រ៉ូម 7

បូវ សឿ គ្រែដៃ យីស៊ូ ប្លូច ឝឹត អំណាច ចឞាប់ ឡើយ

អ៊ឺ អ៊ូគ ប៉ អោះ អូយ  អៃ ម៉ើត ម៉ាង ហ៊ឹ វែ ឡា អ្រណោះ តូយ ចឞាប់  វែ ណោះ ឡើយ ឞ  ចឞាប់ នែ ហ ប៊ិច អំណាច ឌី បនិះ កនុង ប៉ះ មែ ឡា ណាគ់ ញិវ កាស អ៊ែ ឡើយ? 2 ពអ៊ែ ពៀប រៀន  កទ្រី ឆិ ឡា ប៊ិច ក្ល ណាគ់ ញិវ  ហ ត្រ គូ ទិត វ៉ា ក្ល ហ ញ៉ន ឌី ចឞាប់ អ៊ែ  ហាក់ឌី ប៉ាគ់ ក្ល ហ គែត  ហ ប្លូច ឝឹត ចឞាប់ ទ្រី ក្ល អ៊ែ ឡើយ។ 3 ពអ៊ែ ប៉ាគ់ ក្ល ហ ណាគ់ ញិវ  ហ ចក់ ក្ល ហ៊ឹ គែង ឋាវ្គ  អ៊ែ មែ ជុ រៀន  កទ្រី ឡើស ក្ល ឡើយ។ ប៉ាគ់ ក្ល ហ គែត  កទ្រី អ៊ែ ប្លូច ឝឹត ចឞាប់ អ៊ែ ឡើយ  យ៉ះ ហ ចក់ ក្ល មូយ ឋាវ្គ កគ់ មែ តរៀន ហ ឡើស ក្ល យ៉ាវ។

4 អ៊ឺ អ៊ូគ ប៉ អោះ អូយ  វែ កគ់ ពអ៊ែ ពទឺ ឡើយ  តាម លញ៉ាគ់ ចាក់ ដៃ គ្រែដៃ   វែ គែត ប្លូច ឝឹត ចឞាប់ ឡើយ  ដូវ អ៊ែ វែ ប៊ិច កន់ដ្រាគ់ មូយ ឋាវ្គ  ហ ឡា ញិវ ត្រិចទឺ អ៊ែ  បក់ឌី វែ ម៉ា ពឝ៉ើត ពឺរ ប្ល៉ៃ ម៉ប ឌី គ្រែដៃ។ 5 ខង វីឡា ពឋើម អ៊ែ  ង៉ាយ ណាគ់ ញិវ កើត សយ ព្រយ៉យ នែវ បើម យូច  ចឞាប់ អ៊ែ ហ បើម អាំ ង៉ាយ ចាង ងុញ បើម តហ៊ិ នែវ ដដិៗ  ប៊ុត ង៉ាយ ឡា ងុញ បើម តហ៊ិ អ៊ែ  បើម អាំ ចាក់ ដៃ ង៉ាយ ពឝ៉ើត ពឺរ ប្ល៉ៃ ឡា បើម អាំ ង៉ាយ គែត។ 6 ហាក់ឌី ណិះៗ នែ  ង៉ាយ ប្លូច ឝឹត ចឞាប់ ឡើយ  ង៉ាយ គែត ប្លូច អ៊ែ ឝឹត កាន ឡា ក្រាន់ ង៉ាយ អ៊ែ  ពអ៊ែ ង៉ាយ ឡាប់សៃ គ្រែដៃ សយ នែវ ញិវ កើត ហ្នដើម តាម លញ៉ាគ់   តត្រ សយ នែវ ចឞាប់ ក្រាគ់ ឡា ចួរ ឌី តូ សំឞត់ អ៊ែ អ៊ឺម។

