10
Qornelewose haraje
1 Qesaariya katamaaka Qornelewose sunge bidzi adey e yecha. Esini Xhaaleyafa maaqe be shahona yese tooraxiti giddaa xhiixi gara afana maaga e maaqicha. 2 Wonto jhasshi be zawa geritaara uddi Wonto e kuxicha. Ayhuda gerituse jhergesa Wonto uddi woggaa shi'esako e maaqicha.
3 Bidzi wonte wontaafa odduppi saate woggaa Qornelewosey Wonto woosaxe harajena tiddhissi e beedo. Ye woosaxi esso gelli "Qornelewose" hidi e xheydo.
4 Esini tiddhissi beesine leemo kessi "Laaxo, amuna?" hidi e oycco.
Wonto woosaxi "Wontoy ne shi'e siidiko e yese, ne jhergoni beediko e yese. 5 Hatteni Iyophe woosso ansi Phexhrose sunda Simoone neeso e yooworosa xheyguwa. 6 Esini bagade da'aa yese kom'e aace Simoonesoko e yese" yeydi e hido.
7 Yeydi zeerda Wonto woosaxi hando woggaa Qornelewosey be maraxitaafa lam'aara tooraxiti giddaafa be shobhuwa beera hantichaashitaafa Wonto jhashe bidziyara xheydi 8 maaddha zeere uddi oti Iyophe e anso.
Phexhrose haraje
9 Gutani u hangusune katamaa handi u uddhoniya Phexhrosey izzuppi saate woggaa Wonto shi'ese essa be yecho zawa qinowa yese shanka e kesso. 10 Naayey esa oycine kaxa miyese e wordo.
Kaxa kaxiya u yesune Wonto shi'isine haraje beye e ayto. 11 Afay do'utti oyddi biraanna aykuttese aako maa'o bishe basi afaafa sahaa hodhesa e beedo. 12 Ye essaani be tokena hante, be gawwona hante, be fangena hange bo'iti uddi u yecha.
13 Yenniya "Phexhrose! Dendi shutti muuwa!" yeydi hine kato e siido.
14 Phexhroseni "Laaxo, fetto muuwasso! 'Geeshe maaquwasako, tuneydesesako' hidi hiyuttesa fetto bidzoni muudi eruwasso" yeydi e hido.
15 Sekkeni lakkunxo "Wontoy 'Geeshuko' hidi hidosa neni 'Tuneydesesako' hidi hidofuna" yeydi hine kato e siido.
16 Yeenkewo haydzi wogga maaddhi maaddhi e hido. Ye maa'oni yenniyawo afaa wokke e efutto.
17 Phexhrosey be beedo basuse "Am e maaqe?" hidi hissine maddhundi be muxhurowa sekke hanke arsi e beesune Qornelewosey anso axiti Simoone zawa oycishine zawa degessi sumaa u yoodo. 18 Be kato keddaysi "Borsa maaqe Phexhrose hidi hiyutte Simooney haya e yese?" yeydi oyciya u yecha.
19 Phexhroseni be beedo basuse yekke wokke maxiya e yesune Ayaana Geeshi "Hay, haydzi geritako niya worgiya yesa. 20 Dendi hodhuwa! Tanko otine u yoodo, coocofuna, usaara hanguwa!" yeydi e hido.
21 Phexhroseni hodhi ye geruko uddhi "Hi worgesi hay tambako, hi yoodosi abasuna?" yeydi e oycco.
22 Usini "Nu yoodosi xhiixi gara afana maaga maaqe Qornelewosey woosineko. Esi Wonto jhashe gizo axuko. Ayhudaxiti be yechoyna uddiko esa u kuxe. Be zawa niya xheysi ne ohesa e siyoronikeko hayla maaqe Wonto woosaxi garafa e siidese" yeydi u hido.
23 Esini uso zawa u geloronike mati beera e ato.
Phexhrosey Qornelewoseso
Phexhrosey guta dendi usaara wolko e hando. Iyophe katamaa yecha aadexichashitafa bidzi bidziti esaara wolko u hando. 24 Ye e guta Qesaariya handi u ello.
