3
Yakena Sardis sogo blung nogo sam
1 Yohanes no Iram Yesus lo pu go, “Sam ba no Genam lo pen go nebut ngge, blung Sardis go Ki Wali tamot nogo nase klik! Ki Wali Waglo taidisonamon eygo so uwawi go, nggano taidisonamon yam sogo utop naklay ta so mlak go, Genam ngge gabe. Gabe pen-asitugu, ‘Motnang go takebali naklay Genam mo senong. Nemot-a motnang so ibe lo pepen go, nemudi so wali koklong go, seni so motnang go wali-a mo kebong sang.’ 2 Ngga tang so, gabe senglok-situgu: buong go motnang ip-lak ya! Yam so, i-go kebong sogo, tandali don se kok. Ki Wali Iram go suongku nogo motnang go takebali sik so waliteguop pung go, Genam maning kua ikum. 3 Se duing! Kuduong so, walinebut motnang lo tup go, dabui ba no tui go, sogo kalik mo? Nggeasui go waysagi ey walitap ngga-a se mlak. Tap piam go, ngga sono se itak! Yang! Motnang kua buong go, wom sedue kalik, Genam pung so mea pung. Woy yakua senong.
4 No, Sardis sogo blong duoyap temu gemang. Nemotnang go dabui, amka kalik kon kua tebok. Tupduk sogo so, amka walong klaut-klaut sogo kok go, Genam ey kerlam so nemotnang mea klong.
5 Don waysagi ey nando suing go, amka klaut ngganemot mea kok dali. Nggano, kikiwali sam ba sik sogo nemot go sui, Genam lo mea kua suep. No, At go Ki Wali Aya ey, Ki Wali tamot-tamot eygo suongku no, dia no nemotnang go sui-a Genam lo mea yang-balu.
6 Nando kama gemang go, Nemot go blong duoyap nogo so Ki Wali Waglo lo pen go nebut, suey so nase keng!”
Yakena Sardes nogo sam ngge no yam.
Yakena Piladelpia sogo blung nogo sam
7 Yohanes no Iram Yesus lo pu go, “Sam ba no Genam lo pen go nebut ngge, blung Piladelpia go Ki Wali tamot nogo nase klik! Genam ngge, Nemot. Genam ngge Teguop Iram, dabui lo keng genang. Iram Daut go blongdon sebendi so mlak go, Genam gabe. Genam lo tenuing go, sikabung logo yakua kadun. Nggano, Genam lo kadun go, sikabung logo yakua tenuing. 8 Nggeasui go ikum-a! Mot go don seguay dato go, Genam mo senong. No, Genam no tupduk tang so, nggano, Genam go sui kua wayang go sogo so, yatap motnang nogo-a gabe tenuing-situgu. Sedue meno logo yakua kadun. 9 Se ikum! Kupiamgo blung sik sogo sikabung meno, wamoymlue sogo sikabung, At lo pu goso weng go, motnang no ngge kalik mea mlue, ‘Atnang ngge, Ki Wali Iram go blung sedue Yahudi gabe.’ No, nemotnang ngga sedue Yahudi seni kua sang. Yang! Motnang go masi ba no Genam lo pu goso unuik go nemotnang mea suing-lak. Nggano mea yang: motnang-a Genam lo klum go sikabung so mo lemoy gabe! 10 Yang! Genam lo pu goso, don ey motnang mo suing. Ngganemot sogo so, ku kua walong gono, piam go ku pung go, wayso Genam go giglingwegeng ba no don ey motnang mea suing. Seni so, kukunan blo sogo sikabung naklay nogo, dabuitatra genang koywong, mea taling. 11 Yang! Keda so Genam mea weng. Genam nogo-a waysagi ey se mlak! Ngga tang so, motnang no naliblong kok go, meno duo logo mea kua truk.
12 Don ey nando suing go, Ki Wali yap ba no, nemot, neguon kangok goso, Genam lo mea king. Senang nemot mea gigit. Nggano, Ki Wali Iram go sui ey, Ki Wali Iram go yakena sui ey nemot temoy no Genam lo mea klik. Se senong: ngga, kukunan blo sono yakena Yerusalem inim li go.
13 Nando kama gemang go, Nemot go blong duoyap nogo so Ki Wali Waglo lo pen go nebut, suey so nase keng!”
Yakena Piladelpia nogo sam, ngge no yam.
Yakena Laodikia sogo blung nogo sam
14 Yohanes no Iram Yesus lo pu go, “Sam ba no Genam lo pen go nebut ngge, blung Laodikia go Ki Wali tamot nogo nase klik! Genam ngge Seni Iram! At lo ikum go-a, ibe no suey so gabe tetaling. Genam seni eygo, dabui lo keng genang. Se duing: naklay-naklay tang so Ki Wali Kumam lo tui go, Genam-a gabe! Gabe pen-asitugu: 15-16 Motnang go takebali naklay Genam mo senong. Genam sogo dabui idop motnang kua pupluok, no, motnang kua dalip dali. Esang, dabui idop kua go, dalip kua dali go, semlea piam go kalik, kusui so, motnang Genam lo mea mot. 17 Motnang lo pu go, ‘Atnang taut mata so, naklay-naklay gemang.’ No, motnang kua senong, motnang go wali seni kua, yam so mo waluk. Genam lo pu go, ‘Esang, dabuiklum! Motnang taut kua, ulue so susuing go, nemu mo pung.’ 18 Ngganemot sogo so, ngge kalik motnang nogo mang gabe kiking, ‘Genam sik so emas iku koy lo mo duik go-a, duoy lo motnang se nay, ngga ey, waliblong ey motnang mea suing. Yang! Amka klaut teguop-a, Genam sik so se iti! Ngga ey, motnang ulue sogo, suongsut mea kua tra. Yang! Dabuinemu ut go pli genang mlay Genam sik so se iti, ngga ey suey so blong mea ikum.’
19 Se senong! Klum eygo nando no Genam duduing go, nemot bebat go demun eygo mea srap dali. Motnang go wali-a iwot-dak go, tupduk so yakay ey se keng!
20 Ikum-a: yataput no Genam ip go tetegak go. Suey so At go nebutbluem tup go, yataput tenuing go, Genam degut go, klay gono suing go, yakay ey imot ten mea dam.
21 Don ey nando lo ip go, Iramdemu blo no Genam ey mea suing. Don ey, Ki Wali Aya ey klay gono Genam suing go, tamlak go kalik.
22 Nando kama gemang go, Nemot go blong duoyap nogo so Ki Wali Waglo lo pen go nebut, suey so nase keng!”
Yakena Laodikia nogo sam, ngge no yam.