2
Yakena Epesus sogo blung nogo sam
1 Yohanes no Iram Yesus lo pu go, “Sam ba no Genam lo pen go nebut ngge, blung Epesus go Ki Wali tamot nogo a nase klik! Taidisonamon yam sogo top ey, ta semlea idi no mlak go, taidisonamon yam sogo sagoy mas nesip ba lo klong-weng go, Genam ngge gabe. 2 Yang! Dabui lo kangok so motnang lo pupluok go, Genam mo senong: kuno-woyno koywong ba sogo, don ey motnang susuing go, Genam mo ikum. Yang! Taybat eygo sikabung ey motnang kua bubluot. No, don ey nemotnang nogo motnang lo mo waydang. Klay sedue kalik sedue temu dedegut golo pu go, ‘Atnang ngge Iram Yesus logo tamot gabe.’ No, suey so nemotnang neyboy go, ikum gono, motnang mo senong, ‘Nemotnang ngga, wamoymlue sogo, Iram Yesus go tamot kua.’ 3 Yang! Koywong mata so tra go nogo, waysagi ey Genam go sui no mlak go don ey motnang mo suing. Ngga naklay Genam mo ikum. Ngga suey. 4 No, ngge sogo-a gabe bebat-situgu: Genam nogo motnang go klum kuduong sogo mo nega, esang. 5 Se duing! Day ba sono go kalik motnang mo pui, Genam sik sogo ket dega so. Nggeasui go, tap piam go motnang nase itak! Banim go kalik suey so dabui lo, tandali Genam no se keng! Suey so kua keng go, tandali Genam weng go, sagoy mas motnang sik sogo iti go, motnang ku mea klik. 6 Yang! Nikolaus b logo tap saysuk nogo, motnang don ey mo waydang, Genam lo waydang go kalik. Ngga suey.
7 Nando kama gemang go, Nemot go blong duoyap naklay nogo so Ki Wali Waglo lo pen go nebut, suey so nase keng! Nando, don ey suing go, Ki Wali Iram go usu Pirdaus ba sogo walididon buo go, nemot lo mea dam.”
Epesus nogo sam, ngge no yam.
Yakena Smirna sogo blung nogo sam
8 Yohanes no Iram Yesus lo pu go, “Sam ba no Genam lo pen go nebut ngge, blung Smirna go Ki Wali tamot nogo nase klik! Kuduong sogo, i go sogo Genam ngge gabe. Kebong gono, tandali Genam mo nglong. 9 Genam senong go: koywong ba lo koklong go, taut kua go sikabung motnang gabe. No, motnang go wali tap-a blong ey mo miam. Motnang so sikabung temu lo wayang go, Genam mo senong dali. Nemotnang tang so pu go, ‘Atnang ngge sikabung Yahudi.’ No, sikabung Yahudi seni kua. Ngga, Kupiamgo blung nemotnang gemang. 10 Yang! Koywong, idekeba pung go nogo, motnang-a suali kua tra! Motnang go dabui ta tetra so, Kupiamgo gemang duduing. Motnang sik sogo sikabung temu mlak go, boy ba sono nemot lo mea betep. No, kua kay! Kupiamgo ku tanamon dato so mea suing. Ngga lemoy go nogo, waysagi ey Genam no mlak go tang sogo, motnang mea kebong dali! Iram Yesus no don ey nandonang susuing go, nemotnang nogo Senang walinali-a Genam lo mea kok.
11 Nando kama gemang go, Nemot go blong duoyap nogo so Ki Wali Waglo lo pen go nebut, suey so nase keng! Don ey nando suing go, da namon tete sogo kebong logo iseng, nemot yakua tra.”
Yakena Smirna nogo sam ngge no yam.
Yakena Pergamus sogo blung nogo sam
12 Yohanes no Iram Yesus lo pu go, “Sam ba no Genam lo pen go nebut ngge, Blung Pergamus go Ki Wali tamot nogo nase klik! Motnang nogo kalong idi-a idi tong go tengang so mlak golo, ngge kalik gabe pepen 13 Genam mo senong, Kupiam golo ta mlak go sip, koywong eygo ba so motnang gabe. No, Genam go sui nogo don ey mlak go, nggano, Genam no dabui iti go kua itak. Yang! Genam go dem seni, Antipas, motnang go yakena no, ibe no Genam go sui kangok so pu go, sikabung damoy so, but go nogo, Genam motnang logo kua itak. Motnang go yakena ngga, Kupiamgo suing dali go gemang. Esang!
