त‍इरकर ही नलख 20

मकेदोनिया अरा यूनान नू पौलुस

¹ हुलहुली मड़चा अदही ख़ॊख़ा पौलुस पत्त'ऊ आलारिन मॆख़ताचस ती आर गे जिया सालना चिच्‍चस। तहाँ आस आर ती बिदा मंजस ती मकेदोनिया केरस। ² आस कानुम कानुम आ चक ता उर्मी पद्दा गुट्ठी नू पत्त'ऊ आलारिन कोड़हे कत्‍था सिखाबाचस ती आरिन रिझाबाचस अरा युनान देस अंड़सियस। ³ असन तीन महिना पहाबाचस ती समुदर डहरे मन्नुम आस सीरिया राजी कालू रहचस। आ बारी आस गे खभर मंजा का यहूदी आलर आसिन पिटा गे चिताबुता कम'आ लगनर। ख़ने आस मकेदोनिया मन्नुम किर्रा गे तिगचस। ⁴ बेरोया नगरे ता पुर्रोसी तंग्‍दस सॊपत्रोस, अरा थेस्‍सलोनिकॆ नगरे ता अरिस्‍तरख़ोस अरा सेकुन्‍दोस अरा देरबै नगरे ता गायोस अरा तीमोथियुस अरा आसिया ता तुख़िखोस अरा त्रुफिमोस आसी गने केरर। ⁵ आर मुन्‍द केरर ती त्रोआस नू एम्‍है पाब ऎरा लगियर। ⁶ अरा ऎम बिगर बिदगी असमा ही परब ही ख़ॊख़ा मकेदोनिया ता फिलिप्‍पी ती कोहाँ डोंगा अरगकम ती पांच उल्‍ला ख़ॊख़ा त्रोआस नू आर ही गुसन अंड़सकम। अरा सात उल्‍ला गूटी असानिम रहचकम।

त्रोआस नू युतुख़ोसिन उज्‍जताना

⁷ हप्‍ता ही पहिल उल्‍ला ऎम अइय्या ता पत्त'ऊ आलर गने असमा किच्‍चा गे ख़ॊंड़रकम। दोसर उल्‍ला पौलुस किर्रिमबि'आ गे रहचस ख़ने आस आर ही गने कछनख्रतेम र'आलियस। अरा आस अधा माख़ा गूटी कछनख्रस। ⁸ एका पाटन एड़पा नू ऎम ओकरका रहचकम असन नगदे गोटंग बिल्‍ली लघ्र'आ लगिया। ⁹ अरा युतुख़ोस नामे ओन्‍टा जॊंख़स भंवारी नू उक्‍का रहचस। पौलुस घड़ही माख़ा गूटी कछनख्र'आ लगियस ख़ने आस कूगा लगियस अरा ख़न्‍द्रस केरस। ख़ने आस ख़न्‍द्रनुम तिसर पाटन ती खत्रस अरा केच्‍चस। ¹⁰ ख़ने पौलुस इत्तियस ती ख़ोलख़रस ती आसिन ख़िंवच्‍चियस ती बाचस, “अमके अकबकरा, ईस उज्‍जालदस।” ¹¹ अरा पौलुस म‍इय्याँ केरस ती असमा किच्‍चियस अरा मोक्‍खस। अरा आस बिज्‍जना बेड़ा गूटी कछनख्रते र'आलियस। फिन आस उरखस। ¹² अरा आर आ जॊंख़ासिन उज्‍जना एड़पा होच्चर केरर अरा आर खुसमारर।

त्रोआस ती मिलेतोस काना

¹³ ऎम मुन्‍द तिम कोहाँ डोंगा ती आस्‍सोस नगरे केरकम का अइय्या ती एमा पौलुसिन अरगना रहचा। आस दिम एन्ने चिताबुता नंजकाचस, एन्‍देरगेका आस ईकनुम असन काला बिद्दियस। ¹⁴ आस आस्‍सोस नू एमा ख़क्‍ख्रस ख़ने, ऎम आसिन कोहाँ डोंगा नू अरगकम ती मितुलॆनॆ नगरे नू बरचकम। ¹⁵ अरा अइय्या ती ऎम कोहाँ डोंगा नू अरगकम ती दोसर उल्‍ला ख़िओस टापू ही हेद्दे अंड़सकम। अरा दुसर उल्‍ला नू सामोस टापू आबोन कट्टकम, अरा तिसर उल्‍ला मिलेतोस नगरे नू अंड़सकम। ¹⁶ एन्‍देरगेका पौलुस इफेसुस नगरेन अम्‍बरकी काला गे तिगचका रहचस। अरा आस आसिया देस नू अउर हूँ घड़ही बेड़ार'आ गे मल बिद्दियस। एन्‍देरगेका आस येरुसलॆम नू चाढ़ेम अंड़सा गे बिद्दियस का आस पेन्‍तॆकोस्‍तॆ परब ही उल्‍ला नू असन र'आ ओंगोस।

