8
Bidzi kom'e hargaxi loollosa
Mrq 1:40-45; Luq 5:12-16
1 Yesuusay bakkaafa hodhoniyaka laga axini esaara u hoddho. 2 Kom'e harge hargicha bidzi axi yenniyawo Yesuusako e yoodo. E buro bocunti "Laaxo, eeha'ayko taa geesheshuko ne danda'ea" yeydi e hido. 3 Yesuusani "Eewa, eehako ta eehe, geejhuwa" hidi hissine be kuche ansi e dollo. Yenniyawo ye axi be kom'e hargiyafa e loollo. 4 Yesuusay esuko "Oonekoni fetto ha esa zeerdofuna! Wonto zawa kahiney nemba beyorosa esuko hanguwa. Ye e geede Muse wogay ohenike kaasha Wontose uqusuwa. Ye esini ne loollonike axuse atoko e maaqe" hidi e hido.
Bidzi maaga maraxi loollosa
Luq 7:1-10
5 Yesuusay Qifirnahoome katamaa gelusune bidzi Rooma wude axi xhiixi gara afana maagay Yesuusako e yoodo. 6 Esini "Laaxo, ta hantaxi hardi tokey doccinneko beenna hantey esa iisshine iitanawo maddhundi zawa woy'iya e yese" hidi e shidho. 7 "Handiko ta looluse" yeydi Yesuusay hido.
8 Xhiixi gara afana maagani "Laaxo, neni ta zawaa gele axe maaquwasso tani. Neese bidzi katowo odde zeeruwa, ta hantaxi loolako e loole. 9 Taaseni tamba woosesako ta afana yesa, yeydiwo ta woose tooraxitako ta oomona yesa. Usaafa bidzo 'Hanguwa!' hidi taykete e hange, fedani 'Yoowwa!' hidi taykete e yoone. Ta maalani 'Ha esa hantuwa!' hidi taykete e hante" hidi e hido.
10 Yesuusay ye esa be siido wogga micci beera hangicha gerituseni "Aadewoko hinuse ta ohe, haanke yese orje aadexo keenge axe bidzoni Isra'eele feeqa degesso baasso. 11 Hay hinuse ohoko ta ohe, laga axiti hadursafani oshishafani yoodiko Abrahaamiyara Yissaaqiyara Yayqoobiyara afa kaatetiya massalaaka u utte. 12 Ye kaatetoy ususe naquttechoshitimay yenniya shanna cenchaako wude u dafutte. Yahani u yeeke, gaggoni u qiice" hidi e hido. 13 Yesuusani ye e geede xhiixi gara afana maagase " 'Maaqoko e maaqe' hidi ne aadessonike neese maaquwaye. Yoonase hanguwa!" yeydi e hido. Ye e hantaxini yenniyakawo e loollo.
Laga hargaxiti loollosa
Mrq 1:29-34, Luq 4:38-41
14 Yesuusay Phexhrose zawaa gelli e boolti garay iitana misshine i woy'usune e beedo. 15 I kuche e aytine micha hargey dhaddine i loollo. Yenniyawo dendi esuse worgusesa i hanto. 16 Qamese e hisune axiti xhoozi aytecho laga axita esuko oodine u gara yecha xhoozeni e gooddo. Hargaxitani uddi e loolusso. 17 Ye esani e matosi "Nu gafeteni e etto, nu hargeni e iddo" yeydi kaayaxi Isayasena zeeruttechashi e aaloronikeko.
Yesuusaara hangeesiti gara yoone maddha
Luq 9:57-62
18 Yesuusay axi lagay be googe bhikkiluttesesa be beedo wogga be erusichoshita bagade semfa u fottorosa e oto. 19 Muse woga eruse bidzi axi Yesuusako yoodi "Laaxo, ayan ne hange godo neerako ta hange" yeydi e hido. 20 Yesuusay "Geedaliti essa be yese googgo, kafitini essa be gele keexe keemako u keenge. Tani axi yeley essaa gelli kaxe ta ekke godo keenguwasso" yeydi hissine e mato.
21 Feday assi e erusichoshitaafa bidzi "Laaxo, neera yeseme buro nuwade handi ta taaggoose" yeydi e hido. 22 Yesuusay "Haydhasiti beese haydhase u taaggoronike dhagguwa, neni taara yoowwa!" yeydi e hido.
Jhirahoy eedho gisha
Mrq 4:35-41; Luq 8:22-25
23 Ye e geede Yesuusay zabhaa e gello. E erusichoshitini e geede gelline hame u ayto. 24 Hamiya u yesune waaxi gara osaxi jhirahoy dendo. Ye zabhaa waaxi gelline waaxi zabha oodhese hido. Yenniya Yesuusay ye zabhaa gehiya e yecha. 25 Hanke Yesuusako shidhini "Laaxo, baadunxhiko! Nuu ha essaafa kessuwa!" hidi hissine e erusichoshiti esa u birkusso. 26 Yesuusay "Ame yeydi iitana hi jhashe? Hinuni Wonto hi gobbesi waakidi oddhewo e maaddho!" hissine dendi agexeni waaxeni e kasshine fettonawo mikku e hido. 27 Ye geritini orjena du'eydi "Ha esi waakeydese axuna? Agexini waaxini esuse woosuttesi" yeydi u hido.
Lam'i axi garafa xhoozi goodduttosa
Mrq 5:1-20; Luq 8:26-39
28 Yesuusay Galila waaxe fotti Gerasenoone wude e yoodo. Yahani lam'i axi xhoozi ayteseesiti boossa godowafa kessi esaara u muto. Fettona iita osaxita u maaqicho gisha ye ogiyaanna ooneni garese danda'uwadiko yecha. 29 "Neno Wonto yele, niya am nuussa gelsesa? Woggay ellobaaniya nuu maddhunxiya ne yoodo?" yeydi kato keddaysi u zeerdo.
30 Usume oddhe fakkidese godowa laga girmiti yeemuttiya u yecha. 31 Ye xhooziti "Odde, nuu gooda'ayko se girmitukaa nuu anxuwa!" hissine esa u shidho. 32 Yesuusani "Hanguwayte!" hidi e hido. Ussaafa kessi yeemutticha girmitukaa handi u gello. Gaaga nuunaafa woxxhi hoddhi be kumenawo ye girmiti bagadiya gelli u baado.