5
Sam rlok go tegan Domba Nok lo plet go
1 Ngga ey, genam Yohanes nemu iti go, Iramdemu blo so susuing go Sedue Klaya Duo gemang ikum. Nemot go tasemlea idi no, sam rlok go, tatondabui ey klik go, taidisonamon yam sogo tegan lo dok go gemang mlak. 2 Nggano, Ki Wali tamot don dega eygo genam lo gemang ikum. Ngge kalik kangok so Nemot lo gemang pu, “Sam ngge plet-sing go, nando logo so ya truk?” 3 No, seni so, ut blo sogo, kukunan blo sogo, kebong go sip sik sogo, sam ngge plet go seni ikum genang, klayanang go sedue kua gabe. 4 Ngga kalik Ki Wali tamot lo pu go tup gono, kangok so genam u gemang kluo, “Esang! Sam ngga, plet go, truk go ikum genang don eygo kua-ba?” 5 No, genam no ngge kalik woy-woy sik sogo meno lo gemang pu, “Esang, dem, u kua kluo ey, ikum-a! Yehuda sik sogo ‘Singa’ tang Daut sik so pung go Iram, Nemot-a don ey mo suing. Ngga tang so, taidisonamon yam sogo tegan ngga, Nemot lo plet go, truk go, sam rlok go seni, ibe mea ikum-eyon.” a 6 Ngga ey, genam nemu iti go, Iramdemu nesip no, Domba Nok tengang lo tong go kalik ip go, Walikabung namon-namon ey woy-woy eygo lo, wok teguot go gemang ikum. Domba Nok go matu, ngga Nemot go don taidisonamon yam so, nemu taidisonamon yam dali so. Ngga, Ki Wali Waglo taidisonamon yam sogo, kukunan sedingno-sedingno mot-dak go klong go gemang. 7 Ngga ey, Domba Nok ngganemot ip go, sam ngga Iramdemu blo so susuing tasemlea idi sik so gemang iti-nawon. 8 Sam ngganemot so iti gono, Domba Nok mit sono, Walikabung taidisonamon yam sogo ey, woy-woy 24 yam sogo naklay, gemang unuik-sing. Woy-woy naklay go ta nogo, bloma ‘kecapi’ ey gemang mlak-sing. Nggano, emas lo semu go daysruk, kinemon ey tetegin golo tram go, gemang mlak dali. Ngga, Ki Wali Iram nogo so blong duoyap lo keklak go dewi gemang. 9-10 Ngga ey, u sam inim dato-a ngge kalik nemotnang lo gemang kukluo,
Sam ngga iti go,
Mot seguong logo so mea plet.
Seni so, luk go Mot kebong go,
Mot go kin pi golo king go tang so,
sikabung saula-saula, tang-tang,
nebut meno-meno, nan-nan naklay sik sogo,
Ki Wali Iram sono itak genang so, mo lek gabe.
Yang! Ki Wali Iram nogo blung so
nemotnang Mot lo mo klik gabe.
Ngengam so keduik go trang-trang so, mo taling.
Kukunan naklay tamlak genang woy-woy so,
Mot lo mo temuit.
11 Ngga temu ey, genam ikum go gemang tup: Ki Wali tamot-tamot mata sogo, tagu i genang yakua. Walikabung ey, woy-woy eygo Iramdemu mit no gemang ip-lak. Seni so, nemotnang, miam dega ey. 12 Yakay ey usam ngge-a nemotnang lo gabe kukluo,
Domba Nok kalik luk go kebong go ngga,
Iram so temuit go blongdon, senongduduing naklay,
sui iway blo sono iti go, takokong, taiti naklay,
Mot seguong no gabe keklak.
13 Nggano, genam lo tup go: usam ngge-a, ut blo sogo, kukunan blo sogo, kebong sip sik sogo, beap ba sik sogo, sikabung, woy-banu mam naklay-naklay lo gemang kluo-netenawon,
Ki Wali Iram Iramdemu blo so susuing go!
Mot, Domba Nok!
Seni so, Mot go sui-a, iway ey blo dega so,
takong, taiti naklay,
Mot seguong no senang so mea i-iti.
14 Usam ngganemot tup gono, Walikabung taidisonamon yam sogo lo gemang we-netenawon: ngga seni! Ngga ey, woy-woy naklay unuik go, ta gemang kokong.