पौलुस इफेसुस सेयान आलारिन सिखाब'अना

¹⁷ पौलुस मिलेतोस ती इफेसुस गे आलारिन त‍इय्यस ती कलीसिया ता सेयान आलारिन मॆख़ताचस। ¹⁸ आर आसी गुसन अंड़सियर ख़ने, आस आरिन बाचस, “नीम अख़दर का ऎन इकला आसिया अंड़सकन आ पहिल उल्‍ला ती उर्मी घड़ी ऎन निम्‍है गने एकासे रहचकन। ¹⁹ नगदे लुद‍ऊ अरा ख़ंजलख़ो चूरख़कन ती अरा यहूदी आलर ही मलदौ घतना ही चड्डे एंग्‍है म‍इय्याँ मंजका बिढ़्रना गुट्ठी ती ऎन उर्बासिन सुसर नन्नुम बारी रहचकन। ²⁰ अरा एका एका कत्‍था निम्‍है फैदा ही रहचा अदिन तेंगना नू, अरा आलर ही मुन्‍दहारे अरा एड़पा एड़पा काला काला सिखाब'आ गे मल इल्‍चिकन। ²¹ अरा यहूदी अरा नन-यहूदी आलारिन चेताबचकन का आर जियन किर्त'अना र'ई अरा नम्‍है उर्बस येसु मसीसिन पत्त'अना चांड़ र'ई। ²² अक्‍कु ऎरा ऎन नेम्‍हा बॊलतासिन पॆसकन ती येरुसलॆम काला लगदन, अरा असन एंग्‍है म‍इय्‍याँ एन्‍देर एन्‍देर मनो अदिन बलदन। ²³ अरा इदिन लेका अख़दन का नेम्‍हा बॊलतस उर्मी नगरे नू एंगन चेताब'अदस का एंगा गे हॆंरना अरा कलपारना गुट्ठी उइरकी र'ई। ²⁴ लिकिन ऎन एंग्‍है उज्‍जनन चोन्‍हा मल नन्‍दन। धर्मेसी मया ही पत्त ता दौ कत्‍थन उर्मी आलर गे तेंगा गे उर्बा येसुस एंगा गे चिच्का नलखन पूरा नना गे ऎन बेद्ददन।

²⁵ अक्‍कु ऎरा, ऎन अख़दन का निम्‍है ओर्मर नू नॆख'आ मझी नू ऎन धर्मेसी राजी ही कत्‍था तेंगा कुद्दकन, निम्है ती नॆ हूँ एंग्‍है मुंहिन फेन मल ऎरोर। ²⁶ औंगे ऎन इन्ना ब'अदन का ऎन पत्त'अना जॊगे रहचकन, निम्‍है ती निक‍ईम नास मनोर क'ओर होले, अदही जिमा ऎन मलदन। ²⁷ एन्‍देरगेका धर्मेस एन्‍द्रन नीम अख़'आ गे बिद्दियस अबड़ा उर्मिन ऎन निमा तिंकन। ²⁸ औंगे निम्‍है पत्त नू अरा धर्मेस तंग्‍है ख़द्दासी ख़ॆंस ती ख़ीन्‍दका तंग्‍है कलीसियन ख़ापा गे नेम्‍हा बॊलतस निमन ईरू-ख़ूजू उइय्का उर्मी खोंड़हा ही पत्त नू चिहुंक र'अके। ²⁹ ऎन अख़दन का एंग्‍है केरका ख़ॊख़ा खरिखन मल अम्‍बना चर्रू मूख़ू भुसुड़ गुट्ठी निम्है मझी नू बर'ओ। ³⁰ निम्‍है मझी तिम एन्ने आलर चो'ओर ती पत्त'ऊ आलारिन तम्‍है तरा नतगा गे टेंको बोंको कत्‍थन सिखाब'ओर। ³¹ इदगे एज्रका र'आ अरा सुरता नना का ऎन तीन बछर गूटी उल्‍ला माख़ा चींख़ा चींख़ा ओर्त ओर्तारिन चेताब'आ गे मल अम्‍बकन।

³² अक्‍कु ऎन निमन धर्मेस गे अरा आसी मया ही कत्‍था नू अम्‍बदन, आद निमन परद'आ उंगी, अरा धर्मेस नेम्‍हा मंजका उर्मी आलर नू मेस्र'अरकी आसीस चि'आ उंगी। ³³ ऎन नॆख'अम चाँदी महले सोना महले किचरी गे मल चिबाख़ारकन। ³⁴ नीम अख़दर का ऎन इबड़ा ख़ेक्खा तिम एंग्‍है अरा एंग्‍है गने रहचका आलर ही चाड़ आबोन पूरा नना गे नलख नंजकन। ³⁵ ऎन निमन उर्मिन नंजकन ती ऎदकन का एकासे कोड़हे सक‍त नलख ननरकी पयहा आलारिन सम्‍ड़'अना, अरा उर्बा येसुसी कत्‍था गुट्ठिन सुरता नन्ना चाड़ र'ई। आस तानीम बाचकादस का ‘हो'अना ती चि'अना कोड़हे बॆस हवे।’” ³⁶ इबड़न बाचस ती आस मूकलिदरस अरा ओर्मर गने गोहरारस। ³⁷ तहाँ अबड़ा ओर्मर नगदे चींख़यर अरा पौलुसिन ख़ेवचियर अरा आसिन चुंखियर। ³⁸ कोड़हे गा अबड़र ती बग्‍गे आलर, नीम एंग्‍है मुहिन फेन मल ऎरोर एन्ने आसी बाचका चड्डे हेन्‍दवारर केरर। फिन आर आसिन कोहाँ डोंगा गूटी अंड़सताचर।