17
थेस्सलोनिकॆ नगरे नू पौलुस अरा सीलास
1 फिन पौलुस अरा सीलास अम्फिपोलिस अरा अपोल्लॊनिया नगरे मन्नुम थेस्सलोनिकॆ नू बरचर। असन यहूदीर ही ओन्टा गोड़हा एड़पा रहचा। 2 पौलुस तंग्है चाल लेक्खा आर ही गुसन केरस अरा तीन ख़न्न ऎख़्रना उल्ला गूटी आर ही गने नेम्हा पुथी ती तिंगियस। 3 अरा आस अबड़ा ही माने आबोन बुझाब'आ लगियस अरा पुरुब नंजस का मसीस गे दुक्खे चॊदना अरा केचका ती उज्जा चो'अना दिम रहचा, अरा ऎन निमन ई येसुसी पत्त नू तेंगदन, ईस दिम मसीस हिकदस एन्ने बाचस। 4 अबड़र ती जोक्क आलर पत्ताचर ती पौलुस अरा सीलास गने मेसरर। अरा बग्गे धर्मेसी इल्चू युनानी आलर अरा बग्गे मुध मुक्कर हूँ पत्ताचर ती मेसरर।
5 लिकिन यहूदीर इस्गहा मंजर। अरा आर बजार ती जोक्क मलदौ आलारिन ख़ॊंड़चर ती गोंहड़ा मंजर ती नगरे नू कलम कलम नना हेलरर। अरा आर यासॊनसी एड़पा नू कोरचर ती पौलुस अरा सीलासिन गोंहड़ा ही मुन्दहारे ओन्द्र'आ बेद्दा लगियर। 6 लिकिन आरिन असन मल ख़क्खियर ती यासॊन अरा जोक्क पत्त'ऊ भइय्योरिन नगरे ता अक्स'उर हेद्दे नतगियर ओन्द्रर। अरा चिच्चियारनुम बाचर, “ईर गोट्टा राजिन हेलहेलम नंजकानर, इबड़र इसन हूँ बरचकानर। 7 यासॊन ईरिन तंग्है गुसन उइय्का र'अदस। इबड़र जम्मर कैसरसी पॆसका ही बिड़दो नू नन्नर अरा ब'अनर का अउर ओन्टा बॆलस येसुस र'अदस।” 8 अबड़ा कत्थन गोंहड़ा अरा नगरे ता अक्स'उर मेंजर ती हेन्दवारर केरर। 9 औंगे आर यासॊन अरा अबड़ा पत्त'ऊ भइय्योरिन अम्बना ही ढिबा होच्चर ती अम्बियर चिच्चर।
बेरोया नगरे नू पौलुस अरा सीलास
10 पत्त'ऊ भइय्योर लॆम पौलुस दरा सीलासिन माख़ेच माख़ा बेरोया नगरे तइय्यर चिच्चर। अरा आर असन अंड़सियर ती यहूदीर ही गोड़हा एड़पा नू केरर। 11 इबड़ा ता यहूदीर थेस्सलोनिकॆ नगरे ता यहूदीर ती दौ ओक्कना इजना रहचर। अरा अबड़र कोड़हे ओन्क'आ ती कत्थन इंझ्रर, अरा उर्मी उल्ला आर नेम्हा पुथी नू बेद्दा लगियर का इबड़ा कत्था एन्नेम र'ई का मला। 12 औंगे अबड़र ती बग्गे आलर पत्ताचर, अरा बग्गे युनानी मुध मुक्कर अरा मॆतर हूँ पत्ताचर। 13 लिकिन थेस्सलोनिकॆ ता यहूदीर अक्खर का पौलुस बेरोया नू हूँ धर्मेसी कत्था तेंगदस। ख़ने असन हूँ आर बरचर ती आलारिन तकाब'आ हेलरर अरा हेलहेलम नना हेलरर। 14 तहाँ पत्त'ऊ भइय्योर लॆम समुदर मन्नुम काला गे पौलुसिन बिदा नंजर। लिकिन सीलास अरा तीमोथियुस असानिम रहचर। 15 पौलुसिन अंड़सताचर उइय्यर आर अथॆने नगरे गूटी केरर ती किर्रियर बरचर। अरा आर किर्रो बारी पौलुस ती सीलास अरा तीमोथियुस गे पॆसका ख़क्खियर ती बरचर का एवंदा चाँड़हे मनो अन्नेम बर'ओर।
अथॆने नगरे नू पौलुस
