Baúbhaphi ka toka n'Okomo bábhiki ɔmɔna kaYéso
2
1 Yéso dábɔkɔtɛani ka Bhɛtɛlɛɛ́mu, kenombe á ka Yudhɛ́a, ka mbenɔ á moamɛ Ɛlɔ́dhɛ. Mbusa á bɔkɔtɛana á Yéso, baúbhaphi ka toka n'okomo bundɔ dábaoúbha nyɔngɔ á basɛɛngɔa, dábaju ka Yɛusalɛ́ma. 2 Bâ koúsia: « Mɔkɔta ndea baYúdha, mmbɔ abɔkɔtɛani, a oa? Nga, débeɔni sɛɛngɔa akɛ n' okomo. Ka bondɔ, bebhiki ombhebha. »3 Mbenɔ nde moamɛ Ɛlɔ́dhɛ dáɔki nyɔngɔ ndɔ, nyama akɛ áodhuuka, na batɔa ka Yɛusalɛ́ma bɔbhu. 4 Áǒdhondanisa batobei- phɛa bangbóngbó ndea Mokonga bɔbhu na baphangi-ɛɔphi, áǒúisia te: « Ɔma sina nde Kiísito abɔkɔtɛanande?» 5 Báonsikisia te: « Ka Bhɛtɛlɛɛ́mu, kenombe á Yudhɛ́a, bíndɔ mɔtu-nyɔngɔ dádundu gea:
6 Ɔbɛ Bhɛtɛlɛɛ́mu kenombe á ka nji Yudhɛ́a, ɔbɛ kó tanda abhɔbhɔa sɔsɔbɛ á nji Yudhéa, ka nyɔngɔ nde moamɛ atokande mɔtɛakɔ, mmbɔ aeambande bakpa nɛmɔ baIsilaɛ́lia. »
7 Cɔ, Ɛlɔ́dhɛ áɔ̌ɔphana baubhaphi ka bɔsɔmɛa. Áokaba digimisa á mbenɔ sina nde sɛɛngɔa dásɛnɛki. 8 Mpɔ, áǒteka na Bhɛtɛlɛɛ́mu, áǒgea te: « Gǎni bɔcɔcɔɛ anja mbino á miki ndɔ. Mbenɔ nde bɔɔmɔ̌na ka yɛ, bóobhika omongodea ka gea, eme phɔtɔ négɛ mbhebhɛ.»
9 Cɔ, mbusa á ɔka nyɔngɔ ndea moamɛ Ɛlɔ́dhɛ, báoga. Oa, báɔmɔ̌na goto sɛɛngɔa ndɔ dábamɔ̌ni nókomo n'aoga mosa abɔ, na kabii dágěomama gǔ á ɔma nde miki dábéi. 10 Mbenɔ nde dábamɔ̌ni sɛɛngɔa ndɔ, báoba na maseye angbo phɛ̂. 11 Báojua ka Bhɛtɛlɛɛ́mu, báongia subi éndu, báɔmɔ̌na miki n'amakɛ. Báogbuka muanku, báombhebha Yéso. Mbusa, báokoda nkumba nɛbɔ, báomopha ɛkɔmi: ɔlɔ, obani, na nkoki ésombi akpɛ.
12 Mokonga áɔ̌phɛa goto ka njeki gea te, bákajɛmbɛ k'aphe ndea Ɛlɔ́dhɛ. Ka bondɔ, báoja k'aphe nɛngbo.
Amisa ékombo ndea Yɔsɛ́phu
13 Mbusa á ja a baubhaphi, malaeka ndea Mokonga áondhonda Yɔsɛ́phu ka njeki, áongea te: «Jujuka. Teani na Mísii. Bóikɛ ko. Mbusa, nekongodeande mbenɔ sina nde bojande. Nga, Ɛlɔ́dhɛ aokaba moa á miki.»
14 Yɔsɛ́phu áojujuka, áoboa ekombo nɛkɛ, báoga kipha na Mísii. 15 Báoika ko na ka bii Ɛlɔ́dhɛ dâku.
Cɔ, nyɔngɔ ndɔ áɔtɔtɔkɛana bíndɔ Mokonga dángodi mɔtu-nyɔngɔ gea:
Nɛmɔphani muku amɔ ka toka na Mísii.
Kaba á moa a Yéso
16 Bii Ɛlɔ́dhɛ dáubhi ye gea, baubhaphi bándhemi, áɔbɛa phɛ̂. Aǒteka bakpa ka ma a baniki-boko bɔbhu á ka Bhɛtɛlɛɛ́mu, bundɔ bá na basaga babɛ na kusi a basaga babɛ. Dági bo mbusa á digimisa á esa ndɔ baubhaphi á mphaniɔ á sɛɛngɔa dábamɔ̌ni sɛɛngɔa mosa-mosa.
17 Cɔ, nyɔngɔ ndɔ áɔtɔtɔkɛana bíndɔ Mokonga dángodi mɔtu-nyɔngɔ Yɛɛmía gea:
18 Ɔka! Ɛsɔ aotoka na Láma, ngamɔ n'oiɔ asi, Lakɛ́lɛ naógamea banakɛ. Kákondi bánkɔbisɛ, ka nyɔngɔ nde bátindi.
Yéso ande ntɔa-ka-Nasalɛ́ti ka bo?
19 Cɔ, Ɛlɔ́dhɛ dâku. Yɔsɛ́phu na phɔtɔ ka Mísii, malaeka ndea Mokonga áondhonda ka njeki, 20 áongodea: «Jujuka, ja n'ekombo nɛkɔ na Isilaɛ́li. Nga, bundɔ dábaokaba moa á miki bâsi.»
21 Mpɔ Yɔsɛ́phu áojujuka, áoboa ekombo nɛkɛ, áoja ne na Isilaɛ́li.
22 Ka matu ndɔ, Alakɛlɛ́a dáiki ka mpɛnɛ á abhakɛ Ɛlɔ́dhɛ. Ka bondɔ, Yɔsɛ́phu áobanga ga á ko.
Ka bondɔ, malaeka â goto ondhonda ka njeki, áongeae: «Ga na Galiláia.»
23 Yɔsɛ́phu áogea bíndɔ Malaeka dángodi. Aoika na Nasalɛ́ti ka Région á Galiláia.
Cɔ, nyɔngɔ ndɔ áɔtɔtɔkɛana bíndɔ Mokonga déngodi baɔtu-nyɔngɔ gea:
Bámɔphanande ntɔa-ka-Nasalɛ́ti.