इब्रानी 10

ओन्‍होन लेका ओर्मर गे मसीसी दाँड़े

¹ मूसासी नॆग बरना दौ जिनिस ही ऎख़ लेक्‍खा दिम र'ई। अबड़ा नू तम्‍है ती धर्मेस चि'ऊ दौ जिनिस मलकी। ई चड्डे दिम चानुम घड़ी घड़ी नंजका दाँड़े ती नॆग महबा नना गे बर'ऊ आलारिन कहियों पखड़ नना पुल्‍ली। ² नॆग आरिन पखड़ नना ऊंगका होले, दाँड़े अरगना मुंजुरकी र'ओ दने। महबा ननू आलर गा ओंग्‍होन लेका सुध मंज ख़च्चिका ती फेन आर ही लखना आरिन बदी मल टेक'आ ब'ओ दने। ³ लिकिन इबड़ा दाँड़े उर्मी चान पाप गुट्ठिन सुरता ननू र'ई। ⁴ एन्‍देरगेका बछा अरा बोकड़ा गुट्ठी ही ख़ॆंस पाप गुट्ठिन कहियों ओथ्र'आ पुल्‍ली।

⁵ इदगेम येसुस ख़ॆख़ेल नू बरना बेड़ा नू धर्मेसिन बाचस,

“दाँड़े अरा दान गुट्ठिन नीन मल बिद्दकय,

लिकिन एंगा गे ओन्‍टा मॆदन दाँड़े अरग'आ गे सपड़ाचकय।

\wj ⁶ बस्‍सना दाँड़े गुट्ठिन अरा नन्ना दाँड़े गुट्ठिन\wj*

एकदा पापन ओथ्र'आ गे नन्नर अबड़न नीन मल पत्तारकय।

\wj ⁷ औंगे ऎन बाचकन, ‘ऎरा! नेम्‍हा पुथी नू लिख्रका लेक्‍खा,\wj*

अना धर्मे! ऎन निंग्‍है मनेन नना गे बरचकादन।’”

⁸ म‍इय्याँ आस बाचस का, “धर्मेस दाँड़े अरा दान अरा बस्‍सना दाँड़े अरा पापन ओथ्र'आ गे नन्ना ही दाँड़े गुट्ठिन मल बिद्दियस अरा अबड़ा ती आस मल पत्तारस।” अन्नु हूँ मूसासी नॆग ती अबड़ा गे चाड़ र'ई। ⁹ फिन आस बाचस, “ऎरा, ऎन निंग्‍है मनेन नना गे बरचकादन।” औंगे आस मुन्‍द ता चालन ताड़चस ती नन्ना चालन ओक्‍त'अदस। ¹⁰ ई लेक्‍खम आसी मने ती नाम येसु मसीसी मॆद ही उनीम हॆल दाँड़े मन्ना ती नेम्‍हा मन्‍तारका र'अदत।

¹¹ उर्मी नैगर गा गोड़हा ही मुन्‍दहारे इजनर ती उर्मी उल्‍ला तम्‍है नैग नलखन नन्नर। अरा घड़ी घड़ी उनुम मदहे दाँड़ेन अरगनर। इबड़ा दाँड़े गा पाप गुट्ठिन ओथ्र'आ गे कहियों पुल्‍ली। ¹² लिकिन नम्‍है कोहाँ नैगस येसुस गा पाप गुट्ठी ही उनिम दाँड़ेन सगर घड़ी गे अरगस ती धर्मेसी तीना चोक्‍ख उक्‍कियस। ¹³ अरा आस असन तंग्‍है बैरिर तंग्‍है ख़ेडमूली खत्तर'ओर आ गूटी पाब ऎरा लगदस। ¹⁴ औंगे आस उनिम दाँड़े ती नेम्‍हा मनू आलारिन जनमजुग गे पखड़ नंजस।

¹⁵ अरा नेम्‍हा बॊलतस हूँ नमन इबड़ा ही पत्त नू गोवाह चि'अदस। आस गा ब'अदस,

¹⁶ “अबड़ा उल्‍ला ही ख़ॊख़ा ऎन उर्बस

आर गने पुना गच्‍छरनन गच्‍छर'ओन,

आद ईद का, ऎन एंग्‍है नॆग गुट्ठिन

आर ही जिया नू उइय्योन अरा अबड़न

आर ही जिया नू लिख'ओन।”

¹⁷ अउर हूँ आस ब'अदस,

“ऎन आर ही पाप अरा मलदौ नलख गुट्ठिन

फेन कहियों मल सुरत'ओन।”

¹⁸ औंगे अक्‍कु एसन पाप गुट्ठी अम्‍बतारा केरा असन पाप गुट्ठिन ओथ्र'आ गे एन्‍द्रा हूँ दाँड़े ही चाड़ मलकी।

