យ៉ូសាវែ 20

មឿង ឆ្រូក

គ្រែដៃ យីហូវ៉ា ម៉ាង ហ៊ឹ យ៉ូសាវែ រៀន៖ 2 «ហគ់ ហាយ ឌី បូវ កួន ចូវ អ៊ីស្រាអ៊ែល រៀន  “វែ ត្រ អាំ ប៊ិច មឿង ឆ្រូក  ប៉ាគ់ អៃ ឡា ប្រ៉ៃ វែ ឝឹត យ៉ាគ់ ម៉ូស៊ែ  3 អ៊ែ ប៉ាគ់ ប៊ិច មែ ឆិ ឡា ខគ់ បើម គែត មែ  ឌី យ៉ង់បិច វ៉ា ប៊ុត តងុញ អ៊ឺម  អ៊ែ ហ ម៉ា ត្រយ៉ាវ រ៉ិ គូ ហ៊ឹ អ៊ែ។ មឿង លែក អ៊ែ ហ ម៉ា បើម ប៉ិន ឞន ឆ្រូក បក់ឌី វែ ម៉ា ប្លូច ឝឹត មែ ឡា ណាក់ តូវ សណង ឌី ផាម អ៊ែ។ 4 មែ អ៊ែ ត្រ ត្រយ៉ាវ ហ៊ឹ មឿង ឆ្រូក ទឹង ឆិ តមឹង។ កនុង មឿង អ៊ែ  ហ ត្រ ឆុង ពឹង ឝ្ល៉ោះ ដ្រក មឿង  អ៊ែ ឡើយ ហាយ លឿង ហ ឌី មែ ទិះ ក្រាគ់ ទឹង មឿង អ៊ែ  អ៊ែ ឡើយ មែ ម៉ា តមុត ហ ទឹង កនុង មឿង  វ៉ា មែ ម៉ា អាំ មូយ ឞន ឌី ហ គូ អរែង វ៉ា មែ។ 5 ប៉ាគ់ ប៊ិច បនិះ ឡា ណាក់ តូវ សណង ឌី ផាម រ៉ិ ឆ្រួយ ហ  អ៊ែ បូវ ទិះ ក្រាគ់ តត្រ អាំ ហ ឡា កជែត មែ  ហ៊ឹ ទី បនិះ អ៊ែ អ៊ឺម  ឌីខង ហ ដូវ កជែត មែ ព្រដៀង ប្រឡា ញ៉ន ឌី យ៉ង់បិច  ហ កគ់ តប៊ិច តរែម ឌី មែ អ៊ែ ឋួរ អ៊ឺម ពទឺ។ 6 ហ ត្រ គូ ទឹង មឿង អ៊ែ  និះ ប៊ឹះ ប៊ិច កាន តាត់ កឍី សារ ពឹង ងឺរ បូវ ពសាសន់  វ៉ា និះ សឋិច ព្រសុង ទឹង លវ៉ាង អ៊ែ ហ គែត។ ប្លូច អ៊ែ ហ ឡា កជែត មែ អ៊ែ  ហ ម៉ា ដូវ ជឹ ហ៊ឹ ហ្នាម ហ កឡឹ  វ៉ា ហ ម៉ា ដូវ ជឹ កស៊ឹត ត្រិចទឺ ហ៊ឹ ស្រ៊ុក ហ ឡា ដូវ ត្រយ៉ាវ ពឋើម អ៊ែ”»។

7 ប៉ាគ់ ពអ៊ែ មែ កគ់ កះ បយុ មឿង កែឌែស  ទឹង ពដិះ ឝ៉ាលីលែ  កនុង ពដិះ ចន់ឌូ នែបថាលី  មឿង ស៊ីគែម  ទឹង ពដិះ ចន់ឌូ អ៊ីប្រ៉ាអ៊ីម  មឿង កៀរយ៉ាត-អារបា(ឡា មឿង ហ៊ែប្រុន) ទឹង ពដិះ ចន់ឌូ យូដា។ 8 ហ៊ឹ ពឹះ ដណៃ យួរដាន់  តូយ ម៉ាត់ តង៉ៃ ឡិច មឿង យែរីខូ  មែ រ៉ើស ចក់ មឿង ប៊ែស៊ែរ  ហ៊ឹ ត្រិញ ទិះ នឹង បូយ ចន់ឌូ ទ្រឹបៗ  ឝឹត ភូង យូ រូប៊ីន  មឿង រ៉ាម៉ូត ទឹង ពដិះ ឝ៉ាឡាត  ឝឹត ភូង យូ ឝ៉ាត  វ៉ា មឿង ឝូឡាន  ទឹង ពដិះ បាសាន  ឝឹត ភូង យូ ម៉ាណាស៊ែ។

9 នែ ឡើយ មឿង ឆ្រូក  ជុ ផឿ ឌី កួន ចូវ អ៊ីស្រាអ៊ែល  វ៉ា បូវ មែ ពធែត គែង ឡា គូ អរែង វ៉ា មែ  បក់ឌី មែ ឆិ ឡា បើម គែត មែ ឌី យ៉ង់បិច  អាត ត្រយ៉ាវ គូ ហ៊ឹ អ៊ែ  ញ៉ង អាំ មែ ឡា ណាក់ តូវ សណង ឌី ផាម អ៊ែ កជែត អ៊ឺម  និះ ប៊ិច កាន តាត់ កឍី សារ ទឹង ងឺរ បូវ ពសាសន់។