២ កូរិនថូស 2

ហាក់ឌី អៃ ឃឹត កិះ ឡើយ  អៃ ម៉ា តរ៉ិ ហ៊ឹ វែ ឝ៉ឹន ឌី បើម អាំ ឝ្រង៉ត់ សូក អ៊ែ យ៉ាវ។ 2 ប៉ាគ់ អៃ បើម អាំ វែ ឝ្រង៉ត់ ឡើយ  ពអ៊ែ មែ ឆិ ម៉ា បើម អាំ អៃ ហូក  តកាយ វែ អៃ ឡា បើម អាំ ឝ្រង៉ត់ អ៊ែ។ 3 អ៊ែ សំឞត់ អៃ ឡា ចួរ ពយ៉ៃ ឈូន អាំ ឌី វែ ឋួរៗ អ៊ែ  អៃ ចួរ ពអ៊ែ បក់ឌី ញ៉ង អាំ អៃ ឝ្រង៉ត់ ទឹង វីឡា អៃ ឡា ប៊ឹះ អ៊ឺម  ម៉ាត់ ម៉ាត អ៊ែ ញ៉ង អាំ អៃ ឝ្រង៉ត់ ឌី បនិះ អៃ ឡា មឹង បើម អាំ អៃ ហូក អ៊ែ។ អៃ សឿ រៀន វែ លែក រ៉ា អ៊ែ  វីឡា ឆិ អៃ ឡា ហូក រ៉គ់  វែ កគ់ ហូក រ៉គ់ អរែង វ៉ា អៃ ពទឺ។ 4 អៃ ចួរ សំឞត់ អ៊ែ  ហ្នដឹប ធុក ប៊ុត បាក ហ្នដឹប ឝ្រង៉ត់ សូក  ហ្នដឹប លូះ ដាក ម៉ាត់  ហាក់ឌី តត្រ អាំ វែ ឝ្រង៉ត់ អ៊ឺម  អ៊ែ អៃ ម៉ើត អាំ វែ ណោះ រៀន  ឞាល់ អ៊ែ ឡើយ អៃ ឡា រូគ ម៉ើត ឌី វែ។

ប៉ូល តាក់ ថូត ឌី បនិះ មរ៉ា ឡា បើម យូច

5 ប៉ាគ់ ហ ឆិ ឡា បើម អាំ ប៊ិច កាន ឝ្រង៉ត់ សូក  តត្រ ហ បើម អាំ អៃ ឝ្រង៉ត់ អ៊ឺម  អ៊ែ ហ បើម អាំ វែ លែក រ៉ា មិញ ឡា ឝ្រង៉ត់ ឍឺៗ  កាន នែ អៃ តា ងុញ ម៉ាង ថណាំង យឹប អ៊ឺម។ 6 វែ អើន រ៉ា ឡា ចិះ ថូត ហ នែវ អ៊ែ  ផើយ ឡើយ  7 ពអ៊ែ ឡា វែ តាក់ ថូត ឌី ហ  វ៉ា ពហូក ប៊ុត បាក ហ ឍឺ  ប ហ ធុក ប៊ុត បាក យឹប  អ៊ែ តប៊ិច ឞន មឹង យ៉ាវ ហ្នូវ។ 8 ពអ៊ែ អៃ ចន់ដ្រា វែ  អាំ វែ ពដៃ កាន រូគ ម៉ើត ឌី ហ អាំ ឡាក់ៗ។ 9 អៃ ចួរ សំឞត់ អ៊ែ បក់ឌី ឆំឡង រ៉ាង ម៉ើត ឌី ណោះ រៀន  វែ ចង់ហៀង សយ លែក កាន អៃ ឡា ប្រ៉ៃ អ៊ែ លឺ អ៊ឺម? 10 ប៉ាគ់ វែ តាក់ ថូត ឌី ហ ឆិ  អៃ កគ់ តាក់ ថូត ឌី ហ ពទឺ។ អ៊ែ ឌី ចាក់ អៃ កឡឹ  ប៉ាគ់ ប៊ិច លឿង នែវ ឆិ ត្រ តាក់ ថូត អាំ ឌី ហ ឆិ  អៃ តាក់ ថូត ឌី ហ ទឹង ងឺរ គ្រែដៃ ឡា តៃ ផឿ ហ ប៊ិច ខា ឌី វែ  11 បក់ ញ៉ង ង៉ាយ ដូវ ឌី តបូត  ខង ង៉ាយ ណោះ សឝ៉ាវ ភែន កាន ហ ឡើយ។

កាន ភែ សណាគ់ អរែង វ៉ា គ្រែដៃ គ្រិះ

12 សាគ់ អៃ រ៉ិ ប៊ឹះ ហ៊ឹ មឿង ត្រូអាស  បក់ឌី ហាយ គ្រិះ  យ៉ះ គ្រែដៃ កន់ដ្រាគ់ ប៉ើក ទ្រូង ឌី អៃ ហ៊ឹ អ៊ែ  13 ប៊ុត អៃ ណាគ់ តស៊ុក អ៊ឺម  ខង អៃ តតៃ ទីតុះ។ ពអ៊ែ ឡើយ ឌី អៃ ញឺស ឝឹត មែ អ៊ែ  រ៉ិ ហ៊ឹ ឃែត ម៉ាស៊ីដូន មិញ។ 14 ទុត ពអ៊ែ ហូក ឌី គ្រែដៃ ឡើយ ឡា តៀត ទ្រូង អាំ ង៉ាយ ដូវ ភែ សណាគ់ លឺយៗ អរែង ឌី គ្រែដៃ គ្រិះ។ គ្រែដៃ ពដាយ អាំ បនិះ ត្រំ ឞន សឝ៉ាវ កាន គ្រែដៃ គ្រិះ  តាម លញ៉ាគ់ ង៉ាយ  ព្រឌីវ ប៉ាគ់ សអម កយឺវ ឡា ពឹក ត្រំ ឞន។ 15 ញ៉ន ឌី គ្រែដៃ គ្រិះ អ៊ែ ឡើយ  ឡា បើម អាំ ង៉ាយ សអម ប៊ឹះ នឹង គ្រែដៃ  កនុង បូវ ឡា ប៉ះ ដូវ សវ៉ាក់ ពញិវ  វ៉ា កនុង បូវ ឡា ប៉ះ រុង រ៉ាយ។ 16 អ៊ែ ចនែក មែ ឡា ត្រ រុង រ៉ាយ  ង៉ាយ នែ ប៉ិន តូរ កាន គែត  អ៊ែ បូវ ឡា ដូវ ហាប់ កាន សវ៉ាក់ ពញិវ មិញ  ង៉ាយ ប៉ិន សអម កាន ញិវ។ ពអ៊ែ មែ ឆិ ឡា ណោះ បើម កាន នែ ដូវ? 17 អ្យា តត្រ ប៉ាគ់ បនិះ សួន អើន ឡា ព្រឡំ ប្រម៉ាង គ្រែដៃ អ៊ែ អ៊ឺម។ កនុង គ្រែដៃ គ្រិះ អ្យា ម៉ាង ឌី ប៊ុត ត្រុង  ប៉ាគ់ បនិះ គ្រែដៃ ឡា ប្រ៉ៃ អាំ រ៉ិ  អ្យា ណោះ រៀន ហ តៃ អ្យា ឡា បើម អ៊ែ។