूँ नेम्हा र'अना र'ई।”†
17 अरा बिगर तीना ख़ाँड़ना ती उर्मी आलारिन अपन अपन नंजका नलख ही लेक्खा नेंवई ननू मेर्ख़ा बंगासिन नीम गोहरारदर। औंगे इसन ख़ॆख़ेल नू नीम जोक्क उल्ला गे र'उर लेक्खा उज्जना बेड़ा गूटी इल्चका अरा कोड़हे मईन गने उज्जा ऎका। 18 एन्देरगेका नीम अख़दर का निम्है पूरखर ती इत्तनुम बर'आ लगी निम्है अयंदहा उज्जना ही डहरे ती निम्है नाड़रना सोना मलता चाँदी लेक्खा नठारना आलॊ ही दाम ती मल मंजकी र'ई। 19 लिकिन नीम बिगर बदी अरा बिगर पाप ही भेंडो ख़द्द लेक्खा मसीसी कोड़हे दाम ही ख़ॆंस ती नाड़रकादर। 20 आस ख़ॆख़ेल गढ़्रना ही मुन्द तिम चाजरकाचस। लिकिन इबड़ा मुंजा ता बेड़ा गुट्ठी नू निमा गे दहदर मन्तारकादस। 21 आस ती दिम नीम अक्कु धर्मेसिन पत्त'अदर। धर्मेस दिम आसिन केचका ती उज्जताचस ती आस गे महबा चिच्चस। औंगे निम्है पत्त'अना अरा असरा धर्मेस मइय्याँ र'ई।
22 अक्कु गा निम्है जिया गुट्ठी मानिमन पॆस्रका ती सुध मन्रकी र'ई। ख़ने नीम निम्है भई बहिनर ही मइय्याँ मानिम चोन्हा उइय्कादर। औंगे नीम ओर्त ओर्त गने मानिम जिया गने कोड़हे चोन्हा नना। 23 एन्देरगेका नीम नठारना बिहनी ती मला, उज्जना अरा सदौ बन्चका र'अना धर्मेसी कत्था ही मल नठारना बिहनी ती पुना कुन्द्रनन ख़क्खका र'अदर। 24 एन्देरगेका नेम्हा पुथी एन्ने ब'ई का,†
“उर्मी आलर लट्टी लेक्खा र'अनर,
अरा आर ही ओर्मा महबा लट्टी ही पूंप लेक्खा र'ई।
लट्टी ख़ा'ई क'ई अरा पूंप निदगी क'ई।
25 लिकिन उर्बासी कत्था गा सदौ बन्चकी र'ई।”
ईदिम दौ कत्था ही कत्था, एकदा निमा तेंगरा।