6
Laappi kurariti xharo
1 Ye woggaani Laaxi oge hangeesiti u laddo. Yenniya fede wudefa yooda Ayhudaxitaara yaha yecha Ayhudaxitaaray wolko yaha u yecha. Fede wudefa yooda Ayhudaxiti beera yecha u adey baadese indowaxhituse wontana wontana shahutti ingutticha kaxaafa yaha yecha Ayhudaxiti inge u dheeddinne uso gunce u ayto.
2 Tamma lam'i anxuttaasiti aadexichashita uddina bhikkilli "Kaxa shaheme hissine Wonto kato eruse dhabey nuuse bishuwassho. 3 Yebo, nuundo na'axhito, laappi axita hinukaafa xharuwayte. Axi uso modheko hidi hineesita Ayaana Geeshuna kundeseesita gaxe keengeesita maaqeko uso e worguse. Ha hantasuko uso nu maagexe. 4 Nunimay shi'e garaara kato ohe garaarako nu oseyne" yeydi u hido.
5 Ye uddha maxo axi uddi maggana etti u xhardo. Ye usini aadexonaara, Ayaana Geeshunaara kundese Isxhifanoose, Filphoose, Prokorose, Niqanore, Xhimoone, Pharmeene, Ayhuda woga etti u Wonto kuxicha Anxhokiyaxe maaqe Niqoloose yeysi u xhardo. 6 Anxuttaasiti buro uso u uqusso, ususeni be shidho geede be kuche u gara u gaddo.
7 Wonto katoy aatti e hando. Yerusaleeme Laaxi oge hangeesiti taafoy orjena e laddo. Wonto Hayla Zawa kahinittaafa lagiti Wonto u aadesso.
Isxhifanoosey gate aheesiti buro
8 Isxhifanooseni Wonto suusaara e osaaray essa kundinne axiti gidda micusheshaara orje du'usesaara hantiya e yecha. 9 Yenniyani "Maaketowafa Keseesesiti Bhikkilo Zawa" hidi hiyutte Ayhuda Bhikkilo Zaway e yecha. Qarana katamafaara Iskindiriya katamafaara fedeesiti assi Kilqiyafaara Isiyafaara yooda Ayhudaxiti ye Bhikkilo Zawaaka wolko u yecha. Usini dendi Isxhifanoosiyara u bersicha. 10 Esuna e zeericho era Ayaanay indo gisha esa iicheshe danda'utto baasso.
11 Sekke "Ha axi Musiyara Wontowara e cashushuneko nu siido" yeydi hine gerita e gara suqussi u densicha.
12 Axitani gate cimitani Muse woga eruseesitani e gara u denso. Usini Isxhifanoose ayti gate aheesiti buro u uqusso. 13 Zaade ateyne bidzi bidzi axita u oodine "Ha axi Wonto Hayla Zawaara Muse wogaara cashe garafa biya kakkuwasso. 14 Esini zeerisine 'Nazrataxi Yesuusay Wonto Hayla Zawa budoko e bude, Musey nuuse garsecho wogani arxako e arxe' yeydi e hisuneko nu siidese" hidi hissine u zeerdo.
15 Yaha uttiya yecha gate aheesiti uddi Isxhifanoose aafiya caddi u beesune hade Wonto woosaxi aafushake e aafushay maaddhesune u beedo.