6
Pāwu ꞉Yēēsu Sapaatu
(Mataayo 12:1-8; Māārkō 2:23-28)
1 Nto mii yēē kii pēsyēētaap *Sapaatu, kiipoonto keey ꞉Yēēsu ākoo kāānoomikyii kupuntēē mparoosyekaap nkaanuuk. Yooto, kuputoot ꞉kāānoomikyii nkaanuuk, kupiiriir ānkuusyoorci kōōt. 2 Nto pērē kukas ꞉Farisaayeek alake cēē kiimii yooto, kuteep kule, “Ām nee sāāyiirii *ntarastiit nyoo mwoowuu kule /māciiyiisyi ām pēsyēētaap Sapaatu?” 3 Kuwēēkyi ꞉Yēēsu kule, “Munaasuman ꞉akweek siluutyēēt yēē kiikwiiryēē ꞉pātyooyiintēēt *Tāwuti ntarastiit yoo kyoomē ꞉rupeet ākoo piiko coo kiipoonto keey? 4 Yooto kuwō ꞉Tāwuti Kōōtaap Yēyiintēēt /wociikooci mukatiinak cēē /kicēēcāmcinii *pēēliikaap kōrōsēēk nkit kwaam. Kyaam ꞉Tāwuti mukatiinak ānkucwici mpo yēēc piiko coo kiipoonto keey tōkōl.” 5 Nto yooto, kumwoow ꞉Yēēsu kule, “Pātyooy *꞉Wēēritaap Cii pēsyēētaap Sapaatu.”
Kiisoopso ꞉Yēēsu ām pēsyēētaap Sapaatu
6 Ām pēsyēētaap Sapaatu ake, kuwō ꞉Yēēsu *kōōtaap saayeet ānkuunēētiis. Kiimii kōyaato ꞉ciito ake nyēē kiiwus ꞉yēwutaap taay. 7 Kimiitē ꞉Farisaayeek ākoo poonwookiikaap ntarastiit yooto. Kiimii kuriipcini yoo mākuusoopso ꞉Yēēsu ām pēsyēētaap Sapaatu sākuwāsāntyi. 8 Nteenee kiinkēt ꞉Yēēsu kāāsōōtēywēēkaap picaa. Yooto, kumwooci ciicaa kiiwus ꞉yēwut kule, “Cōō paa ꞉nyii cēēyoony yu po taay.” Kucō ꞉ciicaato taay. 9 Nto kaamiit, kuteepee ꞉Yēēsu Farisaayeek kule, “Cāmwēēc paa ꞉ntarastiit ciiy kiy nyēē tāpoon ām pēsyēētaap Sapaatu nto nyēē miyaat? /Ciisoopiis nto /cēēpākēkiis?” 10 Kiicac ꞉Yēēsu kuurōōtoot ceekto tōkōl. Nto kaamiit, kumwooci ciicaato kiiwus ꞉yēwut kule, “Cuul yēwuŋuuŋ.” Kucuul ꞉ciicaato yēwunyii kunyool. 11 Yēē kāwokukas ꞉Farisaayeek āk poonwookiikaap ntarastiit ŋaleek cēē kātook, kunyēēr miisin. Yooto kuurwooc ꞉ceekto wulēē maceenamta Yēēsu.
Kiikway ꞉Yēēsu kiiyookiik taman āk āyēēny
12 Nto mii pēsyēēt ake, kuwō ꞉Yēēsu ākoy lakameet ake wokusaay Yēyiintēēt kuyeec.
13 Yooto kāwokuyeec ꞉kōōrēēt, kukuur kāānoomikyii, kukway cēē kiiyitē taman āk āyēēny ānkukuur cooto kule *kiiyookiik.
14 Kiikway Sumōōni nyēē kiimuul ꞉Yēēsu kule Pēētērō, Antereeya nyēē kii mutaakwaamitaap Pēētērō, Yāākōpō, Yoowaana, Filipō, Paaturumaayo, 15 Mataayo, Tuumasi, Yāākōpō araap Alfaayo, Sumōōni nyēē kiinyikan, 16 Yuuta* /Kicēēkuurē Yuuta araap Yāākōpō ām kaannyeet ake kule Taataayo. araap Yāākōpō ākoo Yuuta Iskaryoot nyoo kiicokuŋōōmto Yēēsu lētuut.
Kiisoop ꞉Yēēsu piiko cēē caaŋ
17 Yooto kāwokurōkunēē lakam, kōōruruukyi keey ꞉kāānoomik āk piiko alak cēē caaŋ cēē kiikwoonēē Yēērusālēēm, kōōrēētaap Yuteeya tōkōl, kōōrēētaap Tiirō ākoo nyēpo Sitōōn cēē kimiitē tukurumtaap ruurēētyēēt. 18 Kiikwoonii ꞉picaa kwokuyēpcinii yiit ŋaleek cēē kiinēētē ꞉Yēēsu ānku kimācē mpo kule /ciisoopēēc. Kiisoop ꞉Yēēsu mpo alak cēē kiipoonto muyōōnik cēē miyootēc. 19 Kiimācē ꞉picaa tōkōl kule cēētiiny Yēēsu, āmnyēē kiipoonto ꞉Yēēsu kāāmuukēywēēk cēē yēē kātiiny ꞉piiko, kusopco.
