2
Wonto kuxuso oge
1 Axuse uddi Wonto hi shi'oronikeko uddime burona hinumba odde hidi ta hine. Wonto hi zeeruseniya fede axiti maddha gisha shi'uwayte, fedase hade hinukeysi mati shi'uwayte, galata uqusuwayte. 2 Wonto jhasshishine gizo maxona durkutti modhetenaara koyse keenguwasaara ni yesoronike kaataxhesaara gate aheesitusaara uddi shi'uwayte. 3 Yeysi mahey nimba loolusa Wontose modhiyara maggusesaarako. 4 Wonto maxoy axi be uddina looloronikiyara aade u eroronikiyarako. 5 Bidzi Wontowoko yesa. Assi Wontosaara axusaara feeqa yesine naqesi bidziwoko, ye esini axe maaddha Yesuusi Kristosako. 6 Bembani uddiyade wozesa mati garsi e indo. Ye esini Wontoy "Maaquwaye!" hidi hido beraako e maaddho. Ye ogena axe loolusese beynesa beysiko e yese. 7 Tamba Ayhuda maaquwasituse aadexowara aadiyara erusese anxuttesesaara woosso garxesaara matiko Wontoy taase adeto e indo. Ha esani aadewo ta zeeresa baasa zaadduwasso.
8 Yoonase ayani hi bhikkilutteniya asanxhiti huulaara bersiyara be muxhurowa be keenguwasa hayla be kuche densi Wonto u shi'oronikeko ta worge. 9 Yeydiwo maachitini waareeme hissine qino meddhusena oo'oyne worqiyafaara kuxuttese shushaafaara hantuttese seelo oo'oyne e woomay keddaydese maa'o maa'ena maaddhoppe. Yekke bemba ullaysi worguse ogena bishe maa'o maa'uttuwaye. 10 "Wontoko nu kuxe" yeydi hine indowaxhiti modhe hanta hantena bemba waaruseko e worguse. 11 Maachiti uddi zeerena yekke ullaydi daxhidi era degexuttuwaye. 12 Maachituse "Asanxe erusofita, asanxiti gara adetofita!" hidiko ta hine, mikki u hiyorosako e worguse. 13 Esume yeydi taydosi burona Addaamey meddhutto, Hewaaney geede meddhutto gishako. 14 Assi Addaamey qaarusutto baasso, Hewaaneko qaarusutti Wonto woga garda. 15 Yeydi e maaddhakoni aadexonani eehanani haylonte yesonani bemba yekke ullaysisine oseydi i yessako yele yelenako i loole.