ចឞាប់ តណោះ តោះ បនិះ អាំ ប្លូច ឝឹត កាន យូច អ៊ឺម

7 ពអ៊ែ ង៉ាយ ម៉ា ឃឹត ពឆិ? ចឞាប់ អ៊ែ  កាន យូច ឞ? អ៊ឺម  តត្រ ប៉ាគ់ អ៊ែ អ៊ឺម។ ប៉ាគ់ តប៊ិច ចឞាប់ អ៊ែ  អៃ ម៉ា តណោះ សឝ៉ាវ កាន យូច អ៊ឺម។ ប៉ាគ់ កណា ចឞាប់ តហាយ រៀន  «ញ៉ង ងុញ ពនឺង សនឺ មែ អ៊ឺម»  ពអ៊ែ អៃ ម៉ា តណោះ រៀន  កាន ងុញ ពនឺង អ៊ែ ហ នែវ ឆិ អ៊ឺម។ 8 ហាក់ឌី កាន យូច  ហ ប៊ិច ឞន ឡា សាំ តាម លញ៉ាគ់ ចឞាប់ អ៊ែ  ហ ពឝ៉ើត កាន ងុញ ពនឺង លែក នែវ ទឹង អៃ។ លង៉ាវ ឝឹត ចឞាប់  កាន យូច អ៊ែ គែត ឡើយ។ 9 ពឋើម តដាន់ ប៊ិច ចឞាប់ ឞឹះ  អៃ ណាគ់ ញិវ  អ៊ែ ហ៊ឹ ប៊ឹះ កាន ពង់ឝ៉ាប់  កាន យូច កគ់ ញិវ ប្រើយ  អ៊ែ ចនែក អៃ  កើត ឌី គែត មិញ។ 10 ពអ៊ែ អៃ តៃ រៀន  កាន ពង់ឝ៉ាប់ ផឿ ឌី បើម អាំ អៃ ញិវ អ៊ែ  ហ កើត ឌី បើម អាំ អៃ ត្រ គែត មិញ។ 11 ខង កាន យូច  ហ ដាំង ឞន ឡា សាំ ចក់ កាន ពង់ឝ៉ាប់ អ៊ែ តបូត អៃ  វ៉ា ហ បើម អាំ អៃ គែត តាម លញ៉ាគ់ កាន ពង់ឝ៉ាប់ អ៊ែ ឡើយ។ 12 ពអ៊ែ ចឞាប់ កគ់ អ្យាគ់ រ៉ូម  វ៉ា កាន ពង់ឝ៉ាប់ កគ់ អ្យាគ់ រ៉ូម  អ្យាគ់ ត្រុង ត្រ  វ៉ា អ្យាគ់ ម៉ាត់ ម៉ាត។

13 ពឆិ កាន អ្យាគ់ នែ ហ បើម អាំ អៃ គែត ឞ? អ៊ឺម តត្រ ពអ៊ែ អ៊ឺម  កាន យូច មិញ ស៊ែត ឡា បើម អាំ អៃ គែត តាម លញ៉ាគ់ កាន អ្យាគ់ អ៊ែ  បក់ឌី ពដៃ រៀន កាន យូច អ៊ែ ហ យូច ម៉ាត់ ម៉ាត  វ៉ា កាន យូច អ៊ែ ហ ម៉ា កើត ឌី ចាំ តហ៊ិៗ ហម អ៊ែ ឋាវ្គ  តាម លញ៉ាគ់ កាន ពង់ឝ៉ាប់ អ៊ែ។

