कोरिन्थ कलीसिया गे पौलुस तइरकासी पहिल चिठी
1
मोंजरा
1 धर्मेसी मने ती मसी येसुसी तइरका मना गे मॆख़्रका पौलुस एंग्है तरती अरा नम्है भईस सॊस्थेनॆसी तरती ई चिठी र'ई। 2 कोरिन्थ नगरे नू मसी येसुस नू नेम्हा मन्तारका अरा नेम्हा मना गे मॆख़्रका धर्मेसी कलीसिया गे अरा नमा अरा आर ही उर्बस नम्है येसु मसीसी नामेन उर्मी अड्डा नू ऒड़ ननू ओर्मर गे ऎम लिखदम।† 3 नम्है धर्मे बबस अरा उर्बस येसु मसीस ती निमा गे मया अरा कोड़े ख़क्ख्र'अन नेकअन।
धन्यवाद
4 नीम मसी येसुसी र'अना ती धर्मेसी मया निमा गे चितारा, अदगे ऎन निमा चड्डे उर्मी बारी धर्मेस गे धन्यवाद नन्दन। 5 नीम मसीसी र'अना ती नीम निम्है उर्मी ब'अना नू अरा निम्है उर्मी लूर नू उर्मी मदहे नू उरुब मन्तारका र'अनर, 6 एन्देरगेका मसीसी पत्त ता एम्है गोवाह निमा नू पखड़ ईथरकीचा। 7 औंगे नम्है उर्बस येसु मसीसी किर्रना ही पाब ईरु आलर नीम एकअम बॊलता ही इनाम नू खंगती मल मन्दर। 8 धर्मेस निमन मुंजा गूटी पत्त'अना नू बड़ियर उइय्योस। औंगे नीम नम्है उर्बस येसु मसीसी किर्रना उल्ला नू बिगर बदी ही र'ओर। 9 धर्मेस पत्त'अना जॊगे र'अदस, आस निमन तंग्है ख़द्दस नम्है उर्बस येसु मसीस गने मेस्रना नू र'आ गे मीख़कादस।
कलीसिया ही ख़ाड़रना
10 अना भईरो! ऎन नम्है उर्बस येसु मसीसी आकुस ती निमन ने'अदन का नीम ओर्त ओर्त गने मेस्र'आ ती उज्जा, होले निम्है मझी नू ख़ाड़रना मल मनो। अरा नीम ओन जिया अरा ओन मने ती मेस्र'आ ती र'आ। 11 अना एंग्है भईरो, निम्है मझी नू नग्गानख्रना गुट्ठी र'ई एन्ने ऎन ख़लोऎ ही एड़पातर ती मेंजकन। 12 एंग्है ब'अना ईद र'ई का, निम्है ती जोक्कोर ब'अनर, “ऎन पौलुसी चोख़र'ऊ हिकदन” नन्नर ब'अनर, “ऎन अप्पोल्लॊसी चोख़र'ऊ हिकदन” नन्नर ब'अनर, “ऎन पतरसीa चोख़र'ऊ हिकदन” अरा नन्नर ब'अनर, “ऎन मसीसी चोख़र'ऊ हिकदन।”†
13 एन्देर मसीस भगीयरका केरका र'अदस का? एन्देर ऎन पौलुस निमा गे क्रुस नू पिटतारका रहचकन का? एन्देर नीम पौलुसी नामे नू नॊड़रका रहचकर का? अन्ने मल्ला। 14 ऎन क्रिसपोस अरा गायोसिन अम्बरकी निम्है ती नॆकन हूँ मल्ला नॊड़रताचका, इदगे ऎन धर्मेस गे धन्यवाद नन्दन।† 15 औंगे नॆ हूँ ब'आ पोल्लदर का नीम एंग्है नामे ती नॊड़रकर। 16 (हाँ, ऎन स्तेफनासी एड़पातारिन हूँ नॊड़रताचकन। एंगा सुरता मला का ईरिन अम्बरकी अउर नॆकन हूँ ऎन नॊड़रकन।)† 17 मसीस एंगन नॊड़रता गे मला, दौ कत्थन तेंगा गे तइय्का र'अदस। अरा मसीसी क्रूस अनभनियाँ मल मना गे एंगन ख़ॆख़ेल ता बिगर लूर ती दौ कत्थन मेन्त'आ गे तइय्यस।