Ŋarakweek āk nyalilya
(Mataayo 5:1-12)
20 Nto mii yooto, kuweec keey ꞉Yēēsu ānkuurōōtoot kāānoomikyii ānkumwooci kule,
“Āyikuu kātootiin kule nee
akweek ꞉coo ākoosēē keey Yēyiintēēt,
āmnyēē nyiimwooŋ
꞉pātyooyiisyēētaap Yēyiintēēt.
21 Lēyē! Āyikuu kātootiin kule nee
꞉akweek coo -māāpoontē kiy yaawuut,
āmnyēē +/mācēēkōōnook ām lētuut.
Āyikuu kātootiin kule nee
꞉akweek coo āriirtōōsii yaawuut,
āmnyēē +maaŋarac lētuut.
22 Āyikuu ꞉akweek kātootiin kule nee yoo kaseenkaraak ꞉piiko alake ankutayaak ānkōōncuruurook ānkuŋōōmook, āmnyēē āyēntyinii *Wēēritaap Cii. 23 Yoo kākwiiwook yuu nyooto, ātuum ankaaraan kupo ŋarakweek, āmnyēē mii ꞉kiito nyēē wōō nyēē makukateenaak ꞉Yēyiintēēt ām kipkōōnkō. Āmutyooci āmnyēē /kiiciici mpo *wōōrkooyikaap Yēyiintēēt coo kiipo taay yuu nyooto.
24 Mii nyēē miyaat kule nee
꞉piiko coo mēēntōōs,
āmnyēē makuŋatee ꞉ŋarakweekwaa
kōōrooni.
25 Mii nyēē miyaat kule nee
꞉piiko coo sōōtē kule cēēpoontē kiy ake tōkōl,
āmnyēē mākupootyo ꞉tukuucaato
ām lētuut.
Mii nyēē miyaat kule nee
꞉piiko coo mii kuŋērēktōōs yaawuut,
āmnyēē mākuriiryo ām lētuut.
26 Mii nyēē miyaat kule nee
꞉piiko coo /cēēŋāloolēē tāpoon akookay,
āmnyēē, kiisumkuŋalaale mpo kuuko *wōōrkooyik coo kii mwiinōōt
coo kiipo kēny yuu nyooto.”
Cam cii ake tōkōl ākoo mpo puunikwook
(Mataayo 5:38-48)
27 Kiitasta keey ꞉Yēēsu taay kumwoow kule, “Kāāmwoowook akweek coo ālimwaani kule acam puunikwook. Āyiici piiko coo sēēnkērook tukuuk cēē tāpoonēc. 28 Akat ꞉akweek coo kācupook ānkāāsoomci coo yiwook ŋaleek cēē miyootēc. 29 Yēē kasyeeciŋ ꞉ciito kwarmatuut komosta ake, wēēkyi ake. Yēē kamac ꞉ciito kāpuutiiŋuuŋ, mutyooci mpo kaansuut. 30 Yēē kāsoomiŋ ꞉cii kiy, kooci. Nto, yoo kāsut ꞉cii kiiŋuuŋ, -mēēmwooci kukētuuŋ. 31 Āyicinii piiko alak kuyuu wuloo āmāktooy ꞉akweek /ciityoowook.
32 Kiy nee ꞉nyēē +māānyōōru yēē kaacam paatee piiko coo cāmook? Ntēē yiyē mpo ꞉piiko coo -mēēnkēt Yēyiintēēt yuu nyooto.
33 Kiy nee ꞉nyēē +māānyōōru, yēē kāāyici nyēē tāpoon piiko coo yiwook nyēē tāpoon? Yiyē mpo ꞉piiko coo -mēēnkēt Yēyiintēēt yuu nyooto.
34 Kiy nee ꞉nyēē +māānyōōru, yēē kāāpēsēēntyi piiko coo ānkēt kule yookwook? Ntēē pēsēēntyini keey mpo ꞉piiko coo -mēēnkēt Yēyiintēēt ānkumācē ꞉mpeeceek kule /cēēyookyi tōkōl.
35 Nteenee kāāmwoowook, acam puunikwook ānkāāyicinii ŋal cēē tāpoonēc. Āpēsēntyi piiko coo -mēēmuucē kuyookwook. Yēē kaayiy yuu nyooto, makuukataak ꞉Yēyiintēēt miisin ānku +māāyiyē tukuuk yuu wuloo yityooy ꞉Yēyiintēēt, āmnyēē yicinii ꞉Yēyiintēēt piiko tukuuk cēē tāpoonēc ākoo mpo coo māpir kōōnkōy āk mpo coo sooy. 36 Mācēktōōs āriirunēē piiko kuyuu wuloo yityooy ꞉Paapa.