16 पौलुस अथॆने नू सीलास अरा तीमोथियुसी पाब ऎरा लगियस ख़ने, आ नगरे नू मूर्ती गुट्ठिन निन्दिका ईरियस ख़ने आसी जिया उल्लिया। 17 औंगे आस गोड़हा एड़पा नू यहूदीर गने अरा धर्मेसी इल्चू नन-यहूदीर गने अरा बजार टोंका नू आलर ख़क्ख्र'आ लगियर आर ही गने उर्मी उल्ला कत्था बरता ननालियस। 18 अरा एपिकूरी अरा स्तोईकी धरम ता जोक्क सिखाब'उर आसी गने कत्था बरता मना हेलरर। अरा जोक्कोर बाचर, “ई पोरपोरोस एन्देर ब'आ बेद्ददस?” अरा नन्नर बाचर, “ईस गा नन्ना देंवता गुट्ठी ही कत्था तिंगुस लगदस।” एन्देरगेका पौलुस येसुसी अरा आसी उज्जा चो'अना ही पत्त नू तेंगा लगियस। 19 ख़ने आर आसिन अरेयोपगोसa गुसन होच्चर केरर। अरा असन आर मेंजर, “एन्देर ऎम अख़'आ ओंग्दम का नीन पुना कत्था तेंगदय ईद एन्देर हवे? 20 निंग्है ब'अना ई कत्था एमा गे पुना कत्था हवे। अरा ऎम अख़'आ बेद्ददम का ई सिखाब'अना ही मने एन्देर हवे?” 21 ई अथॆने ता उर्मी आलर अरा नन-राजी ती बर'अरकी असन र'उर गा पुना पुना कत्था मेन्ना अरा ब'अना नू तम्है उल्ला आबोन खंडा लगियर।
अरेयोपगोस सभा नू पौलुसी ब'अना
22 अरेयोपगोस सभा ही मुन्दहारे इज्जस ती पौलुस बाचस, “अथॆने नगरे नू र'ऊ आलारो, ऎन ऎरा लगदन का नीम उर्मी रकम ही ती कोड़हे धरम मुवार र'अदर। 23 ऎन कुद्दनुम नुंगनुम निम्है महबा नन्ना आलॊन ऎरा लिक्कन, ख़ने एंगा ओन्टा एन्ने गोड़हा ख़क्खरा, अइय्या लिख्रकी रहचा का ‘बलना धर्मेस गे।’ नीम बलना नू एका धर्मेसी महबा नन्दर, आ धर्मेसी पत्त नू दिम ऎन निमन तेंगदन। 24 ई धर्मेस गोट्टा ख़ॆख़ेल अरा अइय्या र'ऊ उर्मिन कमचस, अरा आस मेर्ख़ा दरा ख़ॆख़ेल ही उर्बस हिकदस। आस आलर ही ख़ेक्खा ती कमचका मन्दिर नू मल र'अदस। 25 अरा आस तंगा गे इन्द्रिइम जिनिस ही चाड़ र'ई ब'अरकी आलर ही ख़ेक्खा ती सुसर नना मल बेद्ददस। आस गा तानिम जम्मा गे उज्जना अरा नाख़ना अरा उर्मी जिनिसन चि'अदस। 26 आस ओर्त आलस ती गोट्टा ख़ॆख़ेल नू र'आ गे उर्मी जाती गुट्ठिन कमचस। अरा आस मुन्द तिम आ जातियर ही चो'अना अरा खतरना ही बेड़न ओक्ताचकादस, अरा आर ही सिवान गुट्ठिन हॆंचकादस। 27 अरा आस बेद्ददस का आर धर्मेसिन बेद्दोर अरा उर्मी तरा बिद्दनुम बिद्दनुम आसिन ख़क्खोर। लिकिन आस नम्है नॆख़ा ती हूँ गेच्छा मलकस। 28 एन्देरगेका नाम आसी नू उज्जदत अरा कुद्दत नुंगदत अरा बड़ियर र'अदत। एकासे का निम्है जोक्क डंडी लिख'उर बाचकानर, ‘ऎम गा आसी ख़द्दम हिकदम।’ 29 होले नाम धर्मेसी ख़द्दर मनरकी नमा एन्ने मल सोचना का धर्मेस आलर ही करिगार अरा सोच ती सोना अरा चान्दी अरा पखना ती कमचका मूर्ती र'अदस। 30 केरका बेड़ा नू आलर धर्मेसिन मल बुझ्रर। इदिन आस अम्बियस चिच्चस। लिकिन अक्कु आस उर्मी अड्डा ता उर्मी आलारिन जियन किर्त'आ गे आनदस। 31 एन्देरगेका आस ओन उल्लन ओकताचकादस। अउला आस आसी चाजरका आलस ती गोट्टा ख़ॆख़ेल ता आलारिन उजगो ती नेंवई ननोस। आ आलासिन आस केचका ती उज्जा चॊदताचस ती ई कत्थन ओर्मारिन मानिम ऎदका र'अस।”
32 केचका ही उज्जा चो'अना ही पत्त ता कत्थन आलर मेंजर ती जोक्क आलर अलखा हेलरर। अरा जोक्क आलर बाचर, “ई कत्था ही पत्त नू ख़ॊख़ा ऎम अउरिम निंग्है ती मेनोम।” 33 तहाँ पौलुस आर ही मझी ती किर्रिम बिच्चियस। 34 लिकिन जोक्क आलर आसी गने मेसरर अरा पत्ताचर। आर ती अरेयोपगोस सभा ता आलस दियोनुसियोस रहचस, अरा दामारी नामे ओन्टा मुक्का रहचा, अरा आर ही गने अउर हूँ आलर रहचर।