धर्मेसिन असरा नन्‍ते र'अना

^19-20 औंगे अना भ‍ईरो! मेर्ख़ा ता कोड़हे नेम्‍हा अड्डा नू नमा कोर'आ गे येसुस तंग्‍है मॆद लेक्‍खा ता परदा नू मन्नुम ती तंग्‍है खे'अना ती ओन्‍टा पुना अरा उज्‍जना ही डहरेन नमा गे तिसिगका र'अस। आ डहरे ती असन कोर'आ गे आसी ख़ॆंस ती नमा गे डिढ मनी। ²¹ अरा आस नम्‍है कोहाँ नैगस र'अना ती आस धर्मेसी एड़पा ता आकुस ननुस र'अस। ²² औंगे बरा! नाम बड़ियर पत्त'अना गने मानिम जिया गने धर्मेसी हेद्दे बर'ओत, एन्‍देरगेका नम्‍है लखना ही बदी आबोन तरकूटी नना गे नम्‍है जिया मसीसी ख़ॆंस ती सुध मंजकी र'ई अरा नम्‍है कया निमन अम्मु ती नूड़की र'ई। ²³ अरा नॆ नमा गे गच्‍छरनन चिच्कादस आस पत्त'अना जॊगे र'अदस। औंगे नाम गोवाह चि'ऊ असरा आबोन ठिमठिम गने धरचका र'ओत। ²⁴ नाम चोन्‍हा नन्ना नू अरा दौ नलख नन्ना नू एकासे तंग्‍है ती नन्नारिन रिझ्रत'आ ओंगोत अदही पत्त नू सोचना र'ई। ²⁵ अरा एकासे जोक्‍क आलर नन्नर अन्ने नमा ख़ॊंड़रनन मल अम्‍बना र'ई। नाम अख़दत का धर्मेस आलारिन राजी नन्ना ही उल्‍ला हेद्दे अंड़सा लगी। औंगे तंग्‍है ती नन्नारिन रिझ्रत'अनुम र'ओत।

²⁶ मानिम कत्‍था ही पत्त ता लूरन ख़क्ख्रका ती हूँ नाम अख़नुम अख़नुम बिगर इल्चका ती पाप नन्ना बारी र'ओत होले, पाप गुट्ठिन ओथ्र'आ गे फेन एन्‍द्रा हूँ दाँड़े मल्‍ला। ²⁷ लिकिन नमा गे भयभयान रायबड़ी अरा धर्मेसी बैरीरिन बस्‍सना चि'अना हदकारना चिच्‍ची आबोन दिम पाब ऎरना र'ई। ²⁸ मूसासी नॆग आबोन मल मन'ऊ आलासिन दुई महले तीन गोटंग गोवाह ती बिगर सोग्‍गे ऎरना ती पिटतार'आ लगिया। ²⁹ अन्ने होले सोच'आ का, एकास धर्मेसी ख़द्दासिन म‍ईन मल नंजस, अरा तंगन नेम्‍हा नन्‍ताचका पुना गच्‍छरना ही ख़ॆंसन नेम्‍हा मल मन्‍चस, अरा मया चि'ऊ नेम्‍हा बॊलतन लज्‍जे मॊख़ताचस, आस एका कोड़हे दंडे ही जॊगे मनोस दने। ³⁰ एन्‍देरगेका नाम अख़दत का धर्मेस एन्‍देर बाचस। आस बाचस,

“बदली किर्त'अना एंग्‍है नलख र'ई।

ऎनिम बदली किर्त'ओन।”

अरा अउरिम ईद एन्ने बारकी र'ई,

“उर्बस तंग्‍है आलारिन नेंव‍ई ननोस।”

³¹ उज्‍जना धर्मेसी ख़ेक्खा नू खत्रना कोड़हे भयभयान र'ई।

³² धर्मेसी बिल्‍लिन ख़क्खका मुन्‍द ता उल्‍ला गुट्ठी नू नीम एकासे रहचकर, अदिन सुरता नना। अबड़ा उल्‍ला नू नीम कोड़हे खिलपत अरा सस्‍ती नू हूँ जिटजिट ने इज्‍जका रहचकर। ³³ एका एका बारी गा नीम गोंहड़ा ही मुन्‍दहारे लज्‍जे मॊख़रकर अरा डाहरकर। अरा एका एका बारी नीम एन्ने दसा नू र'उर गने संगे चिच्‍कर। ³⁴ अरा नीम हॆंरका आलर ही दुक्‍खे नू हूँ दुक्‍खे सारचकर। अरा इकला निम्‍है ओर्मा खुर्जी निम्‍है ती होरा, अदिन नीम रिझ गने इंझ्रकर, एन्‍देरगेका नीम अक्‍कर का इबड़ा ती कोड़हे बॆस अरा उर्मी उल्‍ला मल नठार'ऊ खुर्जी निमा गे ख़क्ख्र'ऊ र'ई।

³⁵ औंगे नीम उर्बस नू र'ऊ निम्‍है बड़ियर असरा आबोन अमा अम्‍बा, आद निमा गे कोड़हे ख़ंजपन उन्‍द्र'ई। ³⁶ निमा सहना ती र'अना चाड़ र'ई। होले नीम धर्मेसी मनेन नंज ख़च्चिका ती आसी गच्‍छरका ख़ंजपन ख़क्‍खोर। ³⁷ एन्‍देरगेका नेम्हा पुथी नू एन्ने लिख्रकी र'ई का,

“जुक्‍की बेड़ा नू, बर'उस बर'ओस

अरा घड़ही मल ननोस।

³⁸ एंग्‍है उजगो आलर पत्त'अना ती उज्‍जोर।

लिकिन अबड़र नू एक‍अम ओर्तस पछली किरदस होले,

ऎन आसिन मल पत्तार'ओन।”

³⁹ लिकिन नाम गा धर्मेस ती पछली किर्रना ती नठार'ऊ आलर मदहे मलदत। नाम पत्त'अरकी जियन बछाब'ऊ आलत हिकदत।