मसीस दिम धर्मेसी लूर अरा सवंग
18 क्रूस ही पत्त ता सिखाब'अनन खे'अना ही डहरे नू कालू आलर खईता बुझुरनर। लिकिन नाड़रनन ख़क्खू आलर नमा गे आद धर्मेसी सवंग हवे। 19 नेम्हा पुथी नू एन्ने लिख्रकी र'ई का
“लूरगर ही लूरन नठाब'ओन चि'ओन
अरा अख़'उर ही अख़नन अनभनियाँ ननोन चि'ओन।”†
20 एसन र'अनर लूरगर? एसन र'अनर बग्गे पढ़चका आलर? एसन र'अनर ई ख़ॆख़ेल ता कोड़हे लूर उइय्यू आनानखर'उर? एन्देर धर्मेस ई ख़ॆख़ेल ता लूरन खईता मल कमचका र'अदस का?† 21 एकासे का ख़ॆख़ेल तंग्है लूर ती धर्मेसिन मल अख़ना लेक्खा, तंग्है लूर ती धर्मेस इदन नंजकादस। औंगे खईता लेक्खा ईथर'ऊ एम्है दौ कत्था तेंगना ती पत्त'उरिन नाड़ा गे धर्मेस मने नंजस। 22 यहूदीर गा चिन्हा गुट्ठिन बेद्दनर अरा नन-यहूदीर लूरन बेद्दनर। 23 लिकिन ऎम गा क्रुस नू ठोकचका मसीसी पत्त नू तेंगा कुद्दम। ईद यहूदीर गे मूड़ना ही चड्डे र'ई, अरा नन-यहूदीर गे खईता र'ई। 24 लिकिन यहूदीर ती अरा नन-यहूदीर ती धर्मेस नॆकन मॆख़्रकादस, आर गे मसीस दिम धर्मेसी सवंग अरा धर्मेसी लूर हिकदस। 25 एन्देरगेका धर्मेसी बोका मन्ना गा आलर ही लूर ती कोड़हे लूर र'ई, अरा धर्मेसी पयहा मन्ना गा आलर ही सवंग ती कोड़हे सवंगिय र'ई।
26 अना भईरो, नीम मॆख़्रका बारी एकासे रहचकर अदिन सोच'आ। आलर ही ऎरना नू निम्है ती बग्गेर लुरगर मलकर अरा सवंगिय मलकर अरा कोहाँ एड़पा नू कुन्द्रका मलकर। 27 लिकिन धर्मेस गा लूरगर आलारिन लज्जे मॊख़त'आ गे ख़ॆख़ेल ही ऎरना नू बोयारिन चज्जिकादस, अरा सवंगिय आलारिन लज्जे मॊख़त'आ गे ख़ॆख़ेल ही ऎरना नू पयहा आलारिन चज्जियस। 28 ख़ॆख़ेल कोहाँ ब'ई अदन एन्द्रा हूँ मलका लेक्खा नना गे धर्मेस ख़ॆख़ेल ही ऎरना नू सन्नीरिन अरा आलर ही ऎरना नू हींड़रका बुझुरकारिन अरा ख़ॆख़ेल ही ऎरना नू एन्द्रा हूँ मलकर एन्ने बुझुरका आलारिन चज्जिकादस। 29 औंगे एकअम आलर हूँ धर्मेसी मुन्दहारे फुलई नना पोल्लोर। 30 आसी तिम नीम मसी येसुस नू र'अदर। मसीस दिम नमा गे धर्मेस तरती बरचका लूर। आस दिम नमन धर्मेस गने उजगो कमदस, अरा आस नमन नेम्हा कमदस, अरा आस नमन पाप ती अम्बत'अदस। 31 औंगे नेम्हा पुथी नू लिख्रका लेक्खा, “एकास फुलई मन्दस आस उर्बासी पत्त नू लेका फुलई मन्दस नेकअन।”†