12
Wontose waydi yese e worgusesa
1 Yoonase Nuundo nayshito! Hi gara Wonto maggusesa en'a maaqe hayla kaasha mati hi uqusoronikeko Wontoy axuse keenge eehanako odde hidi hinumba ta shi'e. Yeysi uquseko aadena Wonto kuxey. 2 Modhiyara maggusesaara yeydiwo facete keenguwasa maaqe Wonto maxoy aba e maaqenike erese hi danda'oronike hi sorge killonxena hinumba arxuwayte baaka ha saha bisshi yessofita.
3 Wontoy hi aadexoronike hinumba e matese makko oone hi maaqenike hinumba eruwayte baaka hinuse e worguseesume gardi "Tani mallako" yeydi hissine hi qinose massofita. Yeydiko Wontoy taase e keenge maxo modhetena hi bidzi bidzise ta ohe. 4 Ni garay bidzo maaddhakoni be sunxuna sunxunako e yese. Ye be sunxuna sunxuna yese ni garay beese beesuko hanta e keenge. 5 Ye esuke nini laga maaqisine Kristosana bidzi garako. Be sunxuna sunxuna yese nini wol gara sifuttiko ni yese.
6 Wontoy niise keenge maxo modhetiyafa dendasuna be bishana be bishana yese ingoko ni keenge. Kaayo ohesa maaqo'aykoni be keenge aadexo makko kaayo ohuwaye, 7 feda mare e maaqo'aykoni maro gara oseywaye, erusesa maaqo'aykoni be eruse gara miinguwaye, 8 fede axe minxe e maaqo'aykoni ye e gara oseywaye, jherge e maaqo'aykoni be muxhurowafa kessi jherguwaye, axe ahe e maaqo'aykoni gafe baaka axe ahuwaye, fede axuse higilli marea e maaqo'aykoni maggisine axe maruwaye.
9 Wola hi eehe eehay awsha keenguwasa maaquwaye, iita zeere darri hiwayte, modhe zeere ayti esuna yesuwayte! 10 Indo nayshi wola eehenike wola bidzi muxhurona eehuwayte. "Feday taame garoko gare" hidi hissine wola kuxuwayte. 11 Laaxuse oseydi bidzi muxhurona hantuwayte baaka belxhaxita maaddhofita.
12 Gobbiya hi yese gobbona magguwayte, maddha hi gele woggaa danda'uwayte, uddi woggaa Wonto shi'e dhaddofita! 13 Hinunaara wolko aadexiya yeseesita u maddhungeniya maruwayte, borsani mokkuwayte. 14 Hinumba waayye beyseesitaara goodeesitaara suuzuwayte, suuzuwayte baaka aacofita. 15 Maggesaara wolko magguwayte, yeekesaarani wolko yeekuwayte. 16 Wolko bidzi muxhurona kundi yesuwayte. Be yesona yekke ulla hidese axitaara wolko worquttuwayte baaka hinumba kedda kedda hissofita. "Taa baaka ooni eraxi yesa?" yeydi hidofita. 17 Uddi axi buro modhe maaddhi bente abako hantuwayte baaka axiti hinuse iita hantusune sekke ususe mati iita hantofita. 18 Hinuse hi badena worgusesa uddi mati e danda'utte makko uddi axaara wolko modhetena yesuwayte. 19 Ta eehe ta badito! Huula Wontose dhagguwayte baaka hinuse gano aytofita. Ye esini " 'Gano aykesaara e utta mahesaaray tambako' yeydiko e hine Wontoy" yeydiko e diizuttese. 20 Gano aykekofa ne iilaxi naaya'ayko muussuwa, e saza'aykoni usshuwa! Yeysi mahenako esa orjena ne borsuse.b 21 Iita abako modhe abakona iichuwa baaka iitay nemba iisshoppe.