5
Taut miam eygo sogo dromking
1-6 Taut mata sogo sedue! Kukunan no wali genang drang iyaluim go sik so, saysuk ngge no, yakay ey walop-a motnang sang sesemu. Ten teguop-teguop-a dedam, bu-a mata so dedrop. Se ikum: menay tong genang ey motnang go saysuk mo kerlam.
No, genam lo usi go, “Ngge sogo kalik go kluim?” Yangga, seguot duoy motnang lo gluik goso, usukebali sedue dabui ba lo kangok so suang go, unebu kluim. Se senong: kebali sedue go dewi, Ki Wali Kumam, Ki Wali Mani Iram lo mo tup gemang. Yang! Nemudi sogo, kuklue kua go sedue nogo idekeba motnang lo mo taling. Ngga ey, but go mo kebong dali. Motnang-a pu, “Nebut way nemotnang yakua tenguo wa!” Esang! Kisebui ku no mea ikum.
Taut mata sogo sedue, nggeasui go weng go se tup! Esang! Yansi tra genang koy iseng sogo unebu kluim, nggeasui kangok so motnang se segueng! Nemot-a nggeasui go, ku yam sogo, taut senang-senang-a motnang lo ne iyaluim. No, se senong: motnang go taut naklay mo waluk gemang. Amka teguop-teguop go yam so segutmung lo mo dam. Drang senang-senang, don mo kua. Nggano, demusamon idop-idop sogo, emas, perak, taut ngga naklay kui ey mo tui-sing gemang. Yang! Motnang nogo kisebui, drang kui tui go koy lo mea pu. Ngga ey motnang go saysuk dam go mea kuim.
Don ey gigling genang
7 Dem-debui, blong duoyap! Don ey motnang gigling go, e… Woy Dem pung genang ku no se pung. Yatrang ngge-a se ikum: seni so, yaguisa yam gono, usu woy pli go, usu mea kuali. Ngga ey, usukebali sedue lo gigling ey bubung go, e… usu kuali go, wasma iti genang ku no mea pung. 8 Ngga kalik dali so, Woy Dem weng genang ku, gigling ey, don ey motnang lo se bubung dali. Se senong: Woy Dem gabe dedagu!
9 Dem debui, blong duoyap! Way-way so, nebut piam go motnang kua tetegueng! Motnang nogo idekeba Ki Wali Iram lo taling genaning. Ngge-a motnang se duing, “Ibe no kisebui taling genang Wengkabui, dali seboy so gabe.” 10 Banim go nabi-nabi go wali yatrang no keng genang-a motnang lo se mlak. Ki Wali Iram go sui no ibe sono suey so mo pen-nengam. Ngga tang so, iseng tra go, no don ey mo gling-neakam. 11 Dabui lo gigling go tang so, waliyakay eygo so gabe pu-eton. Se ikum: Israel go babuasi Ayup no. Nemot-a idekeba iseng kangok go tra go, nemot go gigling kua sut. Motnang mo tup dali? Yam sogo no, nemot go wali nogo kangok so Ki Wali Iram lo mo tebok. Yang, gualaklum go nuik Ki Wali Iram gabe!
Woy Wali Iram go suongku nogo wali
12 Dem-debui, blong duoyap, se tup! Nemu klaya seni go: Woy Wali Iram go sui nogo ta kua nat! Ut-demat sono, kukunan demat sono, woy nogo, banu nogo ta kua nat! Gemang go, gemang so se pu! Kua go, kua so se pu! Seni sogo-a kua wa go kisebui mea iti. 13 Yang! Nago no motnang sik sogo meno duo, sesat ey tra go, dewi-a se pupu! Meno duo yakay eygo, usam Woy Wali Iram nogo-a se rlek! 14 Sadui so nando sesrek go, blong duoyap go trang-trang-a usi go, dewi nemotnang lo pu genang. Ngga ey Woy Dem go sui no, mlay ut go ta se suk! 15 Seni so, Iram Yesus no dabui klaya iti go sik so, trang-trang lo keklak go dewi, don ey wadong golo, sedue sadui sogo ngga, Woy Dem lo pali go mea ip. Piam nemot lo pluok go, mea suep-sing. Ngga ey, saysuk-waglo naklay Woy Wali Iram lo mea sesuoy. 16 Way-way so piam wa gono, sadui suey genang dewi se klak dali. Kua kay! Woy Wali Iram lo iwat go sedue lo dewi don ey uwadong go, seni dega ey mea tagot. 17 Se duduing! Banim dega go, tasam seni eygo nabi Elia lo mo semu-ngam. Nemot-a imot ey kerlam go sedue, sa yakua pu genang so, Ki Wali Iram no dewi don ey mo klak-ngam. Ngga sik so, e… yagui 3,5 yam so, sa kua goso gemang suing. 18 Ngga ey, sa pu genang dewi tandali pu gono, ut sik sogo sa kangok so gemang pu. Nggano, kukunan blo nogo tandali didon gemang tagot. 19-20 Dem debui, blong duoyap! Motnang sik sogo meno duo Woy Dem go tap sik so, tap piam golo banom so pling go, walitap no tandali andua lo wawi go, iwot go keng go, ngge se senong: duo ngga andua temu lo tandali wawi go, Sikebong go ta sik so, wali sono lek go, nemot gemang sesuoy. Yang! Andua lo wawi golo, konkebamling miam eygo Woy Dem lo mea suep.