8
Kille caaqona kahinituse afana ade maaddhasi Yesuusako
1 Yoonase afaaka kuxuttese kaate maaqe Wonto oshichi badena uttese kahinituse afana adeko nu keenge. Nu zeere zeeriyafa bidzoydi hiyuttesi ha esako. 2 Esini essaaka kahine hanta hantiyaka e yesesi aadena maa'o zawa maaqe Wonto Hayla Zawaako. Ye maa'o zaway e eedhosi axi kuchena e maaddho baanne Wontonako.
3 Kahinituse afana aditi be bidzi bidzina u maagetosi inguwara kaashaara Wontose uqusesuko. Ye e gisha nu keenge kahinituse afana adeni uqusese danda'e bidzi abakoy yeseko e worguse. 4 Wogay otonike Wontose ingo uquse kahiniti yese gisha Yesuusay ha sahaaka yessako kahine maaquwadiko e yecha. 5 Usi essaaka hantesi afaaka yese abakita bisheshaara beysesaarako. Ha esini yeydi e maaddhosi Musey maa'o zawa keexhese hissune Wontoy "Bakka gara neese ta addussonike uddi abako gaxuna hantuwa!" yeydiko e woossecha.
6 Yesuusay Wontoseni axuseni giddaaka buro gobbome gare gobbo gara essese caaqoy buro caaqome e garenike hatte e hante hantay u hanticho hantame garoko e gare. 7 Buro caaqoy aban facete keenguwasa maaddhako lakkunxo caaqoy worguttuwadiko e yecha. 8 Ye esini Wontoy axi gara facete degessi zeerisine
"Isra'eelaxitaarani maaqqe Yuuda axitaara wolko kille caaqo ta caaqe woggako yoonesa, yeydiko ta hine Laaxe maaqe tani Wontoy.
9 Ha usaara ta caaqe kille caaqoni usadiyaxhe Gibxhe wudiyafa kessese u kuche ta ayto wogga usaara ta caadho caaqo bisha maaquwasso. Ye esini be caadhecho caaqoke yese u dheeddine uso yaha beedi ta dhaddo, yeydiko ta hine Laaxe maaqe tani Wontoy.
10 Yoonase ye geede Isra'eelaxitaara wolkoko ta caaqe yeydiko tayne Laaxe maaqe tani Wontoy. Tani ta wogako u sorgiya ta gade, u muxhurowa ta diize, u Wontoni ta maaqe, usini ta axita u maaqe. Ha esako usaara ta caaqe kille caaqoy.
11 Ha e geede sekke oddhiyafa ayti orje aallo uddi tamba u ere gisha ooneni be wude axeni maaqqe beyndo na'e 'Laaxe eruwa!' hidi hissine eruse worgusuwasso.
12 U miidhechoshani 'Attuwaye' hidiko ta hine, u cubboni ha e geede sekke fetto maxuwasso" yeydiko e hido.
13 Yoonase "Kille caaqo" hidi hiyena buro caaqoy cindi hantuwannike matiko e yese. Hanti cindi dooddesesi e baane woggay uddhiko e yese.