1 कोरिन्‍थ 2

मसी अरा क्रुस ही पत्त नू तेंगना

¹ अना भईरो, इकला ऎन धर्मेसी गम आबोन निम्‍है गुसन तेंगा बरचकन ख़ने, ऎन ब'अना नू दौ गने महले कोड़हे लूर गने मल बरचकन। ² एन्‍देरगेका ऎन निम्‍है नू येसु मसी अरा क्रुस नू आसी खे'अनन अम्‍बरकी नन्‍ना इन्द्रिइम ही पत्त नू मल तेंगा गे तिगचका रहचकन। ³ अरा ऎन लेड़पोंयहा अरा इलिच्‍क'आ अरा बग्‍गे अस्रनुम तिम निम्‍है गने रहचकन। ⁴ अरा एंग्‍है ब'अना अरा एंग्‍है तेंगा कुद्दना नू लूर ही लोभाब'अना कत्‍था मल्‍ला, लिकिन‍ नेम्‍हा बॊलतासी सवंग ही ऎदना चि'अना रहचा। ⁵ होले निम्‍है पत्त'अना आलर ही लूर नू मला, लिकिन धर्मेसी सवंग ही मइय्याँ मनो।

धर्मेसी लूर

⁶ अन्नु हूँ पत्त'ऊ आलर नॆ पखड़ मंज ख़च्‍चिकानर आर ही नू ऎम लूर ही पत्त ता कत्‍थन तेंगदम। लिकिन ई लूर ख़ॆख़ेल ता महले नठार'ऊ ई ख़ॆख़ेल ता राजी ननुर ही लूर मल्‍ली। ⁷ ऎम गा धर्मेसी लूरन, नूख़्रका गम आबोन लेका तेंगदम। इदन धर्मेस ख़ॆख़ेल ही ऒरे ती मुन्‍द तिम नाम मसीसी महबा नू हिसा मना गे ठनचस। ⁸ लिकिन इदन ई ख़ॆख़ेल ता राजी ननुर नॆ हूँ बल्‍लर। आर अक्‍का होले महबा ती निन्‍द्रका उर्बासिन क्रुस नू मल ठोक'ओर दने। ⁹ लिकिन नेम्‍हा पुथी नू एन्ने लिख्रकी र'ई का,

“धर्मेस तंग्‍है नू चोन्‍हा ननुर गे सपड़ाचका जिनिसन

एका ख़न्न हूँ मल ईरकी र'ई,

महले एका ख़ेबदा हूँ मल मेंजकी र'ई

महले एका मन हूँ मल सोचकी र'ई।”

¹⁰ लिकिन धर्मेस तंग्‍है नेम्‍हा बॊलतस ती अबड़न नमा गे दहदर नंजस, एन्‍देरगेका नेम्‍हा बॊलतस उर्मी कत्‍थन अरा धर्मेसी ख़ोड़ख़ा गम कत्‍थन हूँ अगम'ई। ¹¹ ओर्त आलासी सोच आबोन आ आलासी बॊलतन अम्‍बरकी नॆ हूँ अख़'आ पोलनर। ई लेक्‍खम धर्मेसी बॊलतासिन अम्‍बरकी नन्‍नर नॆ हूँ धर्मेसी सोच आबोन अख़'आ पोलनर। ¹² अक्‍कुन नाम ई ख़ॆख़ेल ता बॊलतन मला, लिकिन धर्मेस ती बरचका बॊलतन ख़क्‍खकादत, इत्रु ती नाम धर्मेस नमा गे सिथिया नू चिच्का दौ जिनिस गुट्ठिन अख़'आ ओंग्दत। ¹³ इबड़ा कत्‍थन ऎम आलर ही लूर सिखाबाचका कत्‍था गुट्ठी ती मला, बॊलतासी सिखाबाचका कत्‍था ती तेंगदम। एन्नेम बॊलता ही मानिम कत्‍था गुट्ठिन बॊलतासी कत्‍था गुट्ठी ती बुझाब'अदम। ¹⁴ नेम्‍हा बॊलतासिन मल ख़क्‍खका आलस धर्मेसी बॊलतस ती बरना मानिम कत्‍था गुट्ठिन मल इंझ्र'ओस, एन्‍देरगेका अबड़ा आसी ऎरना नू बयला कत्‍था हवे। अरा आस अबड़न मल बुझ्रदस, एन्‍देरगेका नेम्‍हा बॊलतस लेका आलर गे धर्मेसी कत्‍था गुट्ठिन बुझ्र'आ गे संगरा नना ओंग्दस। ¹⁵ लिकिन नेम्‍हा बॊलतस तंग्‍है नू र'ऊ आलस उर्मिन दिम बिढ़दस ती बुझ्रदस, लिकिन तान गा नॆख'आ ती हूँ बिढ़्रदस ती बुझ्र'आ पोलदस। ¹⁶ एन्‍देरगेका नेम्‍हा पुथी नू बाचका लेक्‍खा,

“उर्बस गे सिखाब'अना लेक्‍खा

आसी जियन नॆ अक्‍की र'ई?”

लिकिन नाम गा मसीस नन्ना लेक्‍खा सोच'ऊ आलत हिकदत।