-Mēēmuutyi cii musāānku
(Mataayo 7:1-2)
37 -Mēēmuutyi cii musāānku, /sumāciiwuuŋ mpēēnyii yuu nyooto. -^Meeruuste cii /sumaciiruustiiŋ mpēēnyii. Yēē kākwiiwuuŋ ꞉cii kiy nyēē miyaat, mācēktōōs kaalyee /saciikaalyiiŋ mpēēnyii. 38 Yēē ^kēēkootyē kiy nyēē poontē ām mooyēēt nyēē lēēl, mākukōōniŋ mpēēnyii ꞉Yēyiintēēt alak ānkurusuuŋ. Coo ^kēēkootyē, /cēēkōtuuŋ cēē tēē cooto.”
Ŋoo ꞉nyēē yēmē kuuntōōci cuut?
39 Kumwoow ꞉Yēēsu cēpotyāānkōōcēēt kule, “Muucē man ꞉cii nyēē koraat kuurēētoot ꞉ceekworaatyaanteet ake? Puryo kōt kusuucinii ꞉tukwaay mwēēnēēt? 40 Māpiirē ꞉ŋoomnēnēētaap ciito nyoo /ciinēētē nyēpo poonwookēēt, nteenee yēē kātitir nyoo /ciinēētē kuuneet keey mākunyōōr ŋoomnēnēēt kukarkayiit keey poonwookēēt.”
41 Kiitasta keey ꞉Yēēsu taay kumwoow kule, “Ām nee sēēkāsē ꞉nyii sikitityaa nyēē miitē kooŋtaap mutaakwoomēt ameekas musukyēēt nyēē miitē kooŋta nyeeŋuuŋ? 42 Muucē kule nee mwooci mutaakwoomēt kule, ‘Kany ānumuuŋ sikitityaanteet nyēē mii kooŋuuŋ,’ ānkēēpoontē ꞉nyii musukyēēt ām kooŋuuŋ nkit? Kāāmustooyiintooni! Mācēktōōs numu kiny musukyēēt nyoo miitē kooŋuuŋ seekaste tāpoon sēēnumci mutaakwoomēt sikitityaanteet ām kooŋnyii.”
/Ciinkētēē ciito yiyaanikyii
43 Kumwoow ꞉Yēēsu yēēc kule, “-Mēēyiwuu ꞉keet nyēē tāpoon lokoyeek† /Cēēkuurē ām areet ake kule matuuntaanik. cēē miyootēc, nto kēēyiw ꞉keet nyēē miyaat lokoyeek cēē tāpoonēc. 44 /Ciinkētēē keet lokoyeek cēē yiwuu. -Mēēyiwuu ꞉kateet kamoolik āmēēyiwuu ꞉sikoowēēt lamayik. 45 Yiyē ꞉ciito nyēē tāpoon tukuuk cēē kwoonēē mooyēēnyii nyēē tāpoon, nto nyoo miyaat kwiiyē ꞉nyoo tukuuk cēē kwoonēē mooyēēnyii nyēē miyaat, āmnyēē ŋaleek cēē ŋāloolē ꞉ciito ku cēē kwoonēē mooyēēnyii.”
Kāānoomiintēētaap Yēēsu nyēpo man
(Mataayo 7:24-27)
46 Kiitasta keey ꞉Yēēsu taay kumwoow kule, “Ām nee sākukuuroo ꞉piiko alake kule, ‘Mākoryoontēēt,’ āmākwiiyē kuyuu wulēē āmāktooy ꞉anii? 47 Kāānoomiintēēt nyēpo man ku nyoo limē ŋaleek cēē āmwoowuu ꞉anii ānkwiiyē kuyuu wulēē āmāktooy. 48 Karkeey ꞉kāānoomiintoonooto āk cii nyēē ŋāmē yēē mācē kule ateec kōōto kōt wokunyōōr kitaweet nyēē kāsisintyi. Yēē keeyiin ꞉ānnyōōsyēk ānkutuul keey ām swaama, -mēēmuucē kutyam kōyaato mpo kisic, āmnyēē /kicēētēēkyi yēē kiimoot. 49 Nteenee kāānoomiintēēt nyēē māpo man ku nyoo limē ŋaleek cēē āmwoowuu, āmākwiiy kuyuu wulēē āmāktooy. Karkeey ꞉nyooto cii nyēē tēēkyini kōōto wulēē punpun ꞉taŋeek. Yēē keeyiin ꞉ānnyōōsyēk ānkutuul keey ām swaama kuuturpuupē kōyaato kule puuu!”