6
Walisam so dok go tegan peplet go
1 Ngganemot no, genam Yohanes nemu iti go, gemang ikum: klaya tete sogo Walisam so taidisonamon yam so dok go tegan ngga, Domba Nok lo gemang plet. Ngga, plet gono, namon-namon yam sogo Walikabung sik sogo meno lo pu go, kukluim kalik, genam lo gemang tup. Nemot lo usi go, “Weng-a!” 2 Ngga temu ey, genam ikum go, kuda klaut suk sogo gemang pung. Nemot blo nogo, ple ey ta no mlak go sedue gemang suing. Nggano, don ey suing genang ibamwabu, sedue ngga no iti go plepung so gemang klong. Nemot koklong go: don ey suing go ple idam dega, pui genang yakua!
3 Ngga ey, tegan namon tete sogo Domba Nok lo plet gono, genam lo tup go, ngge kalik namon tete sogo Walikabung lo usi go, “Weng-a!” 4 Ngga no, kin suk sogo kuda meno gemang pung. Kuda blo no suing go sedue no, kukunan ngengam yakay tong genang don gemang iti. Way-way so sikabung don ngganemot logo so plesagui semu go, uluk go mea leguot-sing. Tengang kaluang kangok go, nemot go ta no gemang iti.
5 Ngga ey, nangglik tete sogo tegan Domba Nok lo gemang plet. Genam tup go, nangglik tete sogo Walikabung lo usi go, “Weng-a!” Nggano, genam nemu iti go, kuda meno degit suk sogo pung go, gemang ikum. Kuda blo sogo sedue, buyamtui ey, ta no gemang mlak. 6 Ngga ey, namon-namon yam sogo Walikabung nesip sik so, kuda blo sogo sedue sono nebutkluim meno lo usi go, ngge kalik genam mo tup, “Kluongku pung go nogo, ten-a seguay dato, duoy-a kangok dega. Seguay go ten nay genang, kangok so kebali-a ku klaya mea semu. No, mlay ey didon eygo-a, yakua waluk genang so se itak!”
7 Nggano, namon-namon tete sogo tegan Domba Nok lo plet go, genam tup go, Walikabung namon-namon tete sogo lo usi go, “Weng-a!” 8 Ngga ey, genam lo ikum go, kuda meno blongkenip go suk sogo, gemang pung. Nemot blo no suing go sui: Sikebong! Klay golo nemot ey keng go ngga: Kekebong yakena. Ple tengang, kluong ku, dalu ku, nggano menay iseng lo leguot genang don, nemot go ta no gemang iti. Ngga tang so, kukunan sikabung temu ‘seperempat’ yam so, mea leguot.
9 Genam nemu iti go, taidi tete sogo tegan Domba Nok lo plet go, gemang ikum. Ngga ey, Ki Wali Iram go tap ey, dabui lo Iram Yesus no keng go blong duoyap, deguo teguop so penklong gono tuk-sing go dabuilap, demusung ba sogo, genam lo gemang ikum. 10 Nggano, kangok so ngge kalik nemotnang lo gemang usi-netenawon, “O, Woy Wali Iram! Mot seguong-a klaya, keng genang Iram. Esang! Kaning so, atnang go kin, kukunan sikabung lo pi go nogo kisebui way ya taling?” 11 Usi ngganemot tup gono, nemotnang no amka klaut walong go gemang wasey-sing. Nggano, way so nemotnang sono pu go, “Nggeasui go, ku tebot ngge no gigling ey motnang-a se bubung! Blong duoyap temu, Iram Yesus no dabui lo keng go, motnang kalik but go, kebong genang, yam so i gono, Ki Wali Iram go duduing no naklay mea pluep.”
12-14 Yang! Taidisoklaya tete sogo tegan, Domba Nok lo plet gono, tasam-tasam ngge mo ikum: kuysu kangok so gemang lek. Amka kukuim sogo kok go kalik, woy se kenip. Banu kin suk so naklay gemang iwot. Kukunan sono ut sik sogo top negot go, yamson sengin nebit kangok golo teglik go kalik gemang net-sing. Ut lek go, wip kalik gemang rlok. Kumeduim ey nan beap lo tong go ey, nemot go sip sik sogo, idi sono gemang rlo-sing.
15 Nggano, demu put kangok-kangok go ba lo, kumeduim ba sogo demusring nesip lo, suali so woy-banu naklay: iram-tegay, woy-woy, ple idam, taut eygo-taut kua go, koybutasemu, naklay-naklay gemang son-sing. 16 Ngge kalik, kumeduim ey demu kangok go eygo sono nemotnang lo gemang pu, “Bung kundo go, atnang teglue-a! Iramdemu blo so susuing go Dega lo atnang ikum genaning. Domba Nok logo idekeba suali sogo se.” a 17 Yang! Ki Wali Iram ey Domba Nok eygo lo taling genang kisebui ku mo pung gabe. Don eygo, nando-a ya suing?