लूकस 21

कीड़ा रड़ियाही ही दान

¹ फिन येसुस उरुब आलारिन दान बकसा नू दान सजनन थिथाब'अर ईरियस। ² अरा आस ओन्‍टा कीड़ा रड़ियाही मुक्‍कन हूँ ऎंड़ सन्नी सिक्कन अइय्या सजना ईरियस। ³ ख़ने आस बाचस, “ऎन निमन मानिम ब'अदन, ई कीड़ा रड़ियाही मुक्‍का जम्मर ती बग्‍गे सज्‍जकी र'ई। ⁴ एन्‍देरगेका इबड़ा ओर्मर तम्‍है खुर्जी ही बढ़ती ती सज्‍जर। लिकिन ईद नगदे कीड़ा आली हवे। ईद गुसन ऎ बग्‍गे रहचा उर्मिन सज्‍जा। ईद तंग्‍है उज्‍जा गे रहचा जम्मन धर्मेस गे चिच्‍चा।”

ख़ॆख़ेल मुंज्रना ही चिन्‍हा

(मत्ता 24:1-21, 29-35; मर 13:1-19, 24-31)

⁵ फिन जोक्‍क आलर धर्मेसी मन्दिर ही पत्त नू ब'आ लगियर का, एकासे आद बॆस पखना अरा दान ती सिंगरारकी र'ई। ख़ने येसुस बाचस, ⁶ “नीम ऎरदर ईद उर्मी, आ उल्‍ला बर'ओ का पखना म‍इय्याँ पखना मल र'ओ, उर्मी दिम धंसतार'ओ कालो।”

⁷ आर येसुसिन मेंजर, “अना उर्बायो! इबड़ा कत्‍था इकला मनो? अरा इबड़ा कत्‍था जम्मा मनो, इदन अख़'आ गे एन्‍देर चिन्‍हा मनो?” ⁸ आस आरिन बाचस, “चिहुंक र'आ, निमन नीक‍ईम अम्‍बोर ठक'आ। नगदे आलर एंग्‍है नामे ती बर'अरकी ब'ओर, ‘ऎन मसीस हिकदन’ अरा बेड़ा अंड़सा ख़च्‍चकी र'ई, नीम आर ही ख़ॊख़ा अमके काला। ⁹ अरा इकला नीम लड़‍ई अरा हुलहुली गुट्ठी ही हलन मेनोर, आ बारी अमके बयार'आ। एन्‍देरगेका इबड़ा ही मुन्‍द मन्ना चाड़ र'ई, लिकिन मुंज्रना बेड़ा लॆम मल बर'ओ।”

¹⁰ तहाँ आस आरिन बाचस, “ओन्‍टा जातियर नन्ना जातियर ही बिड़दो नू, अरा ओन्‍टा राजी नन्ना राजी ही बिड़दो नू लड़ाई गे चो'ओ। ¹¹ अरा ख़ॆख़ेल नू कैनो अड्डा नू कोड़हे ख़ॆख़ेल नुकुरना अरा आकाल अरा कोहाँ कोहाँ बेमार गुट्ठी मनो। अरा मेर्ख़ा नू नगदे भयभयान ऎथ्रना अरा कोहाँ कोहाँ चिन्‍हा गुट्ठी ऎथ्र'ओ। ¹² लिकिन इबड़ा उर्मी कत्‍था ही मुन्‍द आलर निमन धर'अरकी सताब'ओर। अरा निमन गोड़हा एड़पा नू बिढ़'आ गे सोंप'ओर अरा जेहेल नू सज'ओर अरा बॆलर अरा राजीखापुर ही मुन्‍द इजतार'ओर। एन्‍देरगेका नीम एंग्‍है गने चॊंख़्र‍'उर हिकदर। ¹³ लिकिन ईद निमा गे एंग्‍है पत्त नू आरिन तेंगना ही मोका मनो। ¹⁴ औंगे नीम मुन्‍द तिम तम्‍है तम्‍है जियन सपड़'आ का ऎम एन्‍देर आनाकिर्त'ओम ब'अरकी अमा एल्‍चा।^† ¹⁵ एन्‍देरगेका ऎन निमन एन्ने ब'अना अरा लूर चि'ओन का निम्‍है जम्मा बैरिर निम्‍है बिड़दो नू खंडा अरा इज'आ पोल्‍लोर। ¹⁶ निंग्यो निम्‍बर अरा भइय्योर अरा पाहियर अरा संगेर हूँ निमन धरत'ओर अरा निम्‍है ती जोक्‍क आलारिन पिटोर। ¹⁷ नगदे आलर निमन बिड़दो ननोर, एन्‍देरगेका नीम एंग्‍है गने चॊंख़्रकर। ¹⁸ लिकिन निम्‍है कुक्‍क ता ओन्‍टा चुट्टी हूँ मल खत्तर'ओ। ¹⁹ नीम बड़ियर सहना गने इज्जका र'ओर होले निम्‍है जियन लाड़ोर।^†

²⁰ एकाबारी नीम येरुसलॆम नगरेन ओनबेंड़र'आ ती फउद बेढ़चका ऎरोर। आ बारिम अख़के का अदही उझड़ारना अंड़सकी र'ई। ²¹ अउलम यूदेया जिला नू र'उर परता म‍इय्याँ बोंके कालके।^† अरा नॆ येरुसलॆम भितरी र'ओर आर गे बहरी उरखना मनो, अरा नॆ नगरे ही बहरी नू र'अनर आर अइय्या अम्‍बोर कोर'आ। ²² एन्‍देरगेका इदिम दंडे चि'अना उल्‍ला मनो, एकत्रु धरम पुथी नू लिखचका उर्मी कत्‍था मंज ख़च्‍चो।^† ²³ अबड़ा उल्‍ला नू ओत्‍था ऎख़ अरा ख़दमाख़ो मुक्‍कर गे नगदे सस्‍ती मनो। अरा ख़ॆख़ेल नू नगदे सस्‍ती मनो, अरा धर्मेस आलर म‍इय्याँ कोहाँ खींस ननोस। ²⁴ आर तबेल ती पिटतार'ओर, अरा उर्मी राजी नू हें'अरकी होतार'ओर। अरा नन-यहूदी आलर ही उल्‍ला अरगी मन्ना गूटी येरुसलॆम आर ही आकुस नू र'ओ।

²⁵ चन्‍दो बीड़ी अरा बीनको नू चिन्‍हा गुट्ठी ऎथ्र'ओ। अरा समुदर अरा लहरा ही ख़रख़ना ती ख़ॆख़ेल नू राजी राजिन्‍ता आलर एलचोर अरा अन्‍भूल मनोर।^† ²⁶ आलर ख़ॆख़ेल नू बरना खिलपत ही पाब ऎरना ती बयार'ओर अरा केचका आलर लेक्‍खा मनोर, एन्‍देरगेका धर्मेस मेर्ख़ा नू र'ऊ उर्मी आलॊन नुक'ओस। ²⁷ फिन उर्मी आलर मनवा ख़द्दन एंगन बदाली नू बरनन ऎरोर। अरा एंगा ख़ॆख़ेल ता आलारिन राजी नना गे कोड़हे महबा अरा आकुस मनो।^† ²⁸ अरा इकला इबड़ा कत्‍था ही ऒड़ मनो नीम मॆन ऎररकी इज्जका र'अके। एन्‍देरगेका निम्‍है नाड़रना लॆम बर'ऊ र'ई।”

²⁹ तहाँ येसुस आरिन ई जोक्‍खा ख़ीरिन तिंगियस। “अंजीर मन्नन अरा उर्मी नन्ना मन्नन ऎरा। ³⁰ अबड़ा नू ख़ॊरनन नीम ऎरदर होले, नीम अख़दर का बिड़ना उल्‍ला अंड़सिया। ³¹ ई लेक्‍खम इकला नीम इबड़ा कत्‍थन एन्ने मन्नुम ऎरोर, निमा अख़ना र'ई का धर्मेस आलारिन राजी नन्ना ही बेड़ा हेद्दे र'ई। ³² ऎन निमन मानिम ब'अदन, एका गूटी इबड़ा उर्मी कत्‍था मनो आ गूटी ई परिया ता जोक्को आलर उज्‍जोर। ³³ मेर्ख़ा अरा ख़ॆख़ेल छपर'ओ कालो, लिकिन एंग्‍है कत्‍था मनो दिम।

³⁴ नीम चिहुंक ननके। ख़ॆख़ेल ता ओन्ना-मॊख़ना ही चिबाख़ारना अरा उंखना अरा ख़ॆख़ेल ही जिनिस ता फिकर ती निम्‍है जिया अम्‍बन बेहड़ार'आ का आ उल्‍ला निमा गे ‍अचका ही ‍अंड़सा ख़च्‍चो। ³⁵ आद गा ख़ॆख़ेल ता ओर्मा र'ऊ आलर म‍इय्याँ एन्नेम फन्‍दा बेसे बर'ओ। ³⁶ औंगे उर्मी बेड़ा एज्रका र'आ। अरा गोहरार'आ का बर'ऊ अबड़ा जम्मा खिलपत ती बछर'आ गे सवंग अरा मनवा ख़द्दन एंग्हा मुन्‍दहारे इजना जॊगे मन्‍दर नेक‍अन।”

³⁷ येसुस उल्‍ला बारी धर्मेसी मन्दिर ही चाली नू सिखाब'आ लगियस, अरा माख़ा बारी नगरे ही बहरी कालरकी जैतून नामे परता नू र'आ लगियस।^† ³⁸ अरा पैरिम ओर्मा आलर आसहीन मेना गे धर्मेसी मन्दिर ही चाली नू आसी गुसन बर'आ लगियर।