Sura ni Yohanes to Katolungkanina 1

Sura ni Yohanes to Katolungkanina

Tabe popamulana

1-4

1 Lako si yaku topangkeni todea nu Allatala. Sura ei nipakatu si Gayus to nipotowe mpuu-ku.

2 Sarara-ku to nipotowe-ku, nosambaya-ku bona mabelo pade maseha dodo koro-mu, ewa karoso nu kaparisayaa-mu. 3 Nasana mpuu rara-ku nikaratai nu basangkia dua sarara-ta saongu kaparisayaa, pade nanguli bakote iko mpuu-mpuu nenomba ri Allatala. Pade iko natuwu oa nantutu pepatuduki lako ri Allatala. 4 Tado naria kasanaa-ku to neliu kabetena, sangadina namparonge ande ana-ana guru-ku natuwu ri rara inggu to nakono.

Mombetulungi pade popaewa

5-12

5 Sarara-ku i Gayus to nipotowe-ku, nuapa to nipowia-mu nampopakalio bakote iko to natundu. Iko nantulungi sarara-mu saongu kaparisayaa, noudamo isira ee tou-tou to tado nincani-mu. 6 Isira nopatuntu-mo ri todea nu Allatala isei nancambelai towe-mu si sira. Nabelo mpuu ande iko mambei nuanu to niparalou-ra ri rara polumakoa-ra. 7 Apaa ri rara polumakoa-ra nampalayani i Kristus, tado naria ba nuapa-pa to nitarima-ra lako ri tou-tou to tado nanguncani Allatala. 8 Eemo sabana, ikita kana mantulungi tou-tou ewa ee, bona mamala-ta mangala bagia-ta ri rara pobagoa-Na to nakono.

9 Nitulisi-kumo sura ri todea nu Allatala, agiana i Diotrefes to madota majadi topangkeni todea nu Allatala, tado namparonge nuanu niuli-ku. 10 Ande marata-kudamo ngoni, yaku kana manguli sumawee inggu to nipowia ni Diotrefes. Ia nampopowole lolita to tado nakono nancambelai-ka. Pade sumaweena ee tadopa nagana nirasai-na. Ia mbii tado nadota nantarima sarara-sarara saongu kaparisayaa to narata ri ngata ee. Pade tado kawule ee, ia mbii nantagi tou-tou to madota mantulungi sarara-sarara saongu kaparisyaa ee. Pade ande maria dapa todea nu Allatala mowia nuanu ewa ee, ia mampopesuwu tou-tou ee lako ri todea nu Allatala.

11 Sarara-ku to nipotowe-ku, nemo mantutu inggu to nadaa. Agiana tutumo inggu to nabelo. Tou to nabelo inggu-na ia-mo to lako ri Allatala. Pade tou nadaa inggu-na ia-mo to tado nanguncani Allatala.

12 Sumawee tou nangune i Demetrius. Pade Allatala dodo nangune-ya. Ikami mbii nangune-ya. Nincani-mi bakote sumawee to niparata-ka mamala raparisaya.

Kaopuana

13-15

13 Nadea mpuu nuanu to ku'uli siko, agiana nabelo loupa ande tado kutulisi ri sura. 14 Yaku nancarumaka bona magasi-ta motomu, pade mololita-tada. 15 Kasanaa lako ri Allatala mamporoasi-ko! Wega-wega-mu to naria isei nopakatu tabe si-ko. Parata tabe-ku ri sumawee wega-ta, butu-butu dua.