4
Iita ogiyafa maaddhi Wontose bemba inge gisha
1 Hi giddaaka tooraara birriyaray ayafani e yoone? Ye esini hi muxhurowa darguttiya yese acho maxona iita hi col'e col'aafa dendasuna maaquwaye? 2 Hi worge abako degexey hinumba e iissho geedeko axe hi wodhe. Keddaysi col'i degexe hi dheeddoyna hi birruse, toora hi denxe. Wonto hi shi'uwa gisha hi worge abako degexese danda'uwaytako. 3 Wonto shidhakoni ye hi shidhi degexe abako hi acho maxo gara feyssheshe iita col'ana hi shi'e gisha hi shi'esa degexuwaytako.
4 Hinuno Wonto dhaddi fede wontoko handeseesitoa! Ha saha eetasi Wonto iilaxe maaqesa eruwaytuwa? Aadewoko ha saha eehe worgesi uddi Wontose iilaxuko e maaqe. 5 Hayla Fissharowa ohisine "Wontoy nuuka gaddese ayaanay esusewo nu maaqoronikeko keddaysi iitanawo e worge" yeydi e hidosi mikkewa hinumba e bishe? 6 Yeydi e maaddhakoni fissharowa ohisine
"Be qino nashe axe Wontoy iiloko e iile, bemba ullayseesitama be keenge maxo modhetiyafa dendasuna uso modhe aafenako e beene"
yeydi e hine gisha Wontoy axuse keenge modhete maxoy kossi kossiko e hange.
7 Ye e gisha Wonto afana mati esuse woosuttuwayte! Humbayesema inxha'uwayte, hinukofa dhaddiko e ba'e. 8 Wontoko uquwayte, Wontoni hinuko uqako uqe. Hinuno cubbachito, hi kuche geeshuwayte! Hinuno lam'i maxona sekke hanke hineesito, hi muxhurowafa iita base ooxuwayte! 9 Hi gawwaanna iitana higiluwayte, duuzuwayte, yeekuwayte! Hi miiche duuziyaka hi maggani keddaydese higilsaaka arxuwayte! 10 Laaxi buro yekke hinumba ullaysuwayte! Esini wokke hinumba kedda keddako e hise.
Axi gara yaa'e worgussuwasso
11 Nuundo nayshito! Sekke hanke wola guncofita. Axe gunceeshiti oo'oyne axi gara yaa'eesiti wogako u gunce, woga garako u yaa'e. Woga gara ne yaa'a'ayketese yaa'axe ne sungesa baaka woga kattase maaquwannako. 12 Woga gaddasaara yaa'esaaray Wontowoko. Maareseni bayseseni danda'esi esawoko. Hinne fede axi gara yaa'e neni esi oonena?
Wonto maxo oycci yese gisha
13 Hatteni siwwayte! "Hanzoko oo'oyne gutako fede wude handi yaha bidzi bera nu dece, bidzi bidzi abako wooma zal'a hissineko birre nu laguse" yeydi hineesito! 14 Fetto guta maaqe abako eruwaytako. Esi hinuni abana? Bidziya bento yenniya baatta hine hade sahaafa kese suuleke yesesa maaquwaytuwa? 15 Yeydi hiyekofa hiye hinumba e worgusesi "Laaxi maxo modhe e maaqo'aykowara nu yesa'aykowara ha esa maakoni se'esa maakoni nu hante" yeydi hiyeko hinumba e worguse. 16 Hinunimay yeydi hiyasheesha dhaddiko "Tanko yesa" yeydi hi nashutte. Yeydi nashuttey be uddina iitako.
17 Yoonase ye modhe maaqe abako hante e worgusesa erisine hante dheebey cubboko e maaqe.