Qornelewoseni be iginitaara esaara be feyshicho axitaara uddinawo xheydi uso kafiya e yecha. 25 Phexhrosey zawa gelusune Qornelewosey esaara wolla muti e toke gara zuddi esuse e akkirdo.
26 Hinne Phexhrosey "Denduwa, tanini neenke yese axuko" hidi e denso. 27 Esaara wolko zeerisine e gello.
Phexhroseni laga axiti bhikkiluttesune beedi 28 "Ayhudaxi fede ommaara wolla u lossuwasaara u uquwasaara nu wogay tucesha hinuni erako hi ere. Maaquwaye baaka Wontoy axe ooneni 'Geeshe maaquwasako, tuneydesesako' hidi ta hiyoroome taa e beyso. 29 Ha e gishako hi xheydine cooco badi ta yoodo. Hatte abasuna taa hi oowusso? Taase ohuwayte" hidi e oycco.
30 Qornelewoseni ohisine "Hanzo oysso wonte saatey hatteke odduppi saate maaddhesune Wonto ta zawaa ta shi'icha. Yenniya laci laci hine maa'o maadhese axi ta buro eedhi 31 'Qornelewose, Wontoy ne shi'e siidiko yese, ne jhergoni beediko e yese. 32 Ha e gisha Iyophe ansi Phexhrose hidi hiyutte Simoone xheygusuwa. Esini bagade da'aa kom'e aace Simoonesoko e yese' yeydi taase e hido.
33 Hinneko yenniyawo ne gara woosso ta anso. Modheko ne yoodo. Yoonase Wontoy niya woossosa siyese nu uddina hay Wonto buro bhikkiluttiko nu yese" yeydi e hido.
Phexhrosey Qornelewoseso zeerdo zeere
34-35 Phexhroseni zeere ayti "Wontoy axe shati beewasso. Maaqe baaka be ommana ommana yese Ayhuda maaquwasitaafa uddi esa jhasheeshitaara gizo hanteesitaara e eehenike aadenawo taase gelliko e yese. 36 Wontoy Isra'eele gerituse be woosso e anso. Ye esini Wonto modhetey Yesuusi Kristosanako e yoodo. Yesuusay uddiyadese Laaxuko.
37 Yohanisey xhinqate gisha eruso geede Galilaafa ayti Yuuda uddi maaddha zeere erako hi ere. 38 Wontoy ye Nazrataxi Yesuusa be Ayaana Geeshuna e tissho, osani e indo. Wontoy esaara yecho gisha axuse modhe hanta hantisine Humbayey be oomo jheechichoshita uddina loolusisine sekke hanke e hanticha. 39 Nunini Ayhuda wude seya haya Yerusaleemeni e hanto hantase uddi e ataxitako. Mixi garani suxxhi esa u woddho.
40 Esa Wontoy haysso wonte densi e addeyoronike e mato. 41 E addeydosini uddi axuse maaquwasso. Maaqe baaka Wontoy burussi xhardo nuusuko e addeydo. Haybowafa e dendo geede esaara muuday ushay numbako.
42 Axituse modhe odo nu ohorosaara haydhasiti garani en'a yeseesiti garani e yaa'orosa e maagesesenike nu ateyorosaara Wontoy numba e woosso. 43 Esa aadexeesiti uddi e sunxuna be cubbowafa e maaruttoronike kaayaxiti uddi e gisha zeerdiko u yecha" yeydi e hido.
Ayhuda maaquwasiti garani Ayaana Geeshi hoddhosa
44 Phexhrosey yeydi zeeriya yesune e kato siida axi gara uddi Ayaana Geeshi e hodho. 45-46 Phexhrosiyara yooda gada uttecha Ayhuda maaqe Kristosa aadexeesiti uddi Ayhuda maaquwasiti kille nuunana zeeriya u yesuniyara, Wontoni kuxiya u yesuniyara be beedoniya Wontoy indo Ayaana Geeshi u gara hoddhosa u erdo. Yenniyani u micco.