3
Wonto gizetese
1 Hine Ayhudaxe maaquwasitume Ayhudaxe maaqey am e mare? Gada uttey am e go'e? 2 Ayhudaxe maaqey laga ogenako e go'e. Bidzoydi hiyuttesi Wontoy be kato ususe "Odde" hissine e indosako.
3 Hinne Ayhudaafa bidzi bidziti Wonto be aadexichosha dhaddako ye u dhaddosuna Wontoy axe be gobbusicho gobbo dhaba e dhagge? 4 Koolona dhagguwasso. Ye esini
"Ne zeere zeeriyafa dendasuna aadaxe ne maaqe, nemba luukichasheni sekke mati ne iiche"
yeydi e diizuttesenike axi be uddina zaadaxe maaddhakoni Wontomay fetto aadaxuko.
5 Ni cubboy Wonto gizete addussi beysesa e maaddho geede hinne abaydiw nu hiye? "Wontoy ni cubbo gisha ni gara e yaadhako aade yaadho baasso" hidiya nu hine? Ha esa yeydi ta hinesi hade axi maxokeko. 6 "Wontoy aade yaadho baasso" yeydi hiyese fetto danda'uttuwasso. Yeydi e maaddhakoma Wontoy waysi ha saha gara yaa'ese e danda'aane?
7 "Zaadaxe ta maaqesi Wontoy aadaxe maaqenike addusesa, e kuxa kosesa e maaddho geede hine ame 'Cubbaxuko' hidi ta gara e yaa'utte?" yeydi berse axi yesesuko e danda'e. 8 "Modhe abako degexese iita nu hantoose" hidiya nu hiye? Bidzi bidzi axiti yeydi ta erusesa bishushiko tamba u luuke. Ha e gisha u gara yaa'utte yaa'ay aadeko.
Axi be uddina cubbache maaqesa
9 Hinne nuni Ayhudaxiti Ayhuda maaquwasita garuwa nu gare? Oo'o, fetto garuwanxhiko! Ayhudaxitani maaqqe Ayhuda maaquwasiti axi uddi cubbose e oomo u yesenike burussi otiko ta yese. 10 Ye esini
"Bidzini gizo axi fetto baasso. 11 Gaxhe axi bidzini baasso, Wonto worgesi bidzini baasso. 12 Be uddina Wonto ogiyafa dhaddi kessiko u yese, bidzina halliko u yese. Modhe hanta hantesi baasso, koolo bidzini baasso.
13 U asshaafa kesesi hade do'uttese boossaafa kese zeeqoke yesesako. Nuunanako u qaaruse, u unxhure oomo hade shooshi esuna wodhe dhaleke yesesako yesa.
14 U asshay axi muxhuro maduse iita aachuna kundesesako. 15 U tokey axe wodhiya aamese allaxuko. 16 Be hange godowa bayseesitaara waayye beyseesitaarako.
19 Axi be uddina be goyngesa dheeddi mikku u hiyoronikiyara ha saha gara yese uddi axi gara Wontoy yaa'oronikiyara wogay esuse ohesi wogana yeseesituse e maaqenike erako nu ere. 20 Wogay e hantesi axi be cubbo eroronike e maaqe gisha ooneni Muse woga kafena Wonto buro gizese danda'uwasso.
Axi uddi e gizesi aadexona maaqesa
21 Hattema woga fissharowakaara kaayaxiti fissharowakaara be otonike Wontoy axe gizusesi wogana e maaddho baane fede ogena e maaqenike addussiko e yese. 22 Wontoy Ayhudaxitani Ayhuda maaquwasitani shaho keenguwasa Yesuusi Kristosa aadexeesita e uddinako u aadexona e gizuse.
23 Shaho u keenguwasini axi be uddinako cubbo e hantese. Wontoy esuse indecho kuxa fuulani e dheeddese. 24 Wontoy axuse keenge maxo modhetiyafa dendasuna mikkewo Yesuusi Kristosay wozzosunako u gize. 25 Yesuusi Kristosa aadexesi uddi e suuxuna u cubboy ucutti ooxuttoronike Wontoy esa kaasha mati e uqusso. Yeysi e matosi beese gizo be maaqenike addusesuko. Buro hantuttecha cubbo dandadhi gardi e badechonike mati 26 ha woggaakama be gizeteni ye esini beese gizo be maaqenikiyara Yesuusa aadexeesita be gizusenikiyarako e beyse.
27 Hinne esuna nu cee'uttesa am nu keenge? Abani keenguwanxhiko. Esume nu cee'uttuwasi abasuwa? Nu cee'uttuwasi gizete nu degessosi Yesuusi Kristosa aadexenawo baaka woga nu katto gisha maaquwasso. 28 Ye esini "Wontoy axe gizusesi wogay 'Hantuwa!' hidi hidosa hantena e maaddho baane aadexonako e maaqe" hidiko nu hine. 29-30 Hinne Wontoy Ayhudaxitusewa? Ayhuda maaquwasituseni u Wonto maaquwaye? Ayhudaxitani maaqqe Ayhuda maaquwasita aadexona gizusesi bidzi Wontowo e maaqe gisha aadewo esi Ayhuda maaquwasituseni u Wontoko. 31 Hinne nu aadesso geede "Woga dhabako nu dhagge" yeydi hiya? Oo'o, dhabekofa wogako sekke nu minxe yeydi hiyoko.