5
1 Kahinituse afana ade maaqesi be xharutte wogga wogga axiti giddaafako u xharutte, axi cubbowafa maaruttoronike mahe kaashaara ingowara Wontose ingese Wonto zawaaka axi gisha u maagete. 2 Esini beese axe maaddhi gafaxe be maaqe gisha eruwasitusaara haleesitusaara higilesuko e danda'e. 3 Gafaxe be maaqe gisha axi cubbowafa maaruttoronike mahe kaasha e uqusesi ususewo e maaddho baane beesaarako. 4 Hade Aaroneke Wontoy xhardosa baaka ooneni beese be maxoke ha kuxa degexese danda'uwasso.
5 Yeydiwo Kristosay kahinituse afana ade maaqe kuxa fuula beese beenna etto baasso. Esuse indasi "Neni ta yeleko, hanzoko nemba ta yellese" yeydi esa hida Wontoko. 6 Fede godoni assi Wontoy "Neni hade Malka Xhaadiqe kahinunteke yese koolo makkina yese kahineko" yeydiko e hido. 7 Yesuusay axe maaddhi ha saha gara be yecho wogga haybowafa maarese danda'e Wonto buro keddaysi uwwisiniyara yeekisiniyara "Odde, taase siwwa!" hidi keddaysi e shidho. Bemba ullaysi esuse e woosutto gisha Wontoy e shi'e e siido. 8 E yele maaddhakoni be gara yooda maddhaafa woosutte e erdo. 9 Bidzoni facete keenguwasa maaddhi be bento geede esuse woosutteesituse uddi koolo makkina looloy esukofa bentesa e maaddho. 10 Hade Malka Xhaadiqe kahinunteke Wontoy esa kahinituse afana ade sunsi e maagesso.
Be aadexona uuxhe gisha
11 Ha zeere gara nu ohesa lagako nu keenge. Ukkena siidi hi gaxhuwa gisha hinuse e geloronike ohese deexhako e deexhe. 12 Galala wogga aallo modhe odo hi siidese gisha axe erusesa maaqe hinumba e worgusichoyne hatte hade acha hi siidecho Wontokofa maaqe erunxe sekke mati hinumba eruseko e worgusso. Hinuse e worgusesesi uuxha axi muune kaxa e maaddho baane maaxuko. 13 Il'a usshushooshi uddi yele xhahe e maaqe gisha gizete gisha yele xhahey erusutta erunxe erdi hantana beysese danda'uwasso. 14 Xhahey muuwa kaxay "Ha esi modheko, ha esi iitako" hidi erdi bemba lossusese uuxha axusuko.