14 ង៉ាយ ណោះ ឡើយ រៀន  ចឞាប់ ញឺស ឝឹត ផវ យ៉ាង គ្រែដៃ  ហាក់ឌី អៃ មិញ  បនិះ ព្រយ៉យ នែវ បើម តហ៊ិ  ឡា ត្រ មែ ហ្មពួត គូ កន់ដ្រូម អំណាច កាន យូច។ 15 អៃ តណោះ ចាក់ ទឺ នែវ ឆិ អៃ ឡា បើម អ៊ែ អ៊ឺម  ឌីខង កាន ឆិ អៃ ឡា ម៉ើត បើម  អៃ តបើម អ៊ឺម  អៃ គូ បើម ឡូវ កាន អៃ ឡា តត្រ រូគ អ៊ែ មិញ។ 16 ប៉ាគ់ អៃ បើម កាន ឆិ អៃ ឡា តរូគ បើម  ពអ៊ែ អៃ ផម រៀន  ចឞាប់ អ៊ែ ហ អ្យាគ់ ម៉ាត់ ម៉ាត ឡើយ។ 17 ប៉ាគ់ ពអ៊ែ តត្រ អៃ អ៊ឺម ឡា បើម កាន អ៊ែ  កាន យូច ឡា គូ ទឹង ចាក់ អៃ ឡា បើម កាន អ៊ែ។ 18 អៃ ណោះ រៀន  តប៊ិច នែវ ឆិ ឡា អ្យាគ់ ទឹង ចាក់ អៃ អ៊ឺម  ខង អៃ នែ បនិះ ព្រយ៉យ នែវ បើម តហ៊ិ  អៃ ម៉ើត បើម អ្យាគ់ លឺយៗ  ហាក់ឌី ដាំង បើម សយ តដូវ អ៊ឺម។ 19 អៃ តបើម កាន អ្យាគ់ អៃ ឡា ម៉ើត បើម អ៊ែ អ៊ឺម  ហាក់ឌី កាន តហ៊ិ អៃ ឡា តរូគ បើម អ៊ែ  កើត ឌី អៃ បើម ហ អ៊ែ មិញ។ 20 ណិះៗ នែ  ប៉ាគ់ អៃ បើម កាន ឆិ អៃ ឡា តរូគ បើម  អ៊ែ តត្រ អៃ កឡឹ យ៉ាវ ឡា ណាក់ បើម អ៊ែ  ហាក់ឌី កាន យូច ឡា គូ ទឹង ចាក់ អៃ មិញ ឡា បើម កាន អ៊ែ។

21 ពអ៊ែ អៃ តៃ ចឞាប់ នែ រៀន  ទឹង អៃ ឡា ម៉ើត បើម កាន អ្យាគ់  អ៊ែ កាន តហ៊ិ ហ គូ ទឹង អៃ លឺយៗ។ 22 តូយ កនុង ប៊ុត អៃ  អៃ តៃ កាស ឌី នែ ឡើយ ឡា ត្រ រូគ ទឹង ប៊ុត អៃ។ 23 ហាក់ឌី អៃ តៃ ចឞាប់ ដដិ មូយ ឋាវ្គ  ឡា គូ លែក ទឹង ខឿង ចាក់ ដៃ អៃ  ឡា ប្រណើម វ៉ា ចឞាប់ ខំឃឹត អៃ  ហ្នដឹប ហ រ៉ាប់ អៃ ឌី ចឞាប់ កាន យូច ឡា គូ ទឹង ខឿង ចាក់ ដៃ អៃ ដិ។ 24 ទឺ ធុក ញ៉ាក ម៉ៃៗ ឞាល់ អ៊ិន ឌីះ! ម៉ាត់ មែ ឆិ ម៉ា បើម ដូវ តោះ អៃ អាំ ប្លូច ឝឹត ចាក់ ដៃ ឡា ណោះ គែត នែ ឋូវ? 25 អៃ ហូក ឌី គ្រែដៃ! តាម លញ៉ាគ់ គ្រែដៃ យីស៊ូ គ្រិះ ឡា ណាក់ កន់ដ្រាគ់ ង៉ាយ ឡា តោះ អៃ អាំ ប្លូច។ ពអ៊ែ អៃ ខរ៉ុប បើម សយ ចឞាប់ គ្រែដៃ តូយ ខំឃឹត អៃ  ហាក់ឌី តូយ ប៊ុត ព្រយ៉យ នែវ បើម តហ៊ិ ឡា ប៊ិច ទឹង ចាក់ អៃ អ៊ែ  អៃ បើម ក៝ត ឌី ចឞាប់ កាន យូច អ៊ែ មិញ។