3
Be urxhume kafe gisha
1 Nuundo nayshito! Eruse nu gara fedeesitume gardi keddaydese yaa'ay yaa'uttesa hi ere gisha lagay hi giddaafa erusesa maaqe wordoppe! 2 Nu uddina laga basunako halese nu danda'e. Zeeriya be yese zeerena haluwasi ooneni yesa'ayko ye esi be toke be kuche uddi be gara iitaafa kafese danda'e uuxha axuko. 3 Faradziti nuuse u woosuttorosa u asshaaka waaxha nu gelseteko u garay kumena nu worgenike hamorosa mahese nu danda'e. 4 Yeydiwo markabe beewayte! Markabey abani malla maaqisine osaxi agexuna ur'uttesa e maaddhakoni ye markabe ishe axi esuna be durke oddhe abakonako be worge godo etti e hange. 5 Yeydiwo be sunxuna sunxuna yese nu gara giddaafa unxhurey oddhe maaqisine malla hantanako e nashutte.
Oddhe tamay laga wora muunenike gaxhuwayte. 6 Urxhumey hade tamake yesesako. Be sunxuna sunxuna yese nu gara giddaafa keddaydese iitana kundesesako. Nu axetoni uddi iisiko hade tamake axi yeso kumena e megge. Ye tamani Gaanname tamaafako e bente.
7 Be ommana ommana yese bo'itaara kafitaaray yeydiwo saha garana be gawwona hangeesitaara waassaa yese meddhitaaray be uddina beese u woosuttoronike mahesuko axi e danda'e, matiniko e yese. 8 Maaquwaye baaka unxhure ooneni bhanqese danda'uwasso. Kaxe ekkuwasaara wodhe dhaley essaaka kundesesaara maaqe iita basuko. 9 Nuuse adiyara Laaxaara maaqe Wonto ye nu urxhumenako nu galate. Yeydiwo Wontoy be bishake meddho axita ye esunako nu aace. 10 Ye bidzi nuunanawoko Wonto nu galate axeni nu aace. Nuundo nayshito, yeydi maaqe worgusuwasso. 11 Bidzi tultowafa modhe waaxaara iita waaxaaray kesuwa e kese? 12 Nuundo nayshito! Belese aafey gulta kaxhuwa e kaxhe? Weyne aafey belese kaxhuwa e kaxhe? Yeydiwo iita waassaafa modhe waaxe shonqese danda'uttuwasso.
Lam'i bisha gaxuna yese era gisha
13 Hi giddaafa eraxaara gaxaxaara maaqe axi oonena? Ye esa maaqe axi gaxunaara shenonaara be hanto modhe hanta yesiya be yese yeso modhetena beysuwaye. 14 Maaquwaye baaka iita dhiidhaara hi qinosewo karduttiyaray hi muxhurowa yesa'ayko hinuka gaddi nashuttofita! Aade e maaqusune zaadeko hidi hidofita! 15 Ye esini ye e bisha gaxuna yese eray ha sahakofa, axukofa, xhoozukofa baaka Wontokofa maaquwasso. 16 Dhiidhaara be qinosewo karduttiyaray yese godo koysaara iita hantaarako uddi yesa.
17 Maaquwaye baaka Wontoy inge gaxuna yese eray burona geeshuko. Feday assi modhete eehesako, fedase maxesako, siinesako, uddi wogga axe maaresako, e hantay uddi modhe maaqesako, axe shati beewasako, awsha keenguwasako. 18 Naqowara modhetiyaray yesoronike hanteesiti modhete ayliko gizete aafe u bhikkille.