5
परता सिखाब'अना
(लूक 6:20–23)
1 येसुस कोहाँ आल गोंहड़न ईरयस ख़ने परता मइय्याँ अरगियस ती उक्कियस केरस। अरा आसी चेलर आसी गुसन बरचर। 2 अरा एन्ने ब'अनुम आरिन सिखाब'आ हेलरस।
आरिन धर्मेस आसीस ननोस,
आर मेर्ख़ा राजी ता आलर हिकनर।
आरिन धर्मेस आसीस ननोस,
आर सान्ति ख़क्खोर।†
आरिन धर्मेस आसीस ननोस,
आर ख़ॆख़ेल ही उरुब मनोर।†
आरिन धर्मेस आसीस ननोस,
आर ही मनेन धर्मेस पूरा ननोस।†
आरिन धर्मेस आसीस ननोस,
आर मइय्याँ हूँ सोग्गे ऎरतार'ओ।
आरिन धर्मेस आसीस ननोस,
आर धर्मेसिन ऎरोर।†
आरिन धर्मेस आसीस ननोस,
आर धर्मेसी ख़द्दर बार'ओर।
आरिन धर्मेस आसीस ननोस,
आर मेर्ख़ा राजी ता आलर हिकनर।†
11 \wj एकाबारी आलर नीम एंग्है गने चॊंख़्र'उर र'अना चड्डे निमन हींड़नर अरा दुक्खे सारत'अनर अरा दोस ठेकाबाच बाच उर्मी रकम ही मल दौ कत्था कछनख्रनर ख़ने, धर्मेस निमन आसीस ननोस।† 12 औंगे नीम रिझ्रके, रिरयारके, एन्देरगेका निमा गे मेर्ख़ा नू कोहाँ इनम र'ई। अरा सुरता नाना का चिरान ता धर्मेसी कत्था तिंगुरिन हूँ आर एन्नेम खिलपत नंजका रहचर।\wj*†
बॆक अरा बिल्ली ही पत्त नू सिखाब'अना
\wj 13 नीम ख़ॆख़ेल नू बॆक लेक्खा र'अदर। लिकिन बॆक ही तीनना मेटर'ओ कालो होले, आद अउरिम अदही तीनना मल कमर'ओ। आद इन्द्रिइम नलख गे मल र'ई, अदिन बहरी हेबड़तार'ई अरा आलर ती तिर्ख़र'ई नाब्र'ई।† 14 नीम ख़ॆख़ेल नू आलर गे बिल्ली लेक्खा र'अदर। परता मइय्याँ नू ओक्रका नगरे नूख़्र'आ पुल्ली।† 15 अन्नेम आलर बिल्लिन लघा ब'अनर ती ढक्की ती मल कुल्लनर महले ढक्की किइय्या मल उइय्नर। लिकिन बिल्लिन पक्खा नू उइय्नर। होले ओर्मर गे बिल्ली ईथ्र'ई।† 16 एन्नेम निम्हा बिल्ली आलर गुसन बिलचते र'अन नेकअन, का आर निम्है दौ नलखन ऎरोर ती निम्है मेर्ख़ा ता बंगासी महबा ननोर।\wj*†
नॆग ही पत्त नू सिखाब'अना
17 ऎन मूसासी नॆग अरा धर्मेसी कत्था तिंगुर ही कत्थन मेट'आ गे बरचकादन एन्ने अमके सोच'आ। अबड़न मेट'आ गे मला लिकिन अबड़न मन्ता'आ गे बरचकादन। 18 ऎन निमन मानिमन ब'अदन, मेर्ख़ा दरा ख़ॆख़ेल टाड़र'ओ क'ओ, लिकिन धर्मेसी नॆग नू एन्देर लिख्रकी र'ई अदही बिगर मंजका ओन्टा अक्छर महले ओन कड़ी हूँ मल मुंज्र'ओ।† 19 औंगे नॆ अबड़ा सन्नी ती सन्नी पॆसका ती ओन्टन हों टाँड़दस अरा आलारिन हों एन्ने सिखाब'अदस होले, आस मेर्ख़ा राजी नू उर्मी ती सन्नी मन्तार'ओस। लिकिन नॆ अबड़न पीस्र'ई अरा अन्नेम सिखाब'ई आर मेर्ख़ा राजी नू कोहाँ मन्तार'ओर। 20 ऎन निमन ब'अदन का निम्है नलख यहूदी नॆग सिखाब'उर अरा फरिसीर ती दौ मल र'ओ होले नीम मेर्ख़ा राजी नू इकला हूँ मल कोर'ओर।
खींस अरा पिटना ही पत्त नू सिखाब'अना
21 नीम मेंजकादर का पुरखारिन आनका रहचा, ‘आलारिन अमके पिटा। एकअम ओर्तस पिटोस आस दंडे ख़क्खोस।’† 22 लिकिन ऎन निमन ब'अदन का, एका ओर्तस तंग्है भईस मलता बहिन आबोन खींस मन्दस होले आस दंडे ख़क्खोस। अरा एका ओर्तस तंग्है भईस मलता बहिन आबोन मलदौ ब'अदस होले आस महासभा नू दंडे जॊगे मनोस। अरा एका ओर्तस एकअम ओर्तासिन ‘अना बोया’ ब'अदस होले आस नरक ही चिच्ची ही जॊगे मनोस।
23 औंगे नीन धर्मेस गे गोड़हा नू दान चि'अदय होले, निंगा असन सुरता बर'ई का निंग्है भईस गे निंग्है मइय्याँ इन्द्रिइम बदी र'ई, 24 होले निंग्है दानन असानिम गोड़हा नू अम्बा ती मुन्द निंग्है भईस गने मेसर नख्र'आ अरा बरा ती निंग्है दानन अरग'आ।
25 निंग्है बैरिस निंगन नेंवई ननू अड्डा हो'आलदस होले, कालो बारी डहरेनुम आस गने राजीरमा मना। एन्ने अम्बन मना का आस निंगन नेंवई ननुस गे चि'ओस, अरा आस निंगन सैनस गे चि'ओस, अरा सैनस निंगन जेहेल एड़पा नू सज'ओस चि'ओस। 26 ऎन निंगन मानिम ब'अदन का एका गूटी उर्मी ढिबा मल चिच्च ख़च्चोय आ गूटी नीन असले उरखा पोल्लोय।
नन्ना आली गुसन काना ही पाप पत्त नू सिखाब'अना
27 नीम एन्ने नॆगन मेंजकादर का, ‘नन्ना आली गुसन अमके काला।’† 28 लिकीन ऎन निमन ब'अदन का, एका ओर्तस मलदौ सोच ती एकअम आलिन ऎरदस होले, आस तंग्है जिया नू अदही गने नन्ना आली गुसन काना ही पाप नंज ख़च्चियस। 29 निंग्है तीना ख़न्न निंगन पाप नन्त'ई होले, अदिन सम्ड़ह'आ। पाप नन्ना ती सम्ड़ह'आ गे आ ख़न्नन टोटरना ओथ्रना मनो होले हूँ अदिन टोटर'आ ओथ्र'आ। पाप नन्ना चड्डे ऎंड़ ख़न्न र'अनुम नरक नू हेबड्रना ती बिगर पाप नंजका कना मनरकी धर्मेस गने जनमजुग ही उज्जना नू कोरना निंगा दौ र'ई।† 30 अरा निंग्है तीना ख़ेक्खा निंगन पाप नन्त'ई होले, अदिन सम्ड़ह'आ। पाप नन्ना ती सम्ड़ह'आ गे आ ख़ेक्खन खंडना मनो होले हूँ अदिन खंडा चि'आ। पाप नन्ना चड्डे ऎंड़ ख़ेक्खा ही र'अनुम नरक नू हेबड्रना ती, बिगर पाप नंजका ठुठा मनरकी धर्मेस गने जनमजुग ही उज्जना नू कोरना निंगा दौ र'ई।†
अम्बरनख्रना ही पत्त नू सिखाब'अना
31 नीम एन्ने नॆगन हूँ मेंजकादर का, ‘एका ओर्तस तंग्आलिन अम्बदस होले, आस अदिन अम्बरनख्रना चिठी चि'अदस नेकअन।’† 32 लिकिन ऎन निमन ब'अदन का ‘नन्ना आलस गुसन काना पाप ती एकअम नन्ना पाप चड्डे एकास तंग्आलिन अम्बरनख्रना नन्दस, आस अदिन नन्ना आलस गुसन काना ही पाप नन्त'आदस, अरा एकास आ अम्बका आलिन बेंज्रदस आस हूँ नन्ना आली गुसन काना ही पाप नन्दस।’†
किरया मॊख़ना ही पत्त नू सिखाब'अना
33 अउर हूँ नीम पुरखारिन आनका रहचा अदिन मेंजकादर का ‘ठकवा किरया गुट्ठी अमके मॊख़ा, लिकिन उर्बासी मुन्द किरया मोक्कादय अदिन ननके।’† 34 लिकिन ऎन निमन ब'अदन, ‘किरया इकला हूँ अमके मॊख़ा। मेर्ख़ा ही नामे ती किरया अमके मॊख़ा, एन्देरगेका आद धर्मेसी बॆल-गदिया हवे।† 35 अरा ख़ॆख़ेल ही नामे ती हूँ किरया अमके मॊख़ा, एन्देरगेका आद धर्मेसी ख़ेड्डे उइय्ना ही कंडो हवे। अरा येरुसलॆम नामे ती किरया अमके मॊख़ा, एन्देरगेका आद कोहाँ बॆलासी नगरे हवे।† 36 अरा निम्है कुक्कु ही हूँ किरया अमके मॊख़ा, एन्देरगेका नीम ओन्टा चुट्टिन हूँ पन्डरु मलता मोख़ारो नना पोलदर। 37 निम्है कत्था इवन्दम र'ओ, हाँ होले हाँ अरा मला होले मला। एकदा इदिन ती बग्गे मनी, आद मलदौ ती मंजकी र'ई।’
अमके किर्त'आ बिड़द'आ
38 नीम एन्ने नॆगन हूँ मेंजकादर का, ‘निम्है नठाब'उर ती ख़न्न ही ऊजी ख़न्न, अरा पल्ल ही ऊजी पल्ल किर्त'आ बिड़द'आ।’† 39 लिकिन ऎन निमन ब'अदन, ‘मलदौ आलर ही बिड़दो नू अमके इज'आ। निकईम निंगन हींड़'आ गे निंग्है ओन्टा गल्लेन थपड़दस होले, आस गे नन्ना गल्लेन हूँ ऎदके। 40 एकअम ओर्तस निंग्है अंगन हो'आ गे नालिस नन्दस होले, निंग्है बर्कन हूँ हो'आ चि'आ। 41 एकअम ओर्तस निंगन बिट्ठी नू ओन कोस हो'अदस होले, नीन आसी गने दुई कोस कला। 42 निंग्है गुसन ने'उस गे चि'आ। अरा नॆ निंग्है गुसले नहड़ा ने'आ बेद्ददस, आस गे बिड़दो मुही अमा नना।’
ओर्मा आलारिन चोन्हा नन्ना ही पत्त नू सिखाब'अना
43 नीम एन्ने नॆगन हूँ मेंजकादर का, ‘निंग्है अरबर-परबारिन चोन्हा नना अरा निंग्है बैरीरिन खींस नना।’ 44 लिकिन ऎन निमन ब'अदन, ‘निम्है बैरीरिन चोन्हा नना, अरा निम्है भख'उर गे बिन्ती नना। 45 एन्ने नन्ना ती नीम निम्है मेर्ख़ा बंगासी ख़द्दर मनोर। एन्देरगेका आस दौ अरा मलदौ इरबर मइय्याँ हूँ बीड़ी अरग'अदस अरा उजगो आलर अरा पपहर इरबर गे हूँ चॆंप पुंइत'अदस। 46 नीम निम्है गने चोन्हा ननुर ती लेका नीम चोन्हा नन्दर होले धर्मेस ती एन्देर इनाम ख़क्ख'ओर? मालगुजारी ऊज'उर हूँ एन्नेम अदिन नन्नर। 47 नीम निम्है भईरिन लेका मोंजरा नन्दर होले नीम नन्नर ती एन्देर कोहाँ नलख नन्दर? धर्मेसिन बल्लुर हूँ एन्ने नन्नर। 48 औंगेम नीम बड़ियर मना, एकासे निम्है मेर्ख़ा ता बंगस उर्मी गुन्न नू बड़ियर र'अस।’†