14 No, motnang go tasam sik so, Genam logo gabe ya bebat-silu. Sedue temu gemang, babuasi Bileam c logo tap piam go-a waysagi ey mlak go kekeng go. Ngga, naliwabu ey ta keduik go, kamea yap no ten dedam genang, ngga ey, kamea tebadali sesrek genang walop-a nemotnang gemang pepla. 15 Ngga kalik dali so, Nikolaus go tap piam go nguok gono keng go sedue temu gemang dali. 16 Esang. Tap piam go sik sogo, se teguey-lak! Kua teguey go, ku walong kua gono, motnang mit no Genam pung go, Genam go lom ba sik sogo tengang lo ple mea tui.
17 Nando kama gemang go, Nemot go blong duoyap nogo so Ki Wali Waglo lo pen go nebut suey so nase keng! Nando, don ey suing go, kok go gigit go waliten Ki Wali Iram sik sogo nemot nogo Genam lo mea iti. Nggano, nemot nogo sui demening go-a, demu ibam-ibam sogo temoy no klik go, Genam lo mea iti. Sui ngganemot, sikabung meno logo yakua senong. No, nemot seguong logo-a mea senong.”
Yakena Perganus nogo sam, ngge no yam.
Yakena Tiatira sogo blung nogo sam
18 Yohanes no Iram Yesus lo pu go, “Sam ba no Genam lo pen go nebut ngge, blung Tiatira go Ki Wali tamot nogo nase klik! Genam ngge, Ki Wali Danon gabe. Genam go nemu, koy nebleng kalik, Genam go masi gualing go, irop-irop ey tembaga koy kalik nemu ey kikli. Ngge kalik gabe pen-asitugu, 19 Motnang go kebali, Genam mo senong. Way-way klum motnang logo gemang. Suey so dabui lo motnang gabe kekeng. Sikabung meno nogo motnang gemang tetebok dali. Koywong iseng pung go, don ey motnang mo suing. Ngga naklay, Genam mo senong. No, nggeasui go wali don motnang go wali banim go ey kua kerlam. 20 Motnang go tasam sik so gabe ya bebat-silu. Yangga: kabung Isebel logo d tap piam go. Ki Wali Iram go senongduduing goso, wamoy so nemot lo pu go. Ngga ey, Genam no keng go sikabung tap piam go nemot lo taling go, nemotnang mo nega-sing sang. Kamea srek genang walop-a nemotnang pepla. Nggano, kudumat ey ta keduik go tendam-a, gemang dedam dali. Nemot-a tap ngga lo tetaling go, motnang logo kua tong go itak ne. 21 Kabung ngganemot kamea itak go teguey genang ku, Genam lo mo iti. No, teguey go keng sogo, nemot moyso. 22 Se ikum! Kabung ngga nogo idekeba Genam lo mea iti. Sadui srek go, tandali keda sogo nemot yakua ip. Seni so, nemot ey kamea so, naliwabu ey ta kekeduik go sedue, kunala piam go ngga, kua itak go, kekedik go ba sono Genam lo mea itak. 23 Taybat ngganemot sik sogo, kamea duo naklay, idekeba mea iti dali. Genam lo tuk go mea leguot-sing. Ngga ey, At go blong duoyap naklay senong genang: nemotnang go dabui ta, klay-klay Genam lo gabe tetra-sing. Nggano, nemot go seguot way, nemotnang go takebali ey i go-a mea iti.
24-25 No, yakena Tiatira sikabung temu nogo gabe pen-asitugu: Isebel go tap piam go ngga nogo, motnang kua keng go, ngga suey! Seni so, motnang Kupiamgo logo, wamoymlue tap tebuem-tebuem naklay, suey so mo ikum. Ngga ey, piam so tap ngga, motnang lo mo paysing. Ngganemot tang so, motnang nogo ide Genam logo mea kua tebok. Ngge-a se keng: Walitap seni eygo-a, dabui ba so suey so gigit go, waysagi ey se mlak, e... tandali Genam se pung-alu.
26-28 Don ey nando-a susuing go, Genam lo taling go kebali-a pupluok go, ku yam sogo pung go, saula-saula ta mlak genang don, nemot sono Genam lo mea iti. Tamlak genang don Genam sono, At go Ki Wali Aya lo iti go kalik. Saula-saula, tang naklay, Nemot go teguoli ndengdon ey golo mlak go, nan sik sogo sruabon kalik, mea mesuop. Don ey nemot suing genang, ku blong sogo no pung go besue-a, nemot go ta sono Genam lo mea iti.
29 Nando kama gemang go, Nemot go blong duoyap nogo so Ki Wali Waglo lo pen go, suey so nase keng!”
Yakena Tiatira nogo sam, ngge no yam.