Anxutta Phawlosey Xhimootoosese Anso Bidzunxo Woosso
1
Burona sawo
1 Nimba loolusa Wontowara esa gobbe ni mahe Yesuusi Kristosaaray otonikeko tani Phawlosey anxuttase maaddhi ta maagetto. 2 Hidiko neese Xhimootoosese ha woosso ta diize. Wonto ne aadexe gisha aadewo neni ta yeleko. Ade maaqe Wontowara nu Laaxi Yesuusi Kristosaaray axuse keenge modhe maxoni, maaroni, modheteni neese maaquwaye.
Zaade erunxi garafa biya kafe
3 Maqadooniya hangisine neese odde hidi ta hidonike Efesooniyaka uttuwa. Yaaka bidzi bidzi axiti zaade era erusiyako u yese. "Ha e bisha erusofita!" hidi ususe minsi ohuwa. 4 Assi olo gisha eruttuwa mamako garaara taafutti ittuwaa yelutte taafo garaara wogga u garxuwannike ohuwa. Ye esa bishe zeerey bersawo e oonesa baaka Wonto gobbe mahisine hantutte Wonto hanta go'uwasso. 5 Ye neese ta woosso woossose e alsomay geeshi muxhuronani maaqqe iita modhe shati ere muxhuronani awsha keeguwa aadexonani aadexeesiti wola u eehesako. 6-7 Ye bidzi bidzi axiti ha zeerita dhaddi Muse woga erusesa maaqe wordiko go'uwa bersaaka dhaddi u gellese. Geluttuwaye baaka be zeere zeeriyara "Ha esa erako nu ere" hidi be hinesaara eruttuwasso. 8 Muse wogay e worguse godowa go'uttete modhe e maaqesa erako nu ere. 9 Wogay e inguttosi gizo axuse e maaquwannike erako ni ere. Wogamay e inguttosi woga kakkuwasituse, woosuttuwasituse, Wonto jhashuwashituse, cubbachituse, haylonte eruwasituse, Wonto zeere haasseesituse, ade indo wodheesituse, axe wodheesituse, 10 laggeteesituse, asanxe maaqichine fede asanxaara laggete asanxuse, axe zal'eesituse, zaaddeesituse, zaade caaqeesituse, ye usita bissheshe gizo erunxe inxha'e fede hanta hanteesituse uddiko. 11 Ha gizo erunxi kuxa fuula keenge modhe odowara wola efako ekke. Ye esini axiti esa kedda kedda hise Wontokofa axituse ta ohoronike taako odde hissine inguttesesako.
Phawlosey Yesuusi Kristosa galattosa
12 Muxhuraxe taa mati esuse ta hantorosa tamba maagessi osa taase inda nu Laaxi Yesuusi Kristosay galatuttuwaye. 13 Ha esume buro Kristosa cashesha, aadexeesita waayye beysesa, iita daafe hantesako ta maaqicha. Ere dheeddiyara esa aadexe dheeddiyara ta hanticho gishako tamba e maardo. 14 Wontoy be eehaafa dendasuna axuse e keenge maxo modhetey taase keddaydi e laddo. Yesuusi Kristosaara wolko ta keenge bidzetona maaddhasuna esa ta aadexoronikiyara ta eehoronikiyara e mato. 15 "Yesuusi Kristosay ha saha gara e yoodosi cubbachita maaresuko" yeydi ohutta katoy aadeko. Ye esani axeydosi uddi eezzo badi aadekoydi efeko e worguse. Cubbassaafa bidzo hissoosi tambako. 16 Ye esa ta maaddhakoni Wontoy tamba e maardo. Cubbassaafa buronase maaqe tamba e maardosini Yesuusi Kristosay keddaydese cubbachushe aba makkina danda'o be keengesa beysesuko. Fediti tamba beedi Wonto aadessi koolo makkina yeso degexese be danda'enike gaxhesuko u danda'e. 17 Koolo makkina kaate maaqesuse, hay'e eruwasuse, aafese bentuwasuse, esawoy Wonto maaqesuse kuxaara galataaray koolo makkina maaquwaye. Ameen.
Xhimootoosey oseyorosa e oto
18 Ta na'o Xhimootoose, buro ne gisha ohuttecha kaayo hixa matiko ha woosso neese ta anxe. Ye kaayona naassi oseydi darguttuwa. 19 Ne aadexo dattofuna, ne muxhurowa "Iitako ne hanto" hidi hinesa keenguwasa yesuwa. Bidzi bidzi axiti be muxhurowa "Iitako ne hanto" hidi hineesuse woosutte dheeddiko bidzi iita abakoy e gara ellese markabeke maaddhi be aadexo u woddusso. 20 Ye esa bishe geriti giddaa Hermenosiyara Iskindiriyaray yesako u yese. Ye usiti Wonto be cashuwannike u lossorosa hissine Humbayese garsi